Лука 5 - Коми Библия 2023

Медводдза велӧдчысьяс

¹ Ӧтчыд Исус сулаліс Генесарет ты дорын. Сійӧс кытшалісны йӧз, мед кывзыны Енлысь кывсӧ.

² Вадорысь Исус аддзис кык пыж. Чери кыйысьяс чеччисны пыжъясысь да мыськалісны тывъяснысӧ.

³ Исус пуксис Симон пыжӧ да корис сійӧс йӧткыштчыны вадорсьыс. Пыжын пукалӧмӧн Исус велӧдіс йӧзсӧ.

⁴ Велӧднысӧ помалӧм бӧрын Исус шуис Симонлы: «Сын джуджыдінас. Сэтчӧ чӧвтӧй тывъяснытӧ».

⁵ Симон воча шуис: «Велӧдысьӧй, ми войбыд мырсим, весиг ӧти чери эз шед, но Тэнад тшӧктӧм серти чӧвта».

⁶ Тывсӧ чӧвтлӧм бӧрын тыв косясьлымӧн чериыс шеді.

⁷ Сэки кинас ӧвтыштісны мӧд пыжын пукалысь ёртъяслы, корисны отсӧг вылӧ. Найӧ локтісны, сэсся кыкнан пыжсӧ вӧянвыйӧдзыс тыртісны чериӧн.

⁸ Тайӧс аддзӧм бӧрын Симон-Петыр уськӧдчис Исус водзӧ да шуис: «Господьӧй, мун ме дінысь! Ме мыжа морт».

^9-10 Симонӧс да сыкӧд вӧлысьясӧс, тшӧтш сылысь ёртъяссӧ, Зеведейлысь Яков да Иоан пиянӧс, шемӧсмӧдіс та мында чери шедӧмыс. Исус шуис Симонлы: «Эн пов. Ӧнісянь пондан кыйны йӧзӧс».

¹¹ Пыжъяснысӧ вадорӧ кыскӧм бӧрын найӧ колисны ставсӧ да мунісны Исус бӧрся.

Проказаӧн висьысьӧс бурдӧдӧм

¹² Ӧти карын локтіс Исус дінӧ проказаӧн висьысь, сылӧн кучикыс дзоньнас уляліс. Сійӧ кымынь уськӧдчис Исус водзӧ да шуис: «Господьӧй, кӧсъян кӧ, верман менӧ сӧстӧммӧдны».

¹³ Исус нюжӧдіс кисӧ, инмӧдчыліс сы дінӧ да шуис: «Кӧсъя. Сӧстӧммы». Висьысьлӧн дойясыс дзик пыр бырисны.

¹⁴ Исус ӧлӧдіс сійӧс мукӧдлы та йылысь висьталӧмысь да тшӧктіс: «Мун, петкӧдлы асьтӧ поплы, сэсся Мӧисей тшӧктӧм серти аслад сӧстӧммӧмысь вай вись. Тадзи тӧдмаласны тэнад бурдӧм йылысь».

¹⁵ Исус йылысь сёрниыс паськаліс пыр ёнджыка. Унасьыс-уна йӧз воліс кывзыны Сійӧс да бурдӧдчыны.

¹⁶ Ачыс Исус тшӧкыда мунлывліс овтӧминӧ да сэні кевмысьліс.

Вӧрзьӧдчыны вермытӧмӧс бурдӧдӧм

¹⁷ Ӧтчыд Исуслӧн велӧдігӧн сэні пукалісны фарисейяс да Индӧдӧ велӧдысьяс. Найӧ вӧлі локтӧмаӧсь Галилея да Иудея сиктъясысь, тшӧтш Ерусалим карысь. Исус бурдӧдаліс висьысьясӧс Господь вынӧн.

¹⁸ Кодъяскӧ сэтчӧ вольпасьнас вайисны вӧрзьӧдчыны вермытӧм мортӧс. Найӧ кӧсйисны пыртны сійӧс керкаӧ да пуктыны Исус водзӧ,

¹⁹ но уна йӧз вӧсна пыртнысӧ эз вермыны. Сэки кайисны керка вылӧ, разисны вевтсӧ да сэті лэдзисны висьысьӧс вольпасьнас Исус водзӧ.

²⁰ Налысь эскӧмсӧ аддзӧмӧн Исус шуис висьысьлы: «Мортӧй, тэнсьыд мыжъястӧ прӧститӧма».

²¹ Индӧдӧ велӧдысьяс да фарисейяс мӧвпалісны: «Коді тайӧ? Сійӧ Енмӧс омӧльтӧ. Ен кындзи вермас-ӧ кодкӧ прӧститны мыжъяс?»

²² Налысь мӧвпъяссӧ тӧдӧмӧн Исус шуис: «Мыйла ті мӧвпаланныд тадзи?

²³ Мый кокньыдджык шуны: ”Тэнсьыд мыжъястӧ прӧститӧма” либӧ ”Чеччы да ветлы”?

²⁴ Ӧні ті тӧдмаланныд, мый Морт Пи вермӧ прӧститны мыжъяс му вылын». Сэсся Исус шуис висьысьлы: «Тэныд шуа: чеччы, босьт вольпасьтӧ да мун гортад».

²⁵ Ставныслӧн син водзын сійӧ чеччис, босьтіс вольпасьсӧ да муніс гортас Енмӧс ошкигтырйи.

²⁶ Йӧзыс чуймисны да полӧмӧн тырисны. Найӧ ошкисны Енмӧс да шуалісны, вӧвлытӧмтор пӧ ми талун аддзылім.

Левийӧс корӧм

²⁷ Сэтысь мунігас Исус аддзис вотчукӧртанінысь Левий нима вот перйысьӧс. Исус шуис сылы: «Лок Ме бӧрся».

²⁸ Сійӧ чеччис, ставсӧ колис да муніс Исус бӧрся.

²⁹ Сэсся Левий корис Исусӧс ас ордас гажӧдчыны. Сэтчӧ локтісны тшӧтш вот перйысьяс да мукӧд корӧмаяс. Найӧ ставныс пукалісны ӧти пызан сайын.

³⁰ Фарисейяс да Индӧдӧ велӧдысьяс шуасисны Исуслӧн велӧдчысьяс вылӧ. Найӧ юалісны: «Мыйла ті сёянныд-юанныд вот перйысьяскӧд да мыжа йӧзкӧд?»

³¹ Исус вочавидзис налы: «Дзоньвидзалы бурдӧдысьыд оз ков, сійӧ висьысьлы колӧ.

³² Ме локті корны Ен дінӧ мыжаясӧс, эг веськыда олысьясӧс».

Видзалӧм йылысь юалӧм

³³ Найӧ шуисны Исуслы: «Мыйла нӧ Иоанлӧн велӧдчысьясыс тшӧкыда видзалӧны-кевмысьӧны, фарисейяслӧн велӧдчысьясыс тшӧтш, а Тэнад сёйӧны-юӧны?»

³⁴ Исус вочавидзис: «Верманныд-ӧ кӧлысь вылын верӧспукӧд гажӧдчысь ёртъяслы тшӧктыны видзавны?

³⁵ Воасны на сійӧ лунъясыс, кор колясны верӧспутӧг, сэки и видзаласны».

³⁶ Исус висьталіс налы велӧданвисьт: «Важ паськӧмтӧ оз дӧмны выль паськӧмысь вундӧм дӧмасӧн. Тадзи кӧ вӧчан, выльсӧ тшыкӧдан, и важас выль дӧмасыс оз туй.

³⁷ Выль винатӧ оз кисьтны важ кучик дозйӧ. Тадзи кӧ вӧчан, кучик дозйыс потас, и винаыс киссяс.

³⁸ Выль винатӧ кисьтӧны выль кучик дозйӧ. Сэки кыкнанныс дзонь колясны.

³⁹ Сулӧдӧм винатӧ юӧм бӧрын мортыс оз кӧсйы юны выль винатӧ, шуас, сулӧдӧмыс пӧ бурджык».