Лыд 12 - Коми Библия 2023

Мирьям да Аарон шуасьӧны Мӧисей вылӧ

¹ Мирьям да Аарон шуасисны Мӧисей вылӧ эфиопияса гӧтырыс вӧсна.

² Найӧ шуисны: «Господь ӧмӧй сӧмын Мӧисейкӧд сёрнитӧ, а миянкӧд оз?» Налысь сёрнисӧ кыліс Господь.

³ Му вылын олысь став йӧзсьыс Мӧисей вӧлі рамсьыс-рам мортӧн.

⁴ Виччысьтӧг Господь шуис Мӧисейлы, Ааронлы да Мирьямлы: «Куимнанныд локтӧй вежа чом дорӧ». Найӧ локтісны.

⁵ Господь лэччис кымӧр сюръя пытшкын да сувтіс вежа чом пыранін дорӧ. Сійӧ корис Ааронӧс да Мирьямӧс, и найӧ матыстчисны.

⁶ Господь шуис: «Кывзӧй Менсьым кывъясӧс. Эм кӧ тіян пӧвстын Менам пророк, сылы Ме восся петкӧдчылӧм пыр да сёрнита сыкӧд вӧтас.

⁷ Но Аслам Мӧисей кесйӧгкӧд ог сідзи сёрнит, ӧд сійӧ кывзысьӧмӧн кесъялӧ Менам керкаын.

⁸ Ме сёрнита сыкӧд ог нӧдкывъяс пыр, а воча чужӧмӧн да восьсӧн, и сійӧ аддзӧ Менсьым пертасӧс. Кыдзи ті лысьтанныд шуасьны Менам Мӧисей кесйӧг вылӧ?»

⁹ Господь скӧрмӧмӧн муніс на дінысь.

¹⁰ Кор кымӧрыс вешйис вежа чом весьтысь, Мирьямлӧн вир-яйыс ставнас вевттьысис лым кодь еджыд проказаӧн. Аарон бергӧдчис Мирьямлань да аддзис, мый сійӧ вевттьысьӧма проказаӧн.

¹¹ Аарон шуис Мӧисейлы: «Ыджыдӧй, ми мыжмим. Эн мыжды миянӧс! Ми мывкыдтӧма вӧчим.

¹² Эн лэдз, медым Мирьям коли пузчужӧм кага шой кодь, коді мам кынӧмсьыс петігас джынвыйӧ сісьмӧма нин».

¹³ Мӧисей шыасис Господь дінӧ: «Енмӧй, кора Тэнӧ, бурдӧд сійӧс!»

¹⁴ Господь вочавидзис Мӧисейлы: «Батьыс кӧ сьӧлыштіс сылы чужӧмас, сійӧ эськӧ сизим лун чӧж вӧлі янӧдӧм улын. Сідзкӧ, вӧтлӧй сійӧс чомъяс сайӧ сизим лун кежлӧ, а сэсся мед бӧр локтас».

¹⁵ Мирьям оліс чомъяс сайын сизим лун чӧж. Кытчӧдз Мирьям бӧр эз лок, Израиль войтыр эз мӧдӧдчы туйӧ.