Лука 19 - Коми Библия 2023

Вот перйысь Заккей

¹ Ериконӧ воӧм бӧрын Исус муніс кар пырыс.

² Сэні оліс Заккей нима озыр морт, вот перйысьяслӧн юралысьыс.

³ Сійӧ ёна кӧсйис аддзывны Исусӧс да тӧдмавны, коді Сійӧ сэтшӧмыс. Но ичӧт тушаыс вӧсна йӧз сайсянь Заккейлы нинӧм эз тыдав.

⁴ Заккей котӧртіс водзӧ да кавшасис пу вылӧ, медым аддзыны Исусӧс. Буретш сійӧ туйӧдыс вӧлі локтӧ Исус.

⁵ Пу весьтӧ воигӧн Исус видзӧдліс вывлань, аддзис Заккейӧс да шуис: «Заккей, лэччы ӧдйӧджык. Талун Меным колӧ лоны тэ ордын».

⁶ Заккей тэрмасьӧмӧн лэччис. Сійӧ долыдпырысь сибӧдіс Исусӧс гортас.

⁷ Тайӧс аддзылысьяс шуасисны, мыжа морт ордӧ пӧ муніс.

⁸ Заккей сувтіс да шуис: «Господьӧй, овмӧслысь джынсӧ сета гӧльяслы, а кодлысь ылӧдлӧмӧн босьті, сылы нёль пӧвстӧн бӧр бергӧда».

⁹ Исус шуис сылы: «Талун воис мездмӧм тайӧ керкаас, ӧд тайӧ мортыс тшӧтш Ӧвраам пи.

¹⁰ Морт Пи локтіс корсьны да мездыны вошӧмаӧс».

Зарни сьӧм йылысь велӧданвисьт

¹¹ Заккей керкаын кывзысьяслы Исус висьталіс нӧшта ӧти велӧданвисьт, ӧд Сійӧ вӧлі Ерусалимсянь матын, и унаӧн чайтісны, мый регыд нин воас Енлӧн Юралӧмыс.

¹² Исус висьталіс: «Ӧксы рӧдысь ӧти морт мӧдӧдчас ылі муӧ, медым сэні ӧксы ним босьтны да бӧр локны аслас муӧ ӧксыӧн.

¹³ Сійӧ корас ас дорас дас кесйӧгӧс, быдӧнлы сетас зарни сьӧм да шуас: ”Менам локтӧдз тайӧ сьӧмсӧ уджӧ бергӧдӧй”.

¹⁴ Ас войтырыслы тайӧ мортыс вӧлі мустӧм, та вӧсна бӧрсяньыс найӧ мӧдӧдасны юӧртысьясӧс висьтавны, огӧ пӧ кӧсйӧй, медым сійӧ вӧлі миян ӧксыӧн.

¹⁵ Ӧксыӧн локтӧм бӧрын сійӧ тшӧктас корны кесйӧгъяссӧ, кодъяслы сетліс сьӧмсӧ. Кӧсъяс тӧдмавны, уна-ӧ найӧ содтӧд босьтісны.

¹⁶ Ӧти локтас да шуас: ”Ыджыдӧй, тэнад зарни сьӧмыд вайис содтӧд дасӧс”.

¹⁷ Ӧксы шуас: ”Бура вӧчин. Тэ бур кесйӧг. Ичӧтторйын тэ эскана вӧлін, дас карӧн веськӧдлыны кутан”.

¹⁸ Локтас мӧд кесйӧг да шуас: ”Ыджыдӧй, тэнад зарни сьӧмыд вайис содтӧд витӧс”.

¹⁹ Сылы ӧксы шуас: ”Вит карӧн веськӧдлыны кутан”.

²⁰ Локтас коймӧд кесйӧг да шуас: ”Ыджыдӧй, со, тэнад сьӧмыд, чышъянӧ гартыштӧмӧн видзи сійӧс.

²¹ Ме полі тэысь, тэ ӧд чорыд морт: босьтан, мый эн пуктывлы, да вундан, мый эн кӧдзлы”.

²² Ӧксы шуас сылы: ”Шогмытӧм кесйӧг! Аслад кывъясыд серти ме мыжда тэнӧ. Тэ тӧдін, мый ме чорыд морт, босьта, мый эг пуктывлы, да вунда, мый эг кӧдзлы.

²³ Мыйла сьӧмчукӧртанінӧ эн пукты менсьым сьӧмӧс? Сэки локтӧм бӧрам ме эськӧ содтӧдӧн босьті”.

²⁴ Ӧксы шуас сыкӧд сулалысьяслы: ”Мырддьӧй сылысь сьӧмсӧ да сетӧй дас сьӧмаыслы”.

²⁵ Найӧ шуасны: ”Ыджыдӧй, сылӧн эм нин дас сьӧмыс”.

²⁶ Ӧксы шуас: ”Висьтала тіянлы: кодлӧн эм, сылы сетасны. Кодлӧн абу, сылысь бӧръясӧ босьтасны.

²⁷ Менӧ мустӧмтысьясӧс, менам юралӧмлы паныд сувтысьясӧс вайӧдӧй татчӧ да виӧй найӧс менам син водзын”».

Исус пырӧ Ерусалимӧ

²⁸ Тайӧс висьталӧм бӧрын Исус мӧдӧдчис Ерусалимлань.

²⁹ Сійӧ воис Олив керӧсын сулалысь Виффагия да Вифания сиктъяс дорӧ. Ассьыс кык велӧдчысьсӧ мӧдӧдігӧн

³⁰ Исус шуис: «Мунӧй тайӧ сиктас. Сэтчӧ пыриганыд аддзанныд домалӧм том осёлӧс, сы вылӧ некод на эз пуксьыв. Разьӧй сійӧс да вайӧдӧй татчӧ.

³¹ Юаласны кӧ, мыйла разянныд, вочавидзӧй, мый сійӧ колӧ Господьлы».

³² Мӧдӧдӧмаяс мунісны да аддзисны, мый ставыс вӧлі Исуслӧн висьталӧм серти.

³³ Том осёлӧс разиганыс видзысьыс юаліс: «Мыйла разянныд?»

³⁴ Велӧдчысьяс вочавидзисны: «Сійӧ колӧ Господьлы».

³⁵ Том осёлӧс вайӧдісны Исус дінӧ, шлапкисны осёл вылӧ паськӧмнысӧ да отсалісны Исуслы пуксьыны.

³⁶ Кор Исус муніс осёл вылын, йӧзыс вольсавлісны паськӧмнысӧ туй вылас.

³⁷ Кор Исус матыстчис Олив керӧсысь лэччанінӧ, став Сылӧн велӧдчысьыс кыпыда да гораа пондісны ошкыны Енмӧс став аддзылӧм шензьӧданаторсьыс.

³⁸ Найӧ шуалісны: – Бурсиӧма Господь нимӧн локтысь Ӧксыӧс! Лӧнь олӧм енэжын, ошкӧм Медвылыссалы!

³⁹ Йӧз чукӧрысь фарисейясысь кодсюрӧ шуисны Исуслы: «Велӧдысь, ӧлӧд велӧдчысьястӧ!»

⁴⁰ Исус воча шуис: «Висьтала тіянлы: найӧ кӧ ланьтасны, изъяс шыасясны».

⁴¹ Ерусалимлань матыстчигӧн Исус видзӧдліс кар вылас да бӧрдӧмӧн

⁴² шуаліс: «Тӧдін кӧ эськӧ тэ талун, мый вайӧ тэныд лӧнь олӧмсӧ! Ӧні тайӧ тупкыса тэнад синлы.

⁴³ Воас лун, кор тэнад вӧрӧгъяс лэптасны тэ гӧгӧр тымӧд, кытшаласны тэнӧ да быд боксянь дзескӧдасны.

⁴⁴ Тэнӧ жугӧдасны дзоньнас, олысьястӧ виаласны – из вылӧ из оз кольны, ӧд тэ эн кӧсйы тӧдны тэ дінӧ Енлысь волӧмсӧ».

Крамысь вузасьысьясӧс вӧтлалӧм

⁴⁵ Исус пырис крамӧ да пондіс вӧтлавны сэтысь вузасьысь-ньӧбасьысьясӧс.

⁴⁶ Сійӧ шуис налы: «Гижӧма: ”Менам керкаӧй – кевмысян керка”. А ті сыысь лёк вӧчысьяслы дзебсянін вӧчинныд».

⁴⁷ Исус быд лун велӧдіс крамын. Аркирейяс, Индӧдӧ велӧдысьяс да веськӧдлысьяс кӧсйисны вины Сійӧс.

⁴⁸ Сӧмын эз тӧдны, кыдзи тайӧс вӧчны, ӧд став йӧзыс вешйывтӧг кывзісны Исусӧс.