Лука 9 - Коми Библия 2023

Велӧдчысьясӧс мӧдӧдӧм

¹ Исус корис дас кыкнан велӧдчысьсӧ да сетіс налы вын вӧтлавны пеж ловъясӧс да бурдӧдавны йӧзӧс висьӧмъясысь.

² Сійӧ мӧдӧдіс найӧс юӧртны Енлӧн Юралӧм йылысь да бурдӧдавны висьысьясӧс.

³ Исус шуис налы: «Туяныд нинӧм энӧ босьтӧй, весиг бедь, ноп, нянь, эзысь да вежан паськӧм.

⁴ Кутшӧм керкаӧ пыранныд, водзӧ мунтӧдзныд олӧй сэні.

⁵ Оз кӧ сибӧдны тіянӧс, сэки карсьыс петіганыд пыркӧдӧй коксьыныд буссӧ. Тайӧ лоӧ найӧс ӧлӧдӧм».

⁶ Велӧдчысьяс петісны туйӧ. Найӧ ветлӧдлісны сиктысь сиктӧ, быдлаын висьтавлісны Бур Юӧр да бурдӧдалісны висьысьясӧс.

Ирӧд юасьӧ Исус йылысь

⁷ Ирӧд ӧксы кор кыліс став лоӧмторйыс йылысь, шӧйӧвошис. Ӧтияс сёрнитісны, Пыртысь Иоан пӧ ловзьӧма,

⁸ мӧдъяс шуалісны, Илля пӧ локтӧма, кодсюрӧ шуисны, важ пророкъясысь пӧ ӧти ловзьӧма.

⁹ Ирӧд шуис: «Иоанлысь юрсӧ ме керышті. Но коді нӧ тайӧ мортыс, код йылысь татшӧмторъяс кыла?» Ирӧд ёна кӧсйис аддзывны Исусӧс.

Вит сюрсӧс вердӧм

¹⁰ Локтӧм бӧраныс апостолъяс висьталісны Исуслы, мый найӧ вӧчисны. Исус босьтіс найӧс Аскӧдыс, медым олыштны накӧд ас кежаныс Випсаида карбердса овтӧминын.

¹¹ Та йылысь тӧдмалӧм бӧрын йӧзыс мӧдӧдчисны Исус бӧрся. Сійӧ сибӧдіс найӧс, сёрнитіс накӧд Енлӧн Юралӧм йылысь да бурдӧдаліс висьысьясӧс.

¹² Луныс нёровтчис рытлань. Исус дінӧ матыстчисны дас кыкнан велӧдчысьыс да шуисны: «Ми тані овтӧминынӧсь. Ысты йӧзсӧ вой кежлас матігӧгӧр сикт-грездӧ, мед нуръясьыштасны».

¹³ Исус шуис: «Ті сетӧй налы сёянсӧ». Найӧ воча шуисны: «Миян сӧмын вит нянь да кык чери. Ми ӧмӧй вермам ньӧбны та мындаыслы сёянсӧ?»

¹⁴ Сэні вӧлі вит сюрс гӧгӧр морт. Исус шуис велӧдчысьясыслы: «Пуксьӧдалӧй йӧзсӧ чукӧръясӧ, морт ветымынӧн».

¹⁵ Найӧ тадзи и вӧчисны, пуксьӧдалісны ставнысӧ.

¹⁶ Исус босьтіс вит няньсӧ да кык черисӧ, видзӧдліс енэжӧ да Енмӧс аттьӧалӧмӧн чегъяліс няньсӧ, сэсся сетіс велӧдчысьясыслы. Велӧдчысьяс разӧдісны йӧзыслы.

¹⁷ Ставныс пӧттӧдзныс сёйисны, а сёян коляссӧ дас кык куд тыр чукӧртісны.

Петыр шуӧ Исусӧс Кристосӧн

¹⁸ Ӧтчыд Исус кевмысис йӧзтӧминын. Сыкӧд тшӧтш сэні вӧліны велӧдчысьясыс. Исус юаліс налысь: «Код туйӧ йӧзыс пуктӧны Менӧ?»

¹⁹ Найӧ вочавидзисны: «Ӧтияс шуӧны, Пыртысь Иоан пӧ, мӧдъяс шуӧны, Илля пӧ, кодсюрӧ шуӧны, важ пророкъясысь пӧ ӧти ловзьӧма».

²⁰ Исус юаліс: «Код туйӧ ті Менӧ пуктанныд?» Петыр вочавидзис: «Тэ – Кристос, Енлӧн Мавтыштӧмаыс».

²¹ Исус чорыда ӧлӧдіс найӧс, мед эз висьтавны та йылысь мукӧдлы.

²² Сэсся шуис: «Морт Пилы уна сьӧкыд ковмас нуны. Юрнуӧдысьяс, аркирейяс да Индӧдӧ велӧдысьяс ӧтдортасны Сійӧс. Сійӧс виасны, но коймӧд луннас Сійӧ ловзяс».

Исус бӧрся мунӧм

²³ Исус шуис ставныслы: «Коді кӧсйӧ мунны Ме бӧрся, мед вунӧдас асьсӧ, мед босьтас ассьыс крестсӧ да локтас Ме бӧрся.

²⁴ Коді кӧсйӧ видзны ассьыс олӧмсӧ, воштас сійӧс. Ме вӧсна олӧмсӧ воштысь видзас сійӧс.

²⁵ Лоас-ӧ мортыслы бур, босьтас кӧ аслыс став муюгыдсӧ, а асьсӧ бырӧдас да олӧмсӧ воштас?

²⁶ Коді яндысяс Меысь да Менам кывъясысь, сыысь яндысяс Морт Пи, кор локтас Аслас дзирдлунӧн, Батьыслӧн да вежа анделъяслӧн дзирдлунӧн.

²⁷ Збыльысь висьтала тіянлы: кодсюрӧ тані сулалысьяс пиысь кувтӧдзныс на аддзасны Енлысь Юралӧмсӧ».

Исус петкӧдчӧ Аслас дзирдлунӧн

²⁸ Тайӧ сёрни бӧрас лун кӧкъямыс мысти Исус босьтіс Аскӧдыс Петырӧс, Иоанӧс, Яковӧс да кайис накӧд керӧсӧ кевмысьны.

²⁹ Кевмысигас Исуслӧн чужӧмыс вежсис, паськӧмыс лои дзирдалана еджыд.

³⁰ Сэки велӧдчысьяс аддзисны кык мортӧс: Мӧисейӧс да Илляӧс. Найӧ сёрнитісны Исускӧд.

³¹ На вылын вӧлі Енлӧн дзирдлуныс. Найӧ сёрнитісны Исускӧд Сылӧн мунӧм йылысь, мый збыльмас Ерусалимын.

³² Петыр ёртъясыскӧд чорыда узисны. Садьмӧм бӧраныс аддзисны Исуслысь дзирдлунсӧ да Сыкӧд сулалысь кык мортӧс.

³³ Кор тайӧ кык мортыс кутісны ылыстчыны Исусысь, Петыр шуис Исуслы: «Велӧдысьӧй, миянлы тані лӧсьыд, сувтӧдам куим чом: Тэныд, Мӧисейлы да Иллялы». Петыр ачыс эз гӧгӧрво, мый висьталіс.

³⁴ Петырлӧн сёрнитігкості локтіс кымӧр да вевттис найӧс. Велӧдчысьяс ёна повзисны.

³⁵ Кымӧрсянь кыліс гӧлӧс шы: «Тайӧ Менам муса Пиӧй, Сійӧс кывзӧй».

³⁶ Тайӧ кывъяс бӧрас найӧ аддзисны сӧмын Исусӧс. Велӧдчысьяс сійӧ кадас некодлы эз висьтавны аддзывлӧм йывсьыс, найӧ чӧв олісны та йылысь.

Зонка пытшкысь пеж лолӧс вӧтлӧм

³⁷ Аскинас керӧсысь лэччиганыс Исусӧс паныдаліс уна йӧз.

³⁸ Йӧз пӧвстысь ӧти горӧдіс: «Велӧдысьӧй, кора Тэнӧ, видзӧдлы менсьым пиӧс! Сійӧ менам ӧтка пи.

³⁹ Пеж лов топӧдлӧ сійӧс. Сэки сійӧ лёкысь горзӧ, чашйысьӧ, да вомсьыс быг петӧ. Ёна песӧм бӧрын пеж лов вӧлисти эновтӧ сійӧс.

⁴⁰ Ме кори Тэнсьыд велӧдчысьястӧ вӧтлыны пеж ловсӧ, но найӧ эз вермыны».

⁴¹ Исус шуис: «Эскытӧм-ылалӧм йӧз! Дыр-ӧ на Меным овнысӧ тіянкӧд? Дыр-ӧ на Меным видзӧдны тіянӧс? Вайӧд татчӧ питӧ».

⁴² Кор зонка вӧлі матыстчӧ Исус дінӧ, пеж лов шыбитіс зонкаӧс муас да кутіс песлӧдлыны. Исус ӧлӧдіс пеж лолӧс, бурдӧдіс зонкаӧс да сетіс сійӧс батьыслы.

⁴³ Ставнысӧ шензьӧдіс Енлӧн ыджыд выныс. Йӧзыс шензисны Исуслӧн уджъясысь. Сэки Сійӧ шуис велӧдчысьясыслы:

⁴⁴ «Пель саяныд сюркнялӧй Менсьым кывъясӧс: Морт Пиӧс сетасны йӧзлӧн киӧ».

⁴⁵ Велӧдчысьяс эз тӧдны, мый йылысь Исус висьталӧ, Сылӧн кывъясыс вӧліны налы пӧдсаӧсь. Найӧ эз гӧгӧрвоны Сійӧс, а юавнысӧ полісны.

Коді ыджыдджык?

⁴⁶ Велӧдчысьяс костын чужис вен, коді на пиысь ыджыдджыкыс.

⁴⁷ Налысь мӧвпъяссӧ тӧдӧмӧн Исус босьтіс кагаӧс да сувтӧдіс сійӧс Аскӧдыс орччӧн.

⁴⁸ Велӧдчысьясыслы шуис: «Коді Менам ним вӧсна сибӧдӧ тайӧ кагасӧ, сійӧ сибӧдӧ Менӧ. А Менӧ сибӧдысь сибӧдӧ Менӧ Мӧдӧдысьӧс. Медся ичӧтыс тіян пиысь лоас медыджыдӧн».

⁴⁹ Сэки Иоан шуис: «Велӧдысьӧй, ми аддзылім мортӧс, сійӧ Тэнад нимӧн пеж ловъясӧс вӧтлалӧ. Ми ӧлӧдім сійӧс, ӧд сійӧ абу миян пӧвстысь».

⁵⁰ Исус шуис: «Энӧ ӧлӧдӧй. Коді абу тіянлы паныд, сійӧ тіян дор».

Исусӧс оз сибӧдны Самарияын

⁵¹ Кор матыстчис Исусӧс енэжӧ босьтан луныс, Сійӧ шуис мунны Ерусалимӧ.

⁵² Водзвылас Сійӧ ыстіс юӧртысьясӧс. Найӧ мунісны самарияса сиктӧ, медым ставсӧ лӧсьӧдны Исус локтігкежлӧ.

⁵³ Сэтчӧс олысьяс эз сибӧдны Исусӧс, ӧд Сійӧ вӧлі Ерусалимӧ мунысь.

⁵⁴ Яков да Иоан – Исуслӧн велӧдчысьясыс – тайӧс кылӧм бӧрын шуисны: «Господьӧй, кӧсъян кӧ, ми би корам енэжсяньыс, мед бырӧдны найӧс? Буретш тадзи Илля вӧчліс».

⁵⁵ Велӧдчысьяслань бергӧдчӧмӧн Исус ӧлӧдіс найӧс. Сійӧ шуис: «Ті онӧ тӧдӧй, мыйсяма лов тіян пытшкын.

⁵⁶ Морт Пи эз лок бырӧдны мортлысь олӧмсӧ, Сійӧ локтіс мездыны». Сэсся найӧ мунісны мӧд сиктӧ.

Лок Ме бӧрся!

⁵⁷ Муніганыс ӧти морт шуис Исуслы: «Господьӧй, ме быдлаӧ Тэ бӧрся муна».

⁵⁸ Исус шуис сылы: «Ручьяслӧн эмӧсь пырмӧсъяс, и енэжвыв лэбачьяслӧн эмӧсь позъяс, сӧмын Морт Пилӧн шойччаніныс абу».

⁵⁹ Мӧдлы Исус шуис: «Лок Ме бӧрся». Сійӧ воча шуис: «Господьӧй, лэдз меным медводз батьӧс дзебны».

⁶⁰ Исус шуис сылы: «Кулӧмаяс мед дзебасны кулӧмаяснысӧ. Тэ мун да юӧрт Енлысь Юралӧмсӧ».

⁶¹ Нӧшта ӧти морт шуис: «Господьӧй, ме муна Тэ бӧрся, сӧмын лэдзлы менӧ колльӧдчыны гортсаяскӧд».

⁶² Сылы Исус вочавидзис: «Гӧрйӧ кутчысьысь кӧ видзӧдӧ бӧрлань, сійӧ оз шогмы пырны Енлӧн Юраланінӧ».