Лыд 13 - Коми Библия 2023

Ханаан му видзӧдалӧм

¹ Сэсся войтырыс петіс Хацеротысь да сувтіс Паран овтӧминӧ.

² Господь шуис Мӧисейлы:

³ «Мӧдӧд чужанкотыръяслысь юралысьяссӧ видзӧдавны Ханаан му. Тайӧ мусӧ Ме сета Израиль пиянлы».

⁴ Господьлӧн тшӧктӧм серти Мӧисей мӧдӧдіс найӧс Паран овтӧминсянь. Ставныс найӧ вӧліны Израиль войтырлӧн юралысьясыс.

⁵ Тайӧ вӧліны: Рувим чужанкотырысь Заккурлӧн Шаммуй пиыс,

⁶ Симеон чужанкотырысь Хорилӧн Шафат пиыс,

⁷ Иуда чужанкотырысь Ефуннилӧн Калев пиыс,

⁸ Иссакар чужанкотырысь Ӧсиплӧн Игал пиыс,

⁹ Ефрем чужанкотырысь Навлӧн Осий пиыс,

¹⁰ Венямин чужанкотырысь Рафулӧн Палти пиыс,

¹¹ Завулон чужанкотырысь Содилӧн Гаддиэл пиыс,

¹² Ӧсип Манассей чужанкотырысь Сусилӧн Гадди пиыс,

¹³ Дан чужанкотырысь Гемаллилӧн Аммиэл пиыс,

¹⁴ Асир чужанкотырысь Микаиллӧн Сетур пиыс,

¹⁵ Неффалим чужанкотырысь Вофсилӧн Нахби пиыс,

¹⁶ Гад чужанкотырысь Макилӧн Геуэл пиыс.

¹⁷ Тайӧ айуловсӧ Мӧисей мӧдӧдіс видзӧдавны Ханаан му. Навлысь Осий писӧ Мӧисей нимтіс Исусӧн.

¹⁸ Тайӧ йӧзсӧ [Паран овтӧминсянь] Ханаан му видзӧдлыны мӧдӧдігӧн Мӧисей шуис налы: «Мунӧй Негев му пыр да кайӧй керӧсвыв муӧ.

¹⁹ Видзӧдалӧй, кутшӧмджык сійӧ. Тӧдмалӧй, вына-ӧ сэтчӧс войтырыс, уна лыда али этша лыда сійӧ.

²⁰ Видзӧдалӧй, кутшӧм сэні муыс, бур али лёк. Олӧны-ӧ йӧзыс сиктъясын али изкаръясын?

²¹ Вына-ӧ муыс, сетӧ-ӧ сійӧ бур быдтас? Быдмӧны-ӧ сэні пуяс? Лоӧй повтӧмӧсь, вайӧй сэтысь вотӧс». Сэки вӧлі виноград кисьман кад.

²² Найӧ мунісны да видзӧдалісны Ханаан му Цин овтӧминсянь Реховӧдз, Лево-Хаматсянь матын.

²³ Найӧ мунісны Негев муӧ, сэсся воисны Хеврон карӧ, кӧні олісны Ахиман, Шешай да Талмай – Енаксянь чужысьяс. Хеврон карсӧ вӧлі лэптӧма египетса Цоан карысь сизим воӧн водзджык.

²⁴ Эшкол ковтысӧ воӧм бӧрын видзӧдалысьяс вундісны сэтысь ыджыд виноград роз. Тайӧ розсӧ ковмис кыклы нуны зіб вылӧ ӧшӧдӧмӧн. Нӧшта босьтісны гранат да инжир.

²⁵ Тайӧ ковтыссӧ шуисны Эшколӧн, ӧд Израиль пиян вундісны сэтысь виноград роз.

²⁶ Нелямын лун чӧж мусӧ видзӧдалӧм бӧрын найӧ бӧр локтісны

²⁷ Кадешӧ, Паран овтӧминӧ, Мӧисей, Аарон да став Израиль войтыр дінӧ. Найӧ висьтасисны, мый аддзылісны, да петкӧдлісны вайӧм вотӧссӧ.

²⁸ Мӧисейлы найӧ шуисны: «Ми ветлім сійӧ муас, кытчӧ миянӧс мӧдӧдлін. Сэні дзик збыльысь визувтӧ йӧв да ма. Со кутшӧм вотӧс вайим!

²⁹ Но сэтчӧс войтырыс ён, и найӧ олӧны зэв ыджыд изкаръясын. Ми аддзылім весиг Енаксянь чужысьясӧс.

³⁰ Негев муын олӧны амаликъяс, керӧсвыв муын олӧны хеттейяс, [хивейяс,] евуссаяс да аморейяс, а саридз бокын да Йӧрдан ю бокын олӧны ханаансаяс».

³¹ Калев лӧньӧдіс Мӧисейлы паныд горзысьясӧс. «Мунам да босьтам тайӧ мусӧ! – шуис сійӧ. – Ми вермам найӧс!»

³² Но Калевкӧд Ханаан муӧ ветлысьяс мӧдарӧ сёрнитісны: «Ми огӧ вермӧй тайӧ войтырыслы паныд тышкасьны. Найӧ миянысь ёнджыкӧсь!»

³³ Тадзи Израиль пиян пӧвстын найӧ паськӧдісны лёк сёрни муыс йылысь, кытчӧ ветлісны. Найӧ шуисны: «Муыс, кытчӧ ми ветлім, ньылыштас сэтчӧ овмӧдчысьясӧс. Став йӧзыс, кодъясӧс ми сэтысь аддзылім, вӧліны ыджыдӧсь.

³⁴ Аддзылім сэтысь весиг Енаксянь чужысьясӧс, зэв ыджыд тушаа йӧзӧс. Асьнымӧс ми аддзим чирк кодьӧн, и сэтшӧмӧсь жӧ вӧлім налӧн син водзын».