Лука 20 - Коми Библия 2023

Исуслӧн вын йылысь юасьӧм

¹ Ӧтчыд Исус велӧдіс йӧзсӧ крамын, висьталіс налы Бур Юӧр. Сы дінӧ матыстчисны аркирейяс, Индӧдӧ велӧдысьяс да юрнуӧдысьяс.

² Найӧ юалісны: «Висьтав миянлы, кутшӧм вынӧн Тэ ставсӧ тайӧс вӧчан? Коді Тэнӧ пуктіс тайӧс вӧчнысӧ?»

³ Исус воча шуис: «Ме тшӧтш тіянлысь ӧтитор юала. Висьталӧй Меным,

⁴ Иоанлӧн пыртӧмыс вӧлі Енсянь али мортсянь?»

⁵ Найӧ ас костаныс сёрнитісны: «Шуам кӧ: ”Енсянь”, Сійӧ шуас: ”Мыйла сылы энӧ эскӧй?”

⁶ Шуам кӧ: ”Мортсянь”, йӧзыс изъяласны миянӧс, ӧд Иоанӧс збыльысь пророкӧ пуктӧны».

⁷ Найӧ вочавидзисны: «Огӧ тӧдӧй кодсянь».

⁸ Сэки Исус шуис: «Сідзкӧ, Ме тшӧтш ог висьтав, кутшӧм вынӧн ставсӧ тайӧс вӧча».

Виноград быдтысьяс йылысь велӧданвисьт

⁹ Сэсся Исус висьталіс йӧзыслы татшӧм велӧданвисьт: «Морт пуктас аслас йӧрӧ виноград, сэсся йӧрсӧ виноград быдтысьяслы кӧртымӧ сетас, ачыс дыр кад кежлӧ мунас.

¹⁰ Вотӧс чукӧртан кадӧ овмӧс кутысь мӧдӧдас кесйӧгсӧ босьтны чукӧртӧм вотӧсысь ассьыс пайсӧ. Виноград быдтысьяс нӧйтасны кесйӧгсӧ да вӧтласны сійӧс куш киӧн.

¹¹ Овмӧс кутысь мӧд кесйӧгӧс мӧдӧдас. Сійӧс тшӧтш нӧйтасны, лёкысь сераласны сы вылын да вӧтласны куш киӧн.

¹² Мӧдӧдас нӧшта коймӧдӧс. Сійӧс вирӧдз дойдаласны да шыбитасны ортсӧ.

¹³ Сэки овмӧс кутысь шуас: ”Мый вӧчны? Мӧдӧда ассьым муса пиӧс, гашкӧ, сыысь яндысясны”.

¹⁴ Писӧ аддзӧм бӧрын виноград быдтысьяс пондасны сёрнитны ас костаныс: ”Тайӧ мортыслы вуджас овмӧсыс. Мунам да виам сійӧс, медым овмӧсыс миянлы коляс”.

¹⁵ Найӧ петкӧдасны сійӧс виноград йӧрсьыс да виасны. Мый вӧчас накӧд овмӧс кутысь?

¹⁶ Сійӧ локтас, виноград быдтысьясӧс виас, а йӧрсӧ мукӧдлы сетас». Кывзысьяс шуисны: «Мед оз ло тадзи».

¹⁷ На вылӧ видзӧдлӧмӧн Исус шуис: «Мый йылысь висьталӧны Гижӧдысь тайӧ кывъясыс: – Изйыс, кодӧс ӧтдортісны керка лэптысьяс, лоис пельӧс изйӧн.

¹⁸ Коді усяс тайӧ изйыс вылӧ, сійӧ пасьмунас. Код вылӧ изйыс усяс, сійӧс лямӧдас».

¹⁹ Индӧдӧ велӧдысьяс да аркирейяс гӧгӧрвоисны, мый велӧданвисьтыс вӧлі на йылысь. Найӧ кӧсйисны босьтны Исусӧс, но полісны йӧзсьыс.

Вот мынтӧм йылысь

²⁰ Индӧдӧ велӧдысьяс да аркирейяс ӧтарӧ кыйӧдісны Исусӧс. Найӧ мӧдӧдісны Сы дінӧ веськыда олысьӧ пуксьысь наян йӧзӧс, медым кыйны Сійӧс сёрниас да сетны Сійӧс юралысь киӧ.

²¹ Локтӧмаяс шуисны Исуслы: «Велӧдысь, ми тӧдам, мый Тэ веськыда сёрнитан-велӧдан. Тэ он видзӧд морт вылӧ, а веськыда велӧдан Енлӧн туйӧ.

²² Висьтав, миянлы позьӧ вот мынтыны кесарлы?»

²³ Налысь наянлунсӧ казялӧмӧн Исус шуис: «Мыйла ті пыр кӧсъянныд кыйны Менӧ?

²⁴ Петкӧдлӧй Меным динартӧ. Кодлӧн сэні чужӧмыс-нимыс?» Найӧ вочавидзисны: «Кесарлӧн».

²⁵ Исус шуис налы: «Кесарлысь сетӧй кесарлы, а Енлысь – Енлы».

²⁶ Тадзи найӧ эз вермыны став йӧз дырйи кыйны Исусӧс. Сылӧн вочакывйысь найӧ чуймисны да ланьтісны.

Саддукейяс юасьӧны ловзьӧм йылысь

²⁷ Исус дінӧ локтісны саддукейяс, кодъяс шуӧны, ловзьӧмыс пӧ абу. Найӧ юалісны Исуслысь:

²⁸ «Велӧдысь, Мӧисей гижӧма, мый ныв-питӧм морт кӧ кулас, вокыслы колӧ босьтны кулӧм вокыслысь дӧвасӧ гӧтырӧ да нюжӧдны вокыслысь рӧдсӧ.

²⁹ Сизим вок вӧлі. Ыджыдыс гӧтрасис, сэсся куліс, ныв-пиыс сылӧн эз вӧв.

³⁰ Гӧтырсӧ мӧд вокыс босьтіс, сійӧ тшӧтш ныв-питӧг куліс.

³¹ Сэсся коймӧдыс босьтіс. Тадзи сизимнанныс кулісны ныв-питӧг.

³² Медбӧрын аньыс куліс.

³³ Ловзьӧм бӧрас кодлы сійӧ гӧтырӧн лоас, ӧд сизим верӧс сылӧн вӧлі?»

³⁴ Исус вочавидзис: «Тайӧ муюгыдас йӧзыс гӧтрасьӧны да верӧс сайӧ мунӧны.

³⁵ А найӧ, кодъяс шогманаӧсь ловзьыны да овны мӧдаръюгыдас, оз гӧтрасьны да верӧс сайӧ оз мунны.

³⁶ Найӧ оз нин кувны, а лоӧны анделъяс кодьӧсь. Найӧ Енлӧн ныв-пи, ӧд найӧс ловзьӧдӧма.

³⁷ Сотчысь лежнӧг дорын вӧвлӧмторйыс петкӧдлӧ, мый кулӧмаяс ловзьӧны. Мӧисей шуӧ Господьӧс Ӧвраамлӧн Енмӧн, Исааклӧн Енмӧн да Яковлӧн Енмӧн.

³⁸ Енмыс абу кулӧмаяслӧн Ен, Сійӧ ловъяяслӧн Ен. Сылы ставныс ловъяӧсь».

³⁹ Индӧдӧ велӧдысьясысь кодсюрӧ шуисны: «Велӧдысь, бура висьталін».

⁴⁰ Водзӧ найӧ эз нин лысьтны мыйкӧ юасьны Сылысь.

Давид пи йылысь юалӧм

⁴¹ Исус шуис налы: «Мыйла нӧ шуӧны, Кристос пӧ Давид пи?

⁴² Давид ачыс шуӧ Псалом небӧгын: – Господь шуис менам Ыджыдлы: ”Пукав Менам веськыдладорын,

⁴³ кытчӧдз ог пукты Тэнад кок улӧ Тэнӧ мустӧмтысьясӧс”.

⁴⁴ Давид шуӧ Сійӧс Господьӧн. Кыдзи нӧ Сійӧ Давидлы пиӧн лоӧ?»

Видзчысьӧй Индӧдӧ велӧдысьясысь!

⁴⁵ Став йӧзыс кывзісны Исусӧс. Сійӧ шуис велӧдчысьясыслы:

⁴⁶ «Видзчысьӧй Индӧдӧ велӧдысьясысь. Найӧ радейтӧны кузь паськӧмӧн ветлыны, йӧзаинын чолӧмалӧмъяс кывзыны, синагогаын водзын пукавны да гажӧдчанінын бурджыклаӧ пуксьыны.

⁴⁷ Найӧ куштӧны дӧваяслысь керкасӧ да асьнысӧ петкӧдлӧм могысь дыр кевмысьӧны. Но найӧс лоӧ чорыда мыждӧма».