Лыд 19 - Коми Библия 2023

Сӧстӧммӧдчан ва

¹ Господь шуис Мӧисейлы да Ааронлы:

² «Тайӧ тшӧктӧмыс Господьсянь. Висьтав Израиль пиянлы, мед вайӧдасны тэ дінӧ дзоньвидза гӧрд мӧскӧс, кодлӧн абу некутшӧм тырмытӧмтор да коді сийӧс улын эз на вӧвлы.

³ Мӧссӧ вайӧдӧй Элазар поп дінӧ. Сійӧ мед петкӧдас мӧссӧ чомъяс сайӧ [сӧстӧминӧ]. Сэні мӧссӧ мед начкасны Элазар поп дырйи.

⁴ Элазар поп мед чуньсӧ кӧтӧдлас мӧс вирнас да резыштас вежа чомлань сизимысь.

⁵ Мӧссӧ мед сотасны кучикнас, яйнас, вирнас да сювнас Элазар поплӧн син водзын.

⁶ Сійӧ мед босьтас сус путор, иссоп турун, югыдгӧрд вурун шӧрт да шыбитас сотчысь мӧс вылӧ.

⁷ Элазар поп мед мыськалас паськӧмсӧ, ачыс мыссяс, та бӧрын вермас бӧр локны чомъяс дорӧ. Рытӧдзыс сійӧ лоӧ пеж.

⁸ Мӧскӧс сотысь мед тшӧтш мыськалас паськӧмсӧ да ачыс мыссяс. Рытӧдзыс сійӧ лоӧ пеж.

⁹ Но сӧстӧм морт мед чукӧртас сотӧм мӧслысь пӧимсӧ да нуас чомъяс сайӧ сӧстӧминӧ. Пӧимсӧ колӧ видзны, медым сы отсӧгӧн Израиль войтырлы позис вӧчны сӧстӧммӧдчан ва. Тайӧ мӧскыс – мыжысь вись.

¹⁰ Пӧим чукӧртысь мед мыськалас паськӧмсӧ. Рытӧдзыс сійӧ лоӧ пеж. Израиль пиянлы да йӧз муысь локтысьяслы тайӧ тшӧктӧмыс нэмъяс кежлӧ.

¹¹ Коді инмӧдчылас мортлӧн шойыс дінӧ, сійӧ сизим лун чӧж лоӧ пеж.

¹² Коймӧд луннас да сизимӧд луннас сылы колӧ сӧстӧммӧдчыны сӧстӧммӧдчан ванас, и сійӧ лоӧ сӧстӧм. Но оз кӧ сӧстӧммӧдчы коймӧд луннас да сизимӧд луннас, сійӧ оз ло сӧстӧм.

¹³ Коді инмӧдчылас мортлӧн шойыс дінӧ да оз сӧстӧммӧдчы, сійӧ пежалӧ Господьлысь оланінсӧ. Тайӧ мортсӧ лоӧ бырӧдӧма Израиль войтыр пӧвстысь, ӧд сійӧс абу вӧлі резӧма сӧстӧммӧдчан ваӧн. Сійӧ пеж, пежасьӧмыс кольӧ сы вылӧ.

¹⁴ Тайӧ индӧдыс сы йылысь, коді пыралӧ чомйӧ либӧ лоӧ чомйын, кӧні кулӧм морт. Сизим лун чӧж сійӧ лоӧ пеж.

¹⁵ Восьса либӧ бура тупкытӧм дозмук лоӧ пеж.

¹⁶ Быдӧн, коді ывлаын инмӧдчылас шыпурт помысь кулӧм либӧ мӧд ногӧн кулӧм морт дінӧ, морт шойлӧн лыясӧ либӧ шой дзебанінӧ, сизим лун чӧж лоӧ пеж.

¹⁷ Сійӧс сӧстӧммӧдӧм могысь колӧ босьтны мыжысь висьлысь пӧимсӧ, пуктыны сійӧс дозйӧ да кисьтны сэтчӧ визувтанінысь босьтӧм ва.

¹⁸ Сӧстӧм морт мед босьтас иссоп турун, кӧтӧдас турунсӧ тайӧ ваас да резас чомсӧ, кӧні вӧлі кулӧм морт, сэтысь став эмбур-кӧлуйсӧ да став йӧзсӧ, кодъяс вӧліны чомйын. Тадзи жӧ мед резасны мортӧс, коді инмӧдчылас морт шойлӧн лыясӧ, кулӧм либӧ виӧм морт дінӧ либӧ шой дзебанінӧ.

¹⁹ Сӧстӧм морт мед коймӧд луннас да сизимӧд луннас резас пеж мортӧс, тадзи сизимӧд луннас сӧстӧммӧдас сійӧс. Сӧстӧммӧдӧм мортыс мед мыськалас ассьыс паськӧмсӧ, и ачыс мыссяс. Тайӧ рытсяньыс сійӧ лоӧ сӧстӧм.

²⁰ Но пежасьӧм морт кӧ оз сӧстӧммӧдчы, сійӧс лоӧ бырӧдӧма войтыр пӧвстысь, ӧд сійӧ пежалӧ Господьлысь вежаинсӧ. Сійӧ пеж, ӧд сӧстӧммӧдчан ванас сійӧс абу вӧлі резӧма.

²¹ Тайӧ тшӧктӧмыс тіянлы нэмъяс кежлӧ. Сӧстӧммӧдчан ваӧн резысь мед тшӧтш мыськалас ассьыс паськӧмсӧ. Сӧстӧммӧдчан ваӧ инмӧдчылысь рытӧдзыс лоӧ пеж.

²² Ставыс, кытчӧ пеж морт инмӧдчылас, лоӧ пеж. Коді инмӧдчылас пежасьӧмтор дінӧ, сійӧ рытӧдзыс лоӧ пеж».