Лыд 17 - Коми Библия 2023

Ааронлӧн дзоридзалысь бедь

¹ Господь шуис Мӧисейлы:

² «Висьтав Израиль пиянлы, мед быд чужанкотырысь юралысь ваяс тэныд бедь, ставнас дас кыкӧс. Быд бедь вылӧ гиж чужанкотырлӧн юралысьлысь нимсӧ.

³ Левий бедь вылӧ гиж Ааронлысь нимсӧ. Быд чужанкотырлӧн юралысьлы колӧ вайны ӧти бедь.

⁴ Бедьяссӧ пукты вежа чомйӧ Йитӧд куд водзӧ. Сэтысянь Ме кута шыасьны тіян дінӧ.

⁵ Кодӧс Ме бӧръя, сылӧн беддьыс кутас дзоридзавны. Ме вӧча тадзи, медым тіян вылӧ ропкысь Израиль пиян тупкисны вомнысӧ».

⁶ Мӧисей висьталіс та йылысь Израиль пиянлы, и быд чужанкотырысь юралысь вайис сылы бедь, ставнас дас кыкӧс. Бедьяс пӧвстын вӧлі тшӧтш Ааронлӧн беддьыс.

⁷ Мӧисей пуктіс бедьяссӧ вежа чомйӧ Господь водзӧ.

⁸ Мӧд луннас Мӧисей пырис [Ааронкӧд] вежа чомйӧ да аддзис, мый Левий чужанкотырысь Ааронлӧн беддьыс дзоридзалӧ. Беддьыс гаръялӧма, а гаръяссьыс мыччысьӧма дзоридз да вотӧсалӧма миндаль.

⁹ Господь водзысь Мӧисей петкӧдіс бедьяссӧ Израиль пиянлы. Бедьяссӧ видзӧдалӧм бӧрын быдӧн босьтіс ассьыс бедьсӧ.

¹⁰ Господь шуис Мӧисейлы: «Ааронлысь бедьсӧ бӧр пукты Йитӧд куд водзӧ. Беддьыс лоӧ кывзысьтӧм йӧзлы пасӧн, медым найӧ эз ропкыны Ме вылӧ и та вӧсна эз кувны».

¹¹ Мӧисей ставсӧ вӧчис Господьлӧн тшӧктӧм серти.

¹² Израиль пиян шуисны Мӧисейлы: «Ми кулам, ми ставным кулам!

¹³ Быдӧн, коді матыстчас Господьлӧн вежа чом дорӧ, кулас. Ми ӧмӧй ставным кулам?»