Лыд 11 - Коми Библия 2023

Ропкӧмысь мыждӧм

¹ Войтырыс кутіс ропкыны. Господь кыліс тайӧс да ёна скӧрмис. Сувтанін помын ыпнитіс Господьлӧн би, биыс кутіс бырӧдны сувтанінсӧ.

² Войтырыс шыасис Мӧисей дінӧ. Мӧисей кевмысис Господьлы, и биыс кусіс.

³ Израиль войтыр пӧвстын Господьлӧн биыс ӧзйылӧм вӧсна тайӧ местаыслы сетісны Тавера ним.

⁴ Мукӧд войтырысь йӧз, кодъяс олісны Израиль войтыр пӧвстын, кутісны пӧтлытӧг горшасьны. Израиль пиян накӧд ӧтвылысь бӧрдісны-шуалісны: «Яй кӧ эськӧ сёйыштны.

⁵ Египетын миянлы дон босьттӧг чери сетлісны, сэні ми сёйлім ӧгуреч, дыня, лук турун, лук да чеснӧк.

⁶ Тані ми дзикӧдз эбӧстӧммам. Манна кындзи миян сёяныс абу!»

⁷ Маннаыс вӧлі кориандр тусь кодь. Сылӧн рӧмыс вӧлі тшынӧдчан сирлӧн кодь.

⁸ Йӧзыс ветлӧдлісны да чукӧртісны маннасӧ, изісны сійӧс изкиӧн либӧ тойисны гырйын, сэсся пуисны пӧртйын либӧ пӧжалісны сӧчӧнъяс. Сылӧн кӧрыс вӧлі олив выя сӧчӧнлӧн кодь.

⁹ Войнас маннаыс усьлывліс чомъяс гӧгӧр лысвакӧд ӧттшӧтш.

¹⁰ Мӧисей кыліс, кыдзи быд чом дорын бӧрдісны йӧзыс. Господь ёна скӧрмис, а Мӧисей шогсис.

¹¹ Мӧисей шыасис Господь дінӧ: «Мыйла Тэ пикӧ воштін менӧ, Ассьыд кесйӧгтӧ? Мый вӧсна Тэ он бурсьӧлӧмтчы ме дінӧ? Мыйла Тэ тайӧ войтырыс вӧсна та ыджда сьӧкыдсӧ ме вылӧ пуктін?

¹² Ме ӧмӧй новлӧдлі найӧс кынӧмын, ме ӧмӧй чужті найӧс? Мыйла Тэ пуктін менӧ кага видзысьӧ, пуктін моздорын новлӧдлыны тайӧ войтырсӧ? Мыйла Тэ тшӧктін менӧ нуны найӧс муӧ, мый йылысь кыв сетін налӧн батьяслы?

¹³ Кытысь ме босьта яйсӧ став тайӧ войтырыслы? Найӧ бӧрдӧмӧн корӧны менсьым яй.

¹⁴ Ме ог вермы ӧтнамӧн нуны тайӧ войтырыс вӧсна сьӧкыдсӧ, тайӧ меным вывті сьӧкыд.

¹⁵ Татшӧм олӧм дорысь бурджык лоӧ, виан кӧ менӧ. Ло бур сьӧлӧма да ви менӧ, медым помасяс менам шогӧй!»

¹⁶ Господь шуис Мӧисейлы: «Чукӧрт Ме дінӧ израильса юрнуӧдысьяс пӧвстысь сизимдас мортӧс, кодъяс йылысь тэ тӧдан, мый найӧ бура видзӧдӧны войтыр бӧрся. Вайӧд найӧс вежа чом дорӧ.

¹⁷ Ме лэчча да кута сёрнитны сэні тэкӧд. Тэ вылысь Ловсӧ Ме юкла да пукта тшӧтш на вылӧ. Сэки найӧ тэкӧд ӧтвылысь пондасны нуны войтыр вӧсна сьӧкыдсӧ, а он нин тэ ӧтнад.

¹⁸ Войтырыдлы тшӧкты вежӧдны-сӧстӧммӧдны асьнысӧ аски кежлӧ, ӧд аски кутанныд сёйны яй. Ті Господь водзын бӧрдінныд-шуалінныд: ”Яй кӧ эськӧ сёйыштны. Египетын миянлы вӧлі бурджык”. Та вӧсна Господь сетас тіянлы яй, и ті сёянныд.

¹⁹ Кутанныд сёйны он ӧти, он кык, он вит, он дас и он кызь лун,

²⁰ а тӧлысь чӧж, кытчӧдз тіянӧс оз кут вукӧдны, и вомсьыныд яйыс бӧр оз кут петны. Тадзи лоӧ сыысь, мый ті мустӧмтінныд Господьӧс, коді олӧ тіян пӧвстын, да сыысь, мый ті Господь водзын бӧрдінныд-шуалінныд, мыйла нӧ ми петім Египетысь».

²¹ Мӧисей шуис: «Тайӧ войтыр пӧвстын квайтсё сюрс пода морт, а Тэ шуан, тӧлысь кежлӧ пӧ яй сета.

²² Тырмас ӧмӧй та мындаыслы, весиг кӧ став ыж-мӧссӧ начкам либӧ саридзсьыс став черисӧ кыям?»

²³ Господь шуис Мӧисейлы: «Менам киӧй ӧмӧй оз вермы отсавны? Талун тэ аддзан, инас-ӧ Менам кывйӧй».

²⁴ Мӧисей петіс войтырыс дінӧ да висьталіс Господьлысь кывъяссӧ. Войтырлӧн юрнуӧдысьяс пӧвстысь чукӧртіс сизимдас мортӧс да тшӧктіс налы сувтны вежа чом гӧгӧр.

²⁵ Господь лэччис кымӧр пытшкын да сёрнитіс Мӧисейкӧд, сэсся Мӧисей вылысь Ловсӧ юкис да сетіс сизимдаснан юрнуӧдысьыслы. Кор Лолыс лэччис юрнуӧдысьяс вылӧ, найӧ кутісны пророкавны. Но бӧрынджык найӧ эз нин пророкавны.

²⁶ Сизимдас юрнуӧдысь пӧвстысь кыкӧн, Элдад да Медад, вӧліны асланыс чомъяс дорын, но Лолыс лэччис тшӧтш на вылӧ, и найӧ кутісны пророкавны. Найӧ вӧліны тшӧтш бӧрйӧмаяс, сӧмын вежа чом дорӧ эз петавны.

²⁷ Мӧисей дорӧ котӧртіс зон да шуис: «Элдад да Медад пророкалӧны асланыс чомъяс дорын».

²⁸ Навлӧн Исус пиыс, коді том кадсяньыс отсасис Мӧисейлы, шуис: «Мӧисей ыджыдӧй, ӧлӧд найӧс».

²⁹ Но Мӧисей шуис сылы: «Ме вӧсна-ӧ тэ тӧждысян? Ме эськӧ кӧсйи, медым Господь став Аслас войтыр вылӧ мӧдӧдіс Ассьыс Ловсӧ, и ставныс вӧліны пророкъясӧн!»

³⁰ Сэсся Мӧисей да израильса юрнуӧдысьяс бӧр мунісны асланыс чомъяс дорӧ.

³¹ Господь кыпӧдіс тӧвныр, и саридзсянь тӧвнырыс вайис квайтпалич пӧткаясӧс. Пӧткаясыс пуксялісны чомъяс гӧгӧр кык гырддза судта. Чомъяссянь лунтыр мунан ылнаӧдз быдлаын вӧлі пӧтка.

³² Войтырыс босьтчис чукӧртны квайтпалич пӧткаяс. Чукӧртісны лунтыр, войбыд да нӧшта на мӧд луннас. Быдӧн чукӧртіс дас ыджыд мешӧк да унджык на. Чомъяс гӧгӧр быдлаын косьтісны пӧтка яй.

³³ Сёйиганыс, кор яйыс вӧлі воманыс на, ӧзйис Господьлӧн скӧрлуныс. Господь чорыда мыждіс войтырсӧ – унаӧн висьмисны да кулісны.

³⁴ Та вӧсна тайӧ местасӧ шуисны Киврот-Хаттаава, ӧд сэтчӧ дзебисны горшасьысь йӧзӧс.

³⁵ Киврот-Хаттаавасянь войтыр мӧдӧдчис Хацеротӧ. Сэтчӧ найӧ паськӧдісны чомъяснысӧ.