Лыд 18 - Коми Библия 2023

Попъяслӧн да левитъяслӧн кывкутӧм

¹ Господь шуис Ааронлы: «Тэ, пияныд да батьыдлӧн рӧдыс нуанныд мыжсӧ, вежаин йылысь тшӧктӧмъяссӧ кӧ лоӧ торкӧма. А попъясӧн кесъялӧм йылысь тшӧктӧмъяссӧ кӧ лоӧ торкӧма, сэки мыжсӧ нуан тэ пияныдкӧд.

² Левий рӧдысь вокъястӧ босьт кесъявны, медым найӧ отсасьӧны тэныд вежа чом водзын пияныдкӧд кесъялігӧн.

³ Левитъяс мед отсасясны тэныд да вӧчасны вежа чом бердын став уджсӧ. Но найӧ мед оз инмӧдчыны вежа дозмук-кӧлуйӧ да висьпуктанінӧ. Инмӧдчасны кӧ, куласны, и ті накӧд тшӧтш куланныд.

⁴ Найӧ мед тэкӧд уджаласны вежа чом бердын. Но бокыса йӧзлы вежа чом дорӧ матыстчыны оз позь.

⁵ Тіянӧс пуктӧма тӧждысьны вежаин да висьпуктанін вӧсна, медым водзӧвылӧ Менам скӧрлунӧй эз су Израиль пиянӧс.

⁶ Левит вокъяснытӧ Ме Ачым торйӧді Израиль пиян пӧвстысь да сеті тіянлы, медым найӧ кесъялісны Меным вежа чом бердын.

⁷ А тэ да тэнад пияныд кесъялӧй попъясӧн висьпуктанін дорын да Вежаинын ӧшалысь дӧра сайын. Попъясӧн кесъялӧмыс – Месянь козин тіянлы. Но бокыса морт кӧ матыстчас вежа чом дорӧ, сійӧс лоӧ виӧма».

⁸ Господь шуис Ааронлы: «Ме пукта тэнӧ кывкутны Меным вайӧмторъяс вӧсна. Став вежа вайӧмторсьыс, мый Израиль пиян вайӧны Меным, Ме сета тэныд да тэнад пиянлы пай. Тайӧ тшӧктӧмыс нэмъяс кежлӧ.

⁹ Вежасьыс-вежаторйысь тэныд вичмӧ ставыс, мый оз сотны. Меным вайӧм нянь висьысь, мыжысь висьысь да мыж вештан висьысь вежасьыс-вежаторйыс лоӧ тэныд да пияныдлы.

¹⁰ Сёйӧй сійӧс вежаинын, ӧд сійӧ вежа. Сӧмын тіян айулов вермасны сёйны сійӧс.

¹¹ Тэныд да ныв-пиыдлы вичмӧ Израиль пиянлӧн пыркӧдан вись. Тайӧ тшӧктӧмыс нэмъяс кежлӧ. Тэнад котырысь быдӧн, коді сӧстӧм, вермас сёйны сійӧс.

¹² Ме сета тэныд медбур олив вый, медбур вина да нянь тусь – ставсӧ, мый Израиль пиян вайӧны Меным асланыс медводдза босьтӧмторйысь.

¹³ Налӧн му вылысь медводдза быдтасыс, мый вайӧны Господьлы, лоӧ тэнад. Тэнад котырысь быдӧн, коді сӧстӧм, вермас сёйны сійӧс.

¹⁴ Ставыс, мый Израиль муын сиӧма Господьлы, лоӧ тэнад.

¹⁵ Мортлӧн либӧ пемӧслӧн медводдза чужысьыс, кодӧс вайӧны Господьлы, лоӧ тэнад. Но мортлысь медводдза чужысьсӧ колӧ бӧр ньӧбны, и пеж пемӧслысь медводдза чужысьсӧ колӧ бӧр ньӧбны.

¹⁶ Медводдза чужысь пи кагаӧс, кор сылы тырас тӧлысь, колӧ бӧр ньӧбны индӧм донысь. Босьт сыысь вит сикель эзысь вежаинса сикель серти. Ӧти сикельын – кызь гера.

¹⁷ Но мӧслысь, ыжлысь да кӧзалысь медводдза чужысьясӧс оз ков бӧр ньӧбны, ӧд найӧ вежаӧсь. Налӧн вирӧн тэныд колӧ резны висьпуктанін, а госсӧ сотны вись пыдди. Тайӧ – Господьлы чӧскыд ӧвтантор.

¹⁸ Налӧн яйыс кольӧ тэныд, кыдзи кольӧ тэныд пыркӧдан вись пыдди вайӧм морӧсвыв яй да веськыдладор задвыв яй.

¹⁹ Став вежа вайӧмторсӧ, мый Израиль пиян вайӧны Меным, Ме сета тэныд да тэнад ныв-пилы. Тайӧ тшӧктӧмыс нэмъяс кежлӧ. Тэныд да тэсянь чужысьяслы тайӧс кӧсйысьӧма нэмъяс кежлӧ, и тайӧ Господь водзын кӧрталӧм вежсьывлытӧм йитӧд кодь».

²⁰ Господь шуис Ааронлы: «Израиль муысь пайсӧ тэныд оз ло сетӧма. Ме – тэнад пайыс да тэнад юкӧныс.

²¹ Му пыдди Ме сета Левий пиянлы дасӧд юкӧнсӧ ставсьыс, мый лоӧ быдтӧма Израиль муын. Тадзи вежа чом бердын кесъялӧмысь налӧн лоӧ удждон.

²² Вежа чом дорӧ Израиль пиянлы матыстчыны оз позь, медым найӧ эз мыжмыны да эз кувны.

²³ Сӧмын левитъяс мед кесъяласны вежа чом бердын да нуасны мыжнысӧ, торкасны кӧ вежаин йылысь тшӧктӧмъяссӧ. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз. Израиль пиян пӧвстын левитъяслы муыс оз ло.

²⁴ Му пыдди Ме сета налы дасӧд юкӧнсӧ сыысь, мый Израиль пиян вайӧны Меным. Та вӧсна Ме шуи левитъяслы, мый Израиль пиян пӧвстын налы муыс оз вичмы».

²⁵ Господь тшӧктіс Мӧисейлы

²⁶ висьтавны левитъяслы: «Кор ті кутанныд босьтны Израиль пиянсянь дасӧд юкӧнсӧ, мый Ме инді тіянлы, дасӧд юкӧнсьыс ті тшӧтш торйӧдӧй дасӧд юкӧнсӧ Господьлы.

²⁷ Тайӧ дасӧд юкӧныс лоӧ тіян сетӧмторйӧн, кыдзи гумла вылысь ваян тусь да виноград пычкан гуысь вайӧмтор лоӧны Израиль пиянлӧн сетӧмторйӧн.

²⁸ Тадзи став дасӧд юкӧнсьыс, мый Израиль пиян вайӧны тіянлы, ті тшӧтш ваянныд дасӧд юкӧннытӧ Господьлы. Сетӧй сійӧс Аарон поплы.

²⁹ Быдторйысь, мый вайӧны тіянлы, медбурсӧ да вежасӧ торйӧдӧй Господьлы.

³⁰ Медбурсӧ сетӧмныд лоӧ Израиль пиянлӧн гумла вылысь да виноград пычкан гуысь вайӧмтор кодь.

³¹ А мый тіянлы коляс, сійӧс ті асланыд котыръяскӧд верманныд сёйны, кӧні кӧсъянныд. Тайӧ лоӧ тіян удждонныд вежа чомйын кесъялӧмысь.

³² Ті кӧ сетанныд Господьлы медбурсӧ сыысь, мый вайӧны Израиль пиян, ті онӧ пежалӧй налысь вежа вайӧмторъяссӧ, онӧ лоӧй мыжаӧсь да онӧ кулӧй».