Лыд 15 - Коми Библия 2023

Вись вайӧм йылысь содтӧд тшӧктӧм

¹ Господь тшӧктіс Мӧисейлы

² висьтавны Израиль пиянлы: «Кор ті воанныд сійӧ муас, мый Ме сета тіянлы,

³ да ваянныд Господьлы чӧскыда ӧвтысь сотан вись либӧ начкан вись пыдди ӧшкӧс либӧ ыжӧс, лоӧ-ӧ тайӧ висьыс кыв сетан вись либӧ ас кӧсйӧм серти ваян вись либӧ гаждырся вись,

⁴ сэки тшӧтш вайӧй Господьлы нянь вись пыдди олив выйӧн гудралӧм шобді пызь. Пызьыс мед вӧлі ефалӧн дасӧд юкӧныс, а выйыс мед вӧлі гинлӧн нёльӧд пайыс.

⁵ Нӧшта вайӧй кисьтан вись пыдди вина – гинлысь нёльӧд пайсӧ быд балякӧд, мый ваянныд [Господьлы чӧскыда ӧвтысь] сотан вись либӧ начкан вись пыдди.

⁶ А межкӧд вайӧй нянь вись пыдди олив выйӧн гудралӧм шобді пызь. Та могысь ефа мында пызьсӧ юкӧй дас пельӧ и сэтысь босьтӧй кыксӧ, а выйсӧ босьтӧй гинлысь коймӧд пайсӧ.

⁷ Нӧшта кисьтан вись пыдди вайӧй вина – гинлысь коймӧд пайсӧ. Став тайӧ вайӧмторйыс – Господьлы чӧскыд ӧвтантор.

⁸ Ваянныд кӧ Господьлы ӧшкӧс сотан вись пыдди либӧ мукӧд вись пыдди, медым збыльмӧдны кыв сетӧмнытӧ либӧ вайны бурасян вись,

⁹ сыкӧд ӧтлаын вайӧй нянь вись пыдди олив выйӧн гудралӧм шобді пызь. Та могысь ефа мында пызьсӧ юкӧй дас пельӧ и сэтысь босьтӧй куимсӧ, а выйсӧ босьтӧй гин джын мында.

¹⁰ Кисьтан вись пыдди вайӧй гин джын вина. Став тайӧ вайӧмторйыс – Господьлы чӧскыд ӧвтантор.

¹¹ Вӧчӧй тадзи быд виськӧд, ваянныд-ӧ вись пыдди ӧшкӧс, межӧс, ыжпиӧс либӧ кӧзапиӧс.

¹² Висьяслӧн лыд серти вайӧй нянь висьсӧ да вина висьсӧ.

¹³ Тадзи вужвойтырысь быдӧн мед вайӧ Господьлы чӧскыда ӧвтан вись.

¹⁴ А йӧз муысь локтысь кӧ кӧсъяс вайны висьсӧ, сылы ставсӧ колӧ вӧчны тіян моз.

¹⁵ Тіянлы, Господьлӧн войтырлы, да йӧз муысь локтысьяслы тшӧктӧмыс ӧти нэмъяс кежлӧ чужысьяссянь чужысьясӧдз. Господь водзын ті да йӧз муысь локтысьяс – ӧткодьӧсь.

¹⁶ Тіянлы да йӧз муысь локтысьяслы индӧд-тшӧктӧмыс ӧти».

¹⁷ Господь тшӧктіс Мӧисейлы

¹⁸ висьтавны Израиль пиянлы: «Кор воанныд сійӧ муас, кытчӧ Ме нуӧда тіянӧс,

¹⁹ да кутанныд сёйны сэні быдтӧм нянь, вайӧй Господьлы козин пыдди

²⁰ выль быдтасысь медводдза пӧжалӧм нянь. Вайӧй сійӧс гумла вылысь ваян козинӧс моз.

²¹ Медводдза пӧжасысь козинсӧ вайӧй Господьлы чужысьяссянь чужысьясӧдз.

²² Ті кӧ тӧдлытӧг торканныд да онӧ вӧчӧй тайӧ тшӧктӧмъясыс серти, мый Господь висьталіс Мӧисейлы

²³ и сетіс тіянлы да тіянсянь чужысьяслы Мӧисей пыр,

²⁴ и войтырыс та вӧсна тӧдлытӧг мыжмас, сэки войтырыс мед ваяс [дзоньвидза] ӧшкӧс Господьлы чӧскыда ӧвтысь сотан вись пыдди. Ӧшкӧд мед ваяс нянь вись да вина вись тшӧктӧм серти. Нӧшта мыжысь вись пыдди мед ваяс ай кӧзаӧс.

²⁵ Поп мед вештас став Израиль войтырлысь мыжсӧ, и найӧс лоӧ прӧститӧма. Ӧд мыжсӧ вӧлі вӧчӧма тӧдлытӧг, но войтырыс вайис Господьлы висьсӧ, тшӧтш вайис тӧдлытӧг Господьлы паныд мыж вӧчӧмысь вись.

²⁶ Став Израиль войтырлысь да йӧз муысь локтысьяслысь мыжсӧ лоӧ прӧститӧма, ӧд тӧдлытӧг мыж вӧчӧмысь ставныс лоины мыжаӧсь.

²⁷ Ӧти морт кӧ тӧдлытӧг мыж вӧчас, мыжысь вись пыдди мед ваяс арӧса кӧзаӧс.

²⁸ Поп мед вештас Господьлы паныд тӧдлытӧг мыж вӧчысьлысь мыжсӧ, и сійӧс лоӧ прӧститӧма.

²⁹ Ӧти Индӧд быдӧнлы, коді тӧдлытӧг мыж вӧчӧ, Израиль войтырысь-ӧ сійӧ либӧ йӧз муысь локтысь.

³⁰ Вужвойтырысь либӧ йӧз муысь локтысьясысь кӧ кодкӧ тӧдӧмӧн мыж вӧчӧ, сійӧ омӧльтӧ Господьӧс. Сійӧс лоӧ бырӧдӧма аслас войтыр пӧвстысь,

³¹ ӧд сійӧ мустӧмтіс Господьлысь кывсӧ да торкис Сылысь тшӧктӧмсӧ. Тайӧ мортсӧ лоӧ бырӧдӧма, мыжыс кольӧ сы вылӧ».

Шойччан лун торкысьӧс мыждӧм

³² Кор Израиль пиян вӧліны овтӧминын, аддзисны мортӧс, коді шойччан лунӧ чукӧртіс пес.

³³ Пес чукӧртысьӧс аддзысьяс вайӧдісны сійӧс Мӧисей, Аарон да став Израиль войтыр дінӧ.

³⁴ Сійӧс видзисны йӧршитӧмӧн, ӧд эз на вӧв шуӧма, мый сыкӧд вӧчнысӧ.

³⁵ Господь шуис Мӧисейлы: «Тайӧ мортсӧ колӧ вины. Став войтырыс мед изъялас сійӧс чомъяс сайын».

³⁶ Войтырыс петкӧдіс сійӧс чомъяс сайӧ да кувтӧдзыс изъяліс, кыдзи Господь тшӧктіс Мӧисейлы.

Тугъяс йылысь тшӧктӧм

³⁷ Господь тшӧктіс Мӧисейлы

³⁸ висьтавны Израиль пиянлы: «Вӧчӧй аслыныд паськӧм дорышӧ тугъяс, кытчӧ сюянныд гӧрдовлӧз вурун шӧрт. Тадзи вӧчӧй чужысьяссянь чужысьясӧдз.

³⁹ Тайӧ тугъясыс тіянлы сы могысь, медым на вылӧ видзӧдігӧн ті тӧд выланыд уськӧдінныд Господьлысь став тшӧктӧмсӧ да олінныд на серти. Сэки тіян сьӧлӧм кӧсйӧмныд да синлы колӧмныд оз кежӧд тіянӧс Меысь, и ті онӧ эновтӧй Менӧ.

⁴⁰ Энӧ вунӧдӧй Менсьым тшӧктӧмъясӧс, олӧй на серти, медым ті вӧлінныд Енлы вежӧдӧм-торйӧдӧм войтырӧн.

⁴¹ Ме – Господь, тіян Енныд. Ме петкӧді тіянӧс Египетысь, медым лоны тіян Енмӧн. Ме – Господь, тіян Енныд».