Лука 7 - Коми Библия 2023

Сё тышкамортӧн веськӧдлысь корӧ Исусӧс отсавны

¹ Йӧзкӧд сёрнисӧ помалӧм бӧрын Исус мӧдӧдчис Капернаум карӧ.

² Сэні оліс сё тышкамортӧн веськӧдлысь, кодлӧн кесйӧгыс вӧлі куланвыйын. Веськӧдлысьлы сійӧ вӧлі зэв дона.

³ Исус йылысь кылӧм бӧрын веськӧдлысь мӧдӧдіс иудейяслысь юрнуӧдысьясӧс корны Сійӧс, медым локтас да бурдӧдас кесйӧгсӧ.

⁴ Найӧ локтісны Исус дінӧ да сьӧлӧмсяньныс корисны Сійӧс: «Тайӧ бур мортыслы колӧ отсавны.

⁵ Сійӧ радейтӧ войтырнымӧс. Буретш сійӧ лэптіс миянлы синагога».

⁶ Исус муніс накӧд. Керка дорас вотӧдз на Сылы паныдасисны сё тышкамортӧн веськӧдлысьлӧн ёртъясыс. Сійӧ вӧлі мӧдӧдӧма найӧс висьтавны: «Господьӧй, эн мудзты Асьтӧ. Ме ог сулав сы доныс, медым Тэ пырин менам керка вевт улӧ.

⁷ Ачымӧс эг лыддьы шогманаӧн локны Тэ дінӧ. Сӧмын кыв шу, и кесйӧгӧй бурдас.

⁸ Ме ачым киподувса морт, но и менам кипод улын эмӧсь йӧз. Ӧтилы шуа: ”Мун”, и сійӧ мунӧ. Мӧдлы тшӧкта локны, и сійӧ локтӧ. Кесйӧглы шуа: ”Вӧч тайӧс”, и сійӧ вӧчӧ».

⁹ Тайӧ кывъясыс шензьӧдісны Исусӧс. Сійӧ бергӧдчис да шуис Ас бӧрся мунысьяслы: «Висьтала тіянлы: татшӧм ыджыд эскӧмсӧ Ме весиг Израильысь эг аддзыв».

¹⁰ Керкаӧ пырӧм бӧраныс веськӧдлысьлӧн ёртъясыс аддзисны: кесйӧгыс вӧлі бурдӧма.

Дӧвалысь писӧ ловзьӧдӧм

¹¹ Регыд мысти Исус муніс Наин карӧ, Сыкӧд тшӧтш мунісны Сылӧн велӧдчысьяс да уна мукӧд йӧз.

¹² Исус матыстчис карса дзиръя дорӧ. Сэтысь вӧлі петкӧдӧны кулӧм мортӧс, дӧвалысь ӧтка писӧ. Уна йӧз анькӧд тшӧтш петіс карсьыс.

¹³ Господьлӧн сьӧлӧмыс нормис дӧва вӧсна, Сійӧ шуис аньлы: «Эн бӧрд».

¹⁴ Сэсся матыстчис да инмӧдчис гортъяс, нуысьяс сувтісны. Исус шуис: «Зонмӧй, тэныд шуа: чеччы!»

¹⁵ Кулӧм морт пуксис да пондіс сёрнитны. Сэки Исус сетіс сійӧс мамыслы.

¹⁶ Ставнысӧ полӧм босьтіс. Енмӧс ошкигтыр шуалісны: «Ыджыд пророк миян пӧвстын! Ен локтіс отсавны Аслас войтырлы!»

¹⁷ Татшӧм сёрниыс Исус йылысь паськаліс Иудея му пасьтала да быдлаын матігӧгӧрас.

Пыртысь Иоанлӧн юалӧм

¹⁸ Иоанлӧн велӧдчысьясыс висьталісны став йывсьыс велӧдысьныслы.

¹⁹ Иоан корис ас дінас на пиысь кыкӧс да мӧдӧдіс найӧс Исус дінӧ юавны, збыльысь-ӧ Исус сійӧ, кодлы колӧ локнысӧ, али налы мӧдӧс виччысьны.

²⁰ Исус дінӧ локтӧм бӧрын найӧ шуисны: «Пыртысь Иоан мӧдӧдіс миянӧс Тэ дінӧ юавны, Тэ-ӧ сійӧ, кодлы колӧ локнысӧ, али колӧ-ӧ миянлы мӧдӧс виччысьны».

²¹ Буретш тайӧ кадӧ Исус унаӧс бурдӧдіс висьӧм-вермытӧмысь, вӧтліс пеж ловъясӧс, синтӧмъяслысь синсӧ восьтіс.

²² Исус вочавидзис: «Мунӧй, висьталӧй Иоанлы, мый аддзанныд да кыланныд: – Синтӧмъяс аддзӧны, коктӧмъяс ветлӧны, проказаысь сӧстӧммӧны, пельтӧмъяс кылӧны, кулӧмаяс ловзьӧны, коньӧръяслы Бур Юӧр висьталӧны.

²³ Шуда сійӧ, коді оз ӧтдортчы Меысь».

Исус висьталӧ Иоан йылысь

²⁴ Кор Иоанлӧн велӧдчысьясыс мунісны, Исус пондіс висьтавны йӧзыслы Иоан йылысь: «Мый видзӧдны ветлінныд овтӧминас? Тӧлӧн вӧрӧдан идзас-ӧ?

²⁵ Мый видзӧдны ветлінныд? Мича да озыр паськӧма мортӧс-ӧ? Татшӧм паськӧма да лышкыда олысь йӧзыс олӧны ӧксы оланінъясын.

²⁶ Кодӧс видзӧдны ветлінныд? Пророкӧс-ӧ? Шуа тіянлы: ті аддзылінныд пророкысь ыджыдӧс.

²⁷ Сы йылысь гижӧма: – Ыста Ассьым юӧртысьӧс Тэ водзвылын, сійӧ Тэныд туй дасьтас.

²⁸ Висьтала тіянлы: му вылын чужысь пророкъясысь эз вӧвлы Пыртысь Иоанысь ыджыдджыкыс, но Енлӧн Юраланінын медічӧтыс сы дорысь ыджыдджык.

²⁹ Иоанӧс кывзӧм бӧрын став йӧзыс, весиг вот перйысьяс, эскисны Ен веськыдлунӧ да пыртчисны Иоан пыртӧмӧн.

³⁰ А фарисейяс Индӧдӧ велӧдысьяскӧд паныд сувтісны Ен кӧсйӧмлы да эз пыртчыны Иоан пыртӧмӧн».

³¹ Господь шуис: «Кодкӧд Ме ӧткодяла ӧнія олысьясӧс? Код кодьӧсь найӧ?

³² Найӧ изэрд вылын пукалысь челядь кодьӧсь, кодъяс ӧта-мӧдныслы шуалӧны: ”Ми ворсім тіянлы пӧлянӧн, а ті энӧ йӧктӧй. Ми сьылім тіянлы бӧрдӧдчанкывъяс, а ті энӧ бӧрдӧй”.

³³ Пыртысь Иоан локтіс, нянь оз сёй, вина оз ю, и ті шуанныд, сы пытшкын пӧ пеж лов.

³⁴ Морт Пи локтіс, сёйӧ-юӧ, Сы йылысь шуанныд, рушку тыртысь да вина юысь пӧ, вот перйысьяскӧд да мыжаяскӧд ёртасьысь пӧ.

³⁵ Мывкыдлунсӧ пыдди пуктӧны мывкыдлуныслӧн челядь».

Исус фарисей ордын

³⁶ Ӧти фарисей корис Исусӧс гортас сёйны. Исус пырис фарисей керкаӧ да пуксис.

³⁷ Та йылысь тӧдмаліс сійӧ карас олысь мыжа ань. Сійӧ вайис вальді дозйын чӧскыд дука вый.

³⁸ Исуслӧн кок дорӧ копыртчӧмӧн сійӧ бӧрдіс, сылӧн синваыс визувтіс Исуслы кок вылас. Сійӧ чышкаліс Исуслысь коксӧ аслас юрсиӧн да окалігмоз мавтіс выйӧн.

³⁹ Исусӧс корысь фарисей аддзис тайӧс да мӧвпыштіс: «Вӧлі кӧ тайӧ Мортыс пророк, тӧдіс эськӧ, мыйсяма ань инмӧдчӧ Сы дінӧ. Тайӧ аньыс ӧд мыжа».

⁴⁰ Фарисейлань бергӧдчӧмӧн Исус шуис: «Симон, Ме тэныд ӧтитор кӧсъя висьтавны». «Висьтав, Велӧдысь», – шуис мӧдыс.

⁴¹ Исус шуис: «Ӧти мортлы кыкӧн вӧліны уджйӧзаӧсь: ӧтиыс – витсё динар, мӧдыс – ветымын.

⁴² Мынтынысӧ найӧ эз вермыны, та вӧсна тайӧ мортыс шуис вунӧдны кыкнанныслысь уджйӧзсӧ. Висьтав, кодныс ёнджыка кутас радейтны сійӧс?»

⁴³ Симон вочавидзис: «Чайта, унджык уджйӧзаыс». Исус шуис сылы: «Тэ веськыда мӧвпалан».

⁴⁴ Аньлань бергӧдчӧмӧн Исус шуис Симонлы: «Аддзан-ӧ тайӧ аньсӧ? Ме локті тэ ордӧ, да тэ Меным ватор эн сет кокӧс мыськыны, а сійӧ синванас киськаліс Менсьым кокӧс да юрсинас чышкаліс.

⁴⁵ Тэ эн окышт Менӧ, а сійӧ локтӧмсяньыс эз на дугдыв окавны кокӧс.

⁴⁶ Тэ Менсьым юрӧс выйнад эн мавтышт, а сійӧ чӧскыд дука выйнас кокӧс мавтіс.

⁴⁷ Висьтала тэныд, мыйла сійӧ ёна радейтӧ – уна мыж сылысь прӧститӧма да. Кодлысь этша прӧститӧма, сійӧ этша радейтӧ».

⁴⁸ Сэсся Исус шуис аньлы: «Прӧститӧма тэнсьыд мыжъястӧ».

⁴⁹ Сыкӧд сёйысьяс сёрнитісны ас костаныс: «Коді Сійӧ, мый весиг мыжъяс прӧститӧ?»

⁵⁰ Исус шуис аньлы: «Эскӧмыд мездіс тэнӧ. Мун повтӧг».