Лыд 16 - Коми Библия 2023

Мӧисейлы паныд кыпӧдчӧм

¹ Левий рӧдысь Кааф Ицгарлӧн Корей пиыс, Рувим рӧдысь Элиавлӧн Датан да Авирам пияныс да Пелетлӧн Он пиыс

² кыпӧдчисны Мӧисейлы паныд. Накӧд вӧліны израильса кыксё ветымын веськӧдлысь, войтырлӧн тӧдчана йӧз.

³ Найӧ чукӧртчисны Мӧисей да Аарон дінӧ да шуисны: «Тырмас тіянлы! Став войтырыс вежа, и на пӧвстын Господь. Мыйла ті асьнытӧ ыджыдавны пуктанныд Господьлӧн войтырыс вылын?»

⁴ Тайӧс кылӧм бӧрын Мӧисей кымынь уськӧдчис муас.

⁵ Сэсся Корейлы да сылӧн йӧзыслы шуис: «Аски Господь петкӧдлас, коді вежа, коді Сылӧн, да кодлы Сійӧ лэдзӧ матыстчыны Ас дінас. Кодӧс Господь бӧръяс, сійӧс и лэдзас матыстчыны Ас дінас.

⁶ Тэ, Корей, аслад йӧзыдкӧд аски со мый вӧчӧй: босьтӧй тшынӧдчан дозъяс,

⁷ пуктӧй сэтчӧ биа ӧгыр да тшынӧдчантор, вайӧй Господь водзӧ. Кодӧс Господь бӧръяс, сійӧ и вежа. Тырмас тіянлы, Левий пиян!»

⁸ Корейлы Мӧисей нӧшта шуис: «Левий пиян, кывзӧй!

⁹ Тіянлы ӧмӧй этша на сійӧ, мый Израильлӧн Ен торйӧдіс тіянӧс Израиль войтыр пӧвстысь да матыстіс Ас дінас, медым ті кесъялінныд Господьлӧн вежа чом бердын да [Господьлӧн] войтырлы?

¹⁰ Енмыс матыстіс Ас дінас тэнӧ да тэнсьыд вокъястӧ, Левий пиянӧс, но ті нӧшта на попъясӧн кӧсъянныд лоны!

¹¹ Тэ аслад йӧзкӧд кыпӧдчин Господьлы паныд. Ті ӧд онӧ Аарон вылӧ, а Господь вылӧ ропканныд».

¹² Мӧисей тшӧктіс корны Элиавлысь Датан да Авирам пиянсӧ. Но найӧ вочавидзисны: «Ми огӧ локтӧй.

¹³ Этша на тэныд сійӧ, мый тэ петкӧдін миянӧс муысь, кӧні визувтӧ йӧв да ма, мед ми тані, овтӧминас, кулім? А ӧні кӧсъян нӧшта ыджыдавны миян вылын!

¹⁴ Тэ ӧмӧй вайӧдін миянӧс муӧ, кӧні визувтӧ йӧв да ма? Тэ ӧмӧй сетін миянлы видз-муяс да виноград йӧръяс? Чайтан, мый йӧзыс синтӧмӧсь? Ми огӧ локтӧй!»

¹⁵ Мӧисей ёна скӧрмис да шуис Господьлы: «Налысь вайӧмторъяссӧ эн сибӧд. Ме весиг ӧти осёлӧс эг босьтлы налысь, на пӧвстысь некодлы лёксӧ эг вӧчлы».

¹⁶ Корейлы Мӧисей шуис: «Аски лок аслад йӧзыдкӧд Господь водзӧ. Аарон тшӧтш локтас.

¹⁷ Быдӧн мед босьтас ассьыс тшынӧдчан дозсӧ, пуктас сэтчӧ тшынӧдчантор да ваяс Господь водзӧ. Тадзи ваянныд кыксё ветымын тшынӧдчан доз, тшӧтш тэ да Аарон ваянныд дознытӧ».

¹⁸ Быдӧн босьтіс ассьыс тшынӧдчан дозсӧ, пуктіс сэтчӧ биа ӧгыр да тшынӧдчантор. Сэсся ставныс сувтісны вежа чом пыранін дорӧ. Сэні вӧліны тшӧтш Мӧисей да Аарон.

¹⁹ Корей чукӧртіс вежа чом пыранін дорӧ став войтырсӧ, медым Мӧисейлы да Ааронлы паныд кыпӧдны найӧс. Сэки став войтырыс аддзис Господьлысь дзирдлунсӧ.

²⁰ Господь шуис Мӧисейлы да Ааронлы:

²¹ «Петӧй тайӧ войтырыс пӧвстысь! Найӧс ставнысӧ Ме бырӧда ӧти здукӧн».

²² Но Мӧисей да Аарон кымынь уськӧдчисны муас да шуисны: «Енмӧй, Тэ став ловъя олысьыслӧн Ен! Тэ ӧмӧй став войтырыс вылӧ скӧрман ӧти мортлӧн мыж вӧсна?»

²³ Господь шуис Мӧисейлы:

²⁴ «Войтырлы тшӧкты вешйыны Корей, Датан да Авирам чомъяс дорысь».

²⁵ Мӧисей муніс Датан да Авирам дінӧ, сы бӧрся мунісны тшӧтш израильса юрнуӧдысьяс.

²⁶ Войтырыслы Мӧисей шуис: «Вешйӧй тайӧ мыжа йӧзыслӧн чомъяс дорысь, налӧн эмбур-кӧлуй дінӧ энӧ инмӧдчӧй. Онӧ кӧ кывзысьӧй, налӧн мыжъяс вӧсна [накӧд ӧтвылысь] куланныд».

²⁷ Войтырыс вешйис Корей, Датан да Авирам чомъяс дорысь, а Датан да Авирам петісны чомъяссьыныс да сувтісны пыранін дораныс гӧтыръясныскӧд, пиянныскӧд да ичӧт кагаясныскӧд.

²⁸ Мӧисей шуис войтырыслы: «Ӧні ті тӧдмаланныд, мый Господь мӧдӧдіс менӧ. Ставсӧ, мый ме вӧчи, эг аслам кӧсйӧм серти вӧч.

²⁹ Найӧ кӧ куласны, кыдзи став йӧзыс кулӧны, и найӧс кӧ суас сэтшӧм мыждӧм, кутшӧм суӧ став йӧзсӧ, сідзкӧ, эз Господь менӧ мӧдӧд.

³⁰ Но Господь кӧ вӧчас вӧвлытӧмтор, и муыс воссяс да ньылыштас найӧс [налысь чомъяснысӧ] да ставсӧ, мый налӧн эм, и найӧ ловйӧн мунасны пыдӧстӧминӧ, сэки ті тӧдмаланныд, мый тайӧ йӧзыс нинӧмӧ пуктісны Господьӧс».

³¹ Мӧисей сӧмын дугдіс сёрнитнысӧ, и тайӧ йӧзыслӧн кок улын муыс воссис.

³² Муыс восьтіс вомсӧ и ньылыштіс Корейлысь став йӧзсӧ чомъяснас да эмбурнас.

³³ Найӧ ловйӧн веськалісны пыдӧстӧминӧ ставнас, мый налӧн вӧлі. Муыс вевттис найӧс, и найӧ бырисны войтыр пӧвстысь.

³⁴ Налӧн горзӧмысь матын сулалысь израильсаяс пышйисны сэтысь, ӧд повзисны, мый муыс ньылыштас тшӧтш найӧс.

³⁵ Господьсянь петіс би да сотіс тайӧ кыксё ветымын айуловсӧ, кодъяс вайисны тшынӧдчантор.

³⁶ Господь шуис Мӧисейлы:

³⁷ «Аарон поплӧн Элазар пилы тшӧкты чукӧртны биӧн сотӧм айуловлысь [ыргӧнысь вӧчӧм] тшынӧдчан дозъяссӧ да шыбитны сэтысь биа ӧгырсӧ, ӧд тшынӧдчан дозъясыс вежаӧсь.

³⁸ Тшынӧдчан дозъяссӧ налысь, кодъяс кулісны асланыс мыж вӧсна, мед лямӧдасны листъясӧ. Наӧн мед эжасны висьпуктанін, ӧд дозъясыс лоины вежаӧсь, кор найӧс вайисны Господь водзӧ. Лямӧдӧм дозъясыс мед лоӧны ӧлӧданпасӧн Израиль пиянлы».

³⁹ Элазар поп чукӧртіс биӧн сотӧм айуловлысь ыргӧнысь вӧчӧм тшынӧдчан дозъяссӧ. Тайӧ дозъяссӧ лямӧдісны, сэсся эжисны висьпуктанін,

⁴⁰ кыдзи Господь тшӧктіс Мӧисей пыр. Лямӧдӧм дозъясыс лоины Израиль пиянлы ӧлӧданпасӧн, медым Ааронсянь чужысьяс кындзи некод эз тшынӧд чӧскыд ӧвтанторъяс Господь водзын, и эз ло сідзи, кыдзи лои Корейкӧд да сылӧн йӧзыскӧд.

⁴¹ Мӧд луннас став Израиль войтыр шуасис Мӧисей да Аарон вылӧ: «Ті виинныд Господьлысь войтырсӧ!»

⁴² Кор войтырыс чукӧртчис Мӧисей да Аарон дінӧ, найӧ бергӧдчисны вежа чомлань да аддзисны, кыдзи чомсӧ вевттис кымӧр, и сэні петкӧдчис Господьлӧн дзирдлуныс.

⁴³ Мӧисей да Аарон матыстчисны вежа чом дорӧ.

⁴⁴ Господь шуис Мӧисейлы [да Ааронлы]:

⁴⁵ «Вешйӧй тайӧ войтырыс дінысь! Найӧс ставнысӧ Ме бырӧда ӧти здукӧн». Но Мӧисей да Аарон кымынь уськӧдчисны муас.

⁴⁶ Мӧисей шуис Ааронлы: «Босьт тшынӧдчан доз да пукты сэтчӧ висьпуктанінысь ӧгырсӧ, пукты тшӧтш тшынӧдчантор да тэрмасьӧмӧн ну дозсӧ войтыр дінӧ. Вешты налысь мыжсӧ, ӧд Господь скӧрмис, и бырӧдӧмыс заводитчис нин».

⁴⁷ Мӧисейлӧн тшӧктӧм серти Аарон босьтіс тшынӧдчан доз да котӧртіс войтыр пӧвстӧ, а войтырӧс бырӧдӧмыс вӧлі заводитчӧма нин. Аарон пуктіс чӧскыд дука тшынӧдчанторсӧ ӧгыр вылӧ да вештіс войтырлысь мыжсӧ.

⁴⁸ Сійӧ сувтіс кулӧмаяс да ловъяяс костӧ, и бырӧдӧмыс помасис.

⁴⁹ Корейлӧн мыж вӧсна кулӧмаясысь ӧтдор вӧлі бырӧдӧма дас нёль сюрс сизимсё мортӧс.

⁵⁰ Кор бырӧдӧмыс помасис, Аарон бӧр локтіс Мӧисей дінӧ вежа чом пыранін дорӧ.