Лука 24 - Коми Библия 2023

Исуслӧн ловзьӧм

¹ Шойччан лун бӧрын водз асывнас дасьтӧм мавтасъясӧн аньяс локтісны дзебанінӧ. Накӧд вӧліны нӧшта мукӧдъяс.

² Найӧ аддзисны, мый изсӧ пыранінсьыс вӧлі вештӧма.

³ Пытшкас пырӧм бӧрын найӧ эз аддзыны Господь Исуслысь шойсӧ.

⁴ Аньяс шӧйӧвошисны. Виччысьтӧг на водзӧ сувтісны дзирдалан паськӧма кык морт.

⁵ Повзьӧмнысла аньяс копыртісны юрнысӧ. Тайӧ кык мортыс шуисны налы: «Мый ті корсянныд ловъяӧс кулӧмаяс пӧвстысь?

⁶ Сійӧ тані абу. Сійӧ ловзис. Уськӧдӧй тӧд выланыд, мый Сійӧ Галилеяын на шуліс тіянлы:

⁷ ”Талы колӧ лоны: Морт Пиӧс сетасны мыжаяс киӧ да тувъяласны крестӧ, но коймӧд луннас Сійӧ ловзяс”».

⁸ Сэки налы тӧд выланыс уси Исуслӧн висьтавлӧмыс.

⁹ Дзебанінысь локтӧм бӧрын аньяс висьталісны ставсӧ тайӧс дас ӧти велӧдчысьыслы, тшӧтш мукӧдыслы.

¹⁰ Тайӧ аньясыс вӧліны Магдала Марья, Йоанна, Яковлӧн Марья мамыс да нӧшта мукӧд аньяс на. Аньяс юӧртісны лоӧмтор йывсьыс апостолъяслы,

¹¹ но найӧ эз эскыны, чайтісны, мый лӧсьӧдлӧны.

¹² Петыр котӧрӧн уськӧдчис дзебанінӧ. Видзӧдліс пытшкас да аддзис сӧмын дзебан дӧраяссӧ. Петыр муніс сэтысь тайӧ лоӧмторсьыс ёна шензьӧмӧн.

Эммаус туй вылын

¹³ Сійӧ лунӧ Исуслӧн кык велӧдчысь мунісны Эммаус нима сиктӧ, мый вӧлі Ерусалимсянь дас верст ылнаын.

¹⁴ Найӧ сёрнитісны ас костаныс став тайӧ лоӧмтор йывсьыс.

¹⁵ Сёрнитіганыс Ачыс Исус матыстчис да пондіс мунны накӧд.

¹⁶ Но найӧ эз тӧдны Сійӧс, синнысӧ вӧлі пӧртӧма.

¹⁷ Исус юаліс налысь: «Мый йылысь сёрнитанныд, туй йӧз? Мыйла ті жугыльӧсь?»

¹⁸ На пиысь Клеоп нима вочавидзис: «Буракӧ, Тэ дзик ӧтнад Ерусалимӧ локтысьясысь он тӧд, мый сэні лои тайӧ лунъясӧ?»

¹⁹ Исус юаліс: «Мый лои?» Найӧ вочавидзисны: «Лёктор лои Назаретса Исускӧд. Тайӧ Мортыс Ен водзын да йӧз водзын кывнас и уджнас вӧлі вына пророк.

²⁰ Аркирейясным юралысьяскӧд мыждісны сійӧс да сетісны тувъявны крестӧ.

²¹ Ми лача кутім, мый Сійӧ мездас Израильӧс. Но тайӧ абу на ставыс. Талун коймӧд лун нин лоӧмторсяньыс.

²² Миян пиысь кодсюрӧ аньяс чуймӧдісны миянӧс. Водз асывнас найӧ ветлӧмаӧсь дзебанінас

²³ да шойсӧ абу аддзӧмаӧсь сэтысь. Локтӧм бӧрас висьталісны, аддзылім пӧ анделъясӧс. Анделъяс шуӧмаӧсь, Исусыд пӧ ловъя.

²⁴ Миян пиысь кодсюрӧ тшӧтш ветласны дзебанінас да аддзасны, мый аньясыд збыль вӧлӧм висьталӧны. Исустӧ сэтысь оз аддзыны».

²⁵ Исус шуис налы: «Гӧгӧрвотӧмӧсь тай ті. Сьӧкыда эсканныд пророк кывъясӧ.

²⁶ Эз-ӧ тайӧ сьӧкыдыс пыр ков мунны Кристослы да пырны Аслас дзирдлунӧ?»

²⁷ Мӧисей да пророк небӧгъяссянь Исус пондіс гӧгӧрвоӧдны налы став Гижӧдсьыс Ас йывсьыс шуӧмсӧ.

²⁸ Найӧ матыстчисны сиктлань, кытчӧ мунісны. Исус петкӧдліс, быттьӧ кӧсйӧ водзӧ мунны.

²⁹ Но найӧ эз лэдзны Сійӧс, шуалісны: «Кольччы миянкӧд. Луныс рытлань нёровтчӧ». Исус пырис накӧд керкаӧ да кольччис сэтчӧ.

³⁰ Сёйиганыс Исус босьтіс нянь, Енмӧс аттьӧалӧмӧн чегъяліс няньсӧ да сетіс налы.

³¹ Сэки налӧн синныс воссис, и найӧ тӧдісны Сійӧс. Тайӧ здукас Исус лои налы тыдавтӧм.

³² Сэки найӧ шуисны: «Эз-ӧ сьӧлӧмным ыпъяв, кор Сійӧ сёрнитіс миянкӧд туй вылын да гӧгӧрвоӧдіс миянлы Гижӧдсӧ?»

³³ Найӧ дзик пыр чеччисны да бӧр мунісны Ерусалимӧ. Сэні аддзисны дас ӧтикнан велӧдчысьсӧ да накӧд тшӧтш мукӧдсӧ.

³⁴ Велӧдчысьяс шуисны воӧмаяслы: «Господь збыльысь ловзьӧма! Сійӧ петкӧдчылӧма Симонлы».

³⁵ Тайӧ кыкыс висьталісны, мый лои туйын, да кыдзи тӧдісны Исусӧс нянь чегигас.

Исус петкӧдчӧ велӧдчысьясыслы

³⁶ Сёрнитіганыс Ачыс Исус сувтіс на шӧрӧ да шуис: «Лӧнь олӧм тіянлы!»

³⁷ Повзьӧмнысла найӧ мӧвпыштісны, мый тайӧ орт.

³⁸ Исус шуис налы: «Мый ті поланныд? Мый тіянӧс майшӧдлӧ?

³⁹ Видзӧдлӧй Менам ки-кок вылӧ, тайӧ Ме Ачым. Инмӧдчылӧй Ме дінӧ, и ті асьныд аддзанныд. Ловлӧн ӧд лы-яйыс абу, а Менам, со, эм».

⁴⁰ Тайӧс шуӧм бӧрын Сійӧ петкӧдліс налы Ассьыс ки-коксӧ.

⁴¹ Найӧ ёна шензисны, нимкодьнысла эз вермыны эскыны. Исус юаліс налысь: «Эм-ӧ тіян мыйкӧ сёйыштны?»

⁴² Сылы сетісны пӧжалӧм чери да малязі ма.

⁴³ Сійӧ босьтіс да налӧн син водзын сёйис.

⁴⁴ Сэсся Исус шуис налы: «Кор на Ме вӧлі тіянкӧд, Ме висьтавлі, мый инас ставыс, мый гижӧма Ме йылысь Мӧисей Индӧдын, пророк гижӧдъясын да псаломъясын».

⁴⁵ Сэки Исус восьтіс налысь вежӧрсӧ гӧгӧрвоны Гижӧдъяс.

⁴⁶ Сійӧ шуис налы: «Тадзи гижӧма: Кристослы колӧ мунны сьӧкыдыс пыр, кувны да коймӧд луннас ловзьыны,

⁴⁷ сэсся Ерусалимын и водзӧ быд войтырлы Сы нимӧн колӧ юӧртны мыжъясысь бергӧдчӧм да мыжъяс прӧститӧм йылысь.

⁴⁸ Ті асьныд ставсӧ кывлінныд да аддзылінныд.

⁴⁹ Ме мӧдӧда тіянлы Батьӧйлысь кӧсйысьӧмасӧ. Ті кольччӧй Ерусалимӧ, кытчӧдз тіян вылӧ оз лэччы енэжсянь вын».

Исус кыпӧдчӧ енэжӧ

⁵⁰ Исус петкӧдіс велӧдчысьяссӧ карсьыс, нуӧдіс Вифаниялань, сэсся кисӧ лэптӧмӧн бурсиис найӧс.

⁵¹ Бурсиигмозыс Сійӧ кутіс ылыстчыны наысь да кыпӧдчыны енэжӧ.

⁵² Найӧ муӧдзыс копыртчылісны Сылы, сэсся ёна нимкодясигтыр локтісны бӧр Ерусалимӧ.

⁵³ Енмӧс ошкӧмӧн найӧ пыр вӧліны крамынӧсь. Аминь.