Лыд 10 - Коми Библия 2023

Кык эзысь труба

¹ Господь шуис Мӧисейлы:

² «Дор кык эзысь труба. На отсӧгӧн тэ кутан чуксавны войтырӧс, медым чукӧртчыны да петны туйӧ.

³ Кор кыкнан трубаыс лэдзас шысӧ, сэки став войтырыс мед чукӧртчас тэ дінӧ вежа чом пыранін дорӧ.

⁴ Кор сӧмын ӧти труба лэдзас шысӧ, сэки тэ дінӧ мед чукӧртчасны Израиль чужанкотыръяслӧн рӧдкутысьяс.

⁵ Войтырӧс кыпӧдан тутӧстӧм бӧрын асыввылӧ паськӧдчӧм чужанкотыръяс мед петасны туйӧ.

⁶ Мӧдысь тутӧстӧм бӧрын лунвылӧ паськӧдчӧм чужанкотыръяс мед петасны туйӧ. [Коймӧдысь тутӧстӧм бӧрын рытыввылӧ паськӧдчӧм чужанкотыръяс мед петасны туйӧ, и нёльӧдысь тутӧстӧм бӧрын войвылӧ паськӧдчӧм чужанкотыръяс мед петасны туйӧ.] Тутсӧмыс мед юргас туйӧ мӧдӧдчигчӧжныс.

⁷ Тшӧтш тутсӧй трубаясӧ, кор колӧ чукӧртны войтырӧс, но тутсӧй энӧ войтырӧс кыпӧдан шыӧн.

⁸ Трубаясӧ мед тутсасны попъяс, Ааронлӧн пияныс. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз.

⁹ Кор тіян муын вӧрӧг уськӧдчас тіян вылӧ, и ті петанныд тышӧ, тутсӧй трубаясӧ, и Господь, тіян Енныд, тӧд вылас уськӧдас тіянӧс да мездас тіянӧс вӧрӧг киысь.

¹⁰ Кор гажӧдчан лунъяс дырйи да выль тӧлысь пасйигӧн ваянныд сотан да бурасян висьяс, тутсӧй трубаясӧ, и тіян Енныд тӧд вылас уськӧдас тіянӧс. Ме – Господь, тіян Енныд».

Туйӧ петӧм

¹¹ Мӧд вонас мӧд тӧлысьлӧн кызьӧд лунӧ кымӧрыс кыпӧдчис вежа чом весьтысь,

¹² и Израиль пиян мӧдӧдчисны котыръясӧн Синай овтӧминысь. Кымӧрыс сувтіс Паран овтӧминӧ.

¹³ Тадзи найӧ медводдзаысь петісны туйӧ Господьлӧн тшӧктӧм серти, кыдзи вӧлі висьталӧма Мӧисей пыр.

¹⁴ Медводдзаӧн асланыс дӧрапас улын тышкайӧз моз петісны туйӧ Иуда чужанкотыр да сыкӧд орччӧн сувтлӧм чужанкотыръяс. Иуда чужанкотырӧс нуӧдіс Аминадавлӧн Наашон пиыс.

¹⁵ Иссакар чужанкотырӧс нуӧдіс Цуарлӧн Нафанаил пиыс.

¹⁶ Завулон чужанкотырӧс нуӧдіс Хелонлӧн Элиав пиыс.

¹⁷ Сэсся вежа чом разьӧм бӧрын петісны туйӧ Гирсон пиян да Мерари пиян, кодъяс нуисны вежа чомсӧ.

¹⁸ На бӧрся асланыс дӧрапас улын тышкайӧз моз петісны туйӧ Рувим чужанкотыр да сыкӧд орччӧн сувтлӧм чужанкотыръяс. Рувим чужанкотырӧс нуӧдіс Шедеурлӧн Элицур пиыс.

¹⁹ Симеон чужанкотырӧс нуӧдіс Цуришаддайлӧн Шелумиэл пиыс.

²⁰ Гад чужанкотырӧс нуӧдіс Регуэллӧн Эльясат пиыс.

²¹ Сэсся петісны туйӧ Кааф пиян, кодъяс новлӧдлісны вежаинса дозмук-кӧлуй. Налӧн вотӧдз вежа чомсӧ колӧ вӧлі сувтӧдны нин.

²² На бӧрся асланыс дӧрапас улын тышкайӧз моз петісны туйӧ Ефрем чужанкотыр да сыкӧд орччӧн сувтлӧм чужанкотыръяс. Ефрем чужанкотырӧс нуӧдіс Аммиудлӧн Элишам пиыс.

²³ Манассей чужанкотырӧс нуӧдіс Педацурлӧн Гамалиэл пиыс.

²⁴ Венямин чужанкотырӧс нуӧдіс Гидеонилӧн Авидан пиыс.

²⁵ Медбӧръяӧн асланыс дӧрапас улын тышкайӧз моз петісны туйӧ Дан чужанкотыр да сыкӧд орччӧн сувтлӧм чужанкотыръяс. Дан чужанкотырӧс нуӧдіс Аммишаддайлӧн Ахиэзер пиыс.

²⁶ Асир чужанкотырӧс нуӧдіс Окранлӧн Пагиэл пиыс.

²⁷ Неффалим чужанкотырӧс нуӧдіс Энанлӧн Ахир пиыс.

²⁸ Тадзи Израиль пиян тышкайӧз моз петлісны туйӧ.

²⁹ Мӧисей шуис Ховавлы, мадианса Регуэл тесьтыслӧн пилы: «Ми мӧдӧдчам сійӧ муас, мый Господь кӧсйысис сетны миянлы. Мунам миянкӧд, ми кутам тӧждысьны, мый тэныд бур лоас, ӧд Господь кӧсйысис Израильлы бур вӧчны».

³⁰ Но Ховав вочавидзис: «Ме ог мун. Ме муна аслам муӧ, аслам чужанінӧ».

³¹ «Эн эновт миянӧс! – корис Мӧисей. – Тэ тӧдан, кытчӧ чомъясӧн сувтлыны овтӧминын. Нуӧд миянӧс!

³² Тэ кӧ мунан миянкӧд, ми юксям тэкӧд сійӧ бурнас, мый сетас миянлы Господь».

³³ Господьлӧн керӧс дорысь мӧдӧдчӧм бӧрын Израиль войтыр мунісны куим лун чӧж. Господьлысь Йитӧд кудсӧ найӧ нуисны водзвыланыс, медым сійӧ петкӧдлас шойччанін.

³⁴ Луннас сувтанінысь мӧдӧдчигӧн Господьлӧн кымӧрыс вӧлі на весьтын.

³⁵ Кор Йитӧд кудсӧ босьтлісны нуны, Мӧисей горӧдліс: «Господьӧй, кыпӧдчы! Тэныд паныд сувтысьяс мед разаласны, Тэнӧ мустӧмтысьяс мед пышъясны Тэнад син водзысь!»

³⁶ Кор Йитӧд кудйыс сувтліс, Мӧисей шуліс: «Господьӧй, бӧр лок лыдтӧм-тшӧттӧм Израиль пияныд дінӧ!»