Лыд 1 - Коми Библия 2023

Израиль войтырӧс арталӧм-гижалӧм

¹ Синай овтӧминын, вежа чомйын, Господь сёрнитіс Мӧисейкӧд. Тайӧ вӧлі Египетысь петӧм бӧрын мӧд вонас, мӧд тӧлысьлӧн медводдза лунӧ. Господь шуис:

² «Арталӧй израильса став айуловсӧ да гижалӧй нимъяснас чужанкотыр да рӧд сертиныс.

³ Ааронкӧд ӧтвыв арталӧй кызь арӧса да ыджыдджык арлыда израильса айуловӧс, кодъяс вермӧны петны тышӧ. Гижалӧй найӧс тышкакотыръяс серти.

⁴ Тіянлы мед отсасясны чужанкотыръяслӧн рӧдкутысьяс, быд чужанкотырысь ӧти морт:

⁵ Рувим чужанкотырысь Шедеурлӧн Элицур пиыс,

⁶ Симеон чужанкотырысь Цуришаддайлӧн Шелумиэл пиыс,

⁷ Иуда чужанкотырысь Аминадавлӧн Наашон пиыс,

⁸ Иссакар чужанкотырысь Цуарлӧн Нафанаил пиыс,

⁹ Завулон чужанкотырысь Хелонлӧн Элиав пиыс,

¹⁰ Ӧсиплӧн Ефрем чужанкотырысь Аммиудлӧн Элишам пиыс, Манассей чужанкотырысь Педацурлӧн Гамалиэл пиыс,

¹¹ Венямин чужанкотырысь Гидеонилӧн Авидан пиыс,

¹² Дан чужанкотырысь Аммишаддайлӧн Ахиэзер пиыс,

¹³ Асир чужанкотырысь Окранлӧн Пагиэл пиыс,

¹⁴ Гад чужанкотырысь Регуэллӧн Эльясат пиыс,

¹⁵ Неффалим чужанкотырысь Энанлӧн Ахир пиыс.

¹⁶ Тайӧ бӧрйӧм айуловыс – чужанкотыръяслӧн юралысьяс да израильса тышкакотыръясӧн веськӧдлысьяс».

¹⁷ Мӧисей да Аарон босьтісны аскӧдныс тайӧ лыддьӧдлӧм йӧзсӧ

¹⁸ да мӧд тӧлысьлӧн медводдза лунӧ чукӧртісны став войтырсӧ. Арталӧма-гижалӧма вӧлі кызь арӧса да ыджыдджык арлыда айуловӧс чужанкотыр да рӧд сертиныс.

¹⁹ Мӧисей арталіс-гижаліс израильса айуловӧс Синай овтӧминын, кыдзи Господь тшӧктіс сылы.

²⁰ Израильлӧн медводдза чужысь Рувим чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

²¹ Рувим чужанкотырын вӧлі нелямын квайт сюрс витсё морт.

²² Симеон чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

²³ Симеон чужанкотырын вӧлі ветымын ӧкмыс сюрс куимсё морт.

²⁴ Гад чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

²⁵ Гад чужанкотырын вӧлі нелямын вит сюрс квайтсё ветымын морт.

²⁶ Иуда чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

²⁷ Иуда чужанкотырын вӧлі сизимдас нёль сюрс квайтсё морт.

²⁸ Иссакар чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

²⁹ Иссакар чужанкотырын вӧлі ветымын нёль сюрс нёльсё морт.

³⁰ Завулон чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

³¹ Завулон чужанкотырын вӧлі ветымын сизим сюрс нёльсё морт.

³² Гижалӧма вӧлі Ӧсип пиянлысь чужысьяссӧ. Ефрем чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

³³ Ефрем чужанкотырын вӧлі нелямын сюрс витсё морт.

³⁴ Манассей чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

³⁵ Манассей чужанкотырын вӧлі комын кык сюрс кыксё морт.

³⁶ Венямин чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

³⁷ Венямин чужанкотырын вӧлі комын вит сюрс нёльсё морт.

³⁸ Дан чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

³⁹ Дан чужанкотырын вӧлі квайтымын кык сюрс сизимсё морт.

⁴⁰ Асир чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

⁴¹ Асир чужанкотырын вӧлі нелямын ӧти сюрс витсё морт.

⁴² Неффалим чужанкотырысь кызь арӧса да ыджыдджык арлыда айуловӧс, кодъяс вермисны петны тышӧ, вӧлі арталӧма-гижалӧма нимъяснас рӧд да котыр сертиныс.

⁴³ Неффалим чужанкотырын вӧлі ветымын куим сюрс нёльсё морт.

⁴⁴ Та мында мортӧс арталісны Мӧисей, Аарон да израильса чужанкотыръяслӧн дас кык юралысьыс.

⁴⁵ Кызь арӧса да ыджыдджык арлыда Израиль пиянӧс, кодъяс вермисны петны тышӧ, вӧлі гижалӧма рӧд сертиныс.

⁴⁶ Ставнас вӧлі арталӧма квайтсё куим сюрс витсё ветымын мортӧс.

⁴⁷ Левий чужанкотырӧс эз артавны,

⁴⁸ ӧд Господь вӧлі шуӧма Мӧисейлы:

⁴⁹ «Левий чужанкотырысь айуловӧс эн артав, Израиль пиян лыдӧ найӧс эн пырт.

⁵⁰ Левитъяслы тшӧкты тӧждысьны вежа чом вӧсна да вежаинса став дозмук-кӧлуй вӧсна. Найӧ мед новлӧдласны вежа чомсӧ да вежаинса став дозмук-кӧлуйсӧ. Найӧ мед кесъяласны вежа чомйын, и ассьыныс чомъяссӧ мед сувтӧдасны вежа чом гӧгӧр.

⁵¹ Левитъяс мед разясны вежа чомсӧ, кор сійӧс ковмас вуджӧдны. А Израиль войтырлӧн выль местаӧ локтӧм бӧрын левитъяс мед бара сувтӧдасны сійӧс. Бокыса морт кӧ матыстчас вежа чом дорӧ, сійӧс лоӧ виӧма.

⁵² Израиль пиян мед сувтӧдасны чомъяснысӧ тышкакотыръяс моз асланыс дӧрапас улӧ.

⁵³ А левитъяс ассьыныс чомъяссӧ мед сувтӧдасны вежа чом гӧгӧр, медым Израиль войтырӧс эз су Господьлӧн скӧрлуныс. Левитъяс мед видзӧдасны вежа чом бӧрся».

⁵⁴ Израиль пиян ставсӧ вӧчисны сідзи, кыдзи Господь тшӧктіс Мӧисейлы.