Лука 18 - Коми Библия 2023

Отсӧг корысь дӧва да шогмытӧм ёрдысь йылысь велӧданвисьт

¹ Исус висьталіс велӧданвисьт, мый оз ков лигышмунны, а дугдывтӧг кевмысьны.

² Сійӧ висьталіс: «Ӧти карын вӧлі ёрдысь, сійӧ Енсьыс эз пов да йӧзысь эз яндысь.

³ Сійӧ карас оліс дӧва, коді волывліс ёрдысь дінӧ да корис: ”Дорйы менӧ дзескӧдысьысь”.

⁴ Ёрдысь дыр эз босьтчы дорйынысӧ. Сэсся шуис: ”Дерт, ме Енсьыс ог пов да йӧзысь ог яндысь.

⁵ Но тайӧ дӧваыс дзикӧдз менӧ дӧзмӧдіс – ковмас дорйыны. Ог кӧ дорйы, бурӧн ог мын сыысь”».

⁶ Господь шуис: «Кыланныд, мый шуӧ шогмытӧм ёрдысь?

⁷ А Енмыс ӧмӧй оз дорйы Ассьыс бӧрйӧмаяссӧ, кодъяс лун и вой корӧны отсӧгсӧ Сылысь? Сёрмас ӧмӧй Сійӧ сетны отсӧгсӧ?

⁸ Висьтала тіянлы: Сійӧ регыдӧн доръяс найӧс. Но аддзас-ӧ Морт Пи му вылысь татшӧм эскӧмсӧ локтӧм бӧрас?»

Фарисей да вот перйысь йылысь велӧданвисьт

⁹ Асьнысӧ веськыда олысьӧ пуктысьяслы да мукӧдӧс увтыртысьяслы Исус висьталіс татшӧм велӧданвисьт:

¹⁰ «Кык морт пырисны крамӧ кевмысьны: ӧтиыс вӧлі фарисей, мӧдыс – вот перйысь.

¹¹ Фарисей сувтӧмӧн кевмысис вомгорулас: ”Енмӧй, аттьӧала Тэнӧ, мый ме абу мукӧдыс кодь: ог горшась, ог пӧръясь, гозъякост олӧм ог пежав. Ме абу тайӧ вот перйысьыс кодь.

¹² Видзала вежоннас кыкысь, ставсьыс дасӧд юкӧнсӧ сета Енлы”.

¹³ А вот перйысь сулаліс бокын да весиг синсӧ эз лысьт лэптывны енэжланьыс, сӧмын морӧсас кучкалӧмӧн шуаліс: ”Енмӧй, ло бур сьӧлӧма ме дінӧ, мыжа морт дінӧ!”

¹⁴ Висьтала тіянлы: Ен водзын веськыдӧн муніс гортас вот перйысь, эз фарисей. Ӧд асьсӧ вылӧ пуктысьӧс лэдзасны, асьсӧ улӧ пуктысьӧс кыпӧдасны».

Челядьӧс бурсиӧм

¹⁵ Исус дінӧ вайӧдісны посни челядьӧс, медым Сійӧ инмӧдчыліс на дінӧ. Велӧдчысьяс аддзисны тайӧс да пондісны шуасьны вайӧдысьяс вылӧ.

¹⁶ Исус корис челядьӧс Ас дінас да шуис: «Лэдзӧй челядьсӧ локны Ме дінӧ. Энӧ кутӧй найӧс. Енлысь Юраланінсӧ ӧд на коддьӧмлы лӧсьӧдӧма.

¹⁷ Веськыда висьтала тіянлы: коді оз сибӧд Енлысь Юралӧмсӧ кага моз, сійӧ оз пыр Енлӧн Юраланінӧ».

Озырлы сьӧкыд пырны Енлӧн Юраланінӧ

¹⁸ Ӧти юралысь юаліс Исуслысь: «Бур Велӧдысьӧй, мый меным колӧ вӧчны, мед вичмис меным помтӧм олӧм?»

¹⁹ Исус вочавидзис: «Мыйла тэ шуан Менӧ бурӧн? Некод абу бурыс, сӧмын Енмыс бур.

²⁰ Тэ ӧд тӧдан тшӧктӧмъяссӧ: гозъякост олӧм эн пежав, эн ви, эн гусясь, эн пӧръясь, пыдди пукты ассьыд бать-мамтӧ».

²¹ Юралысь шуис: «Том кадсянь ме ола тайӧ тшӧктӧмъяс сертиыс».

²² Тайӧс кылӧм бӧрын Исус шуис сылы: «Ӧтитор оз тырмы тэныд: вузав ставсӧ, мый тэнад эм, а сьӧмсӧ сет гӧльяслы. Сэки тэныд енэжын озырлуныс вичмас. Сэсся лок Ме бӧрся».

²³ Тайӧс кылӧм бӧрын юралысь шогӧ усис, ӧд сійӧ вӧлі зэв озыр.

²⁴ Исус аддзис юралысьлысь шогӧ усьӧмсӧ, сэсся шуис: «Кутшӧм сьӧкыд озырлы пырны Енлӧн Юраланінӧ!

²⁵ Озырлы Енлӧн Юраланінӧ пырӧм дорысь верблюдлы кокньыдджык мунны ем пысӧд».

²⁶ Тайӧс кылысьяс юалісны: «Коді нӧ вермас мездмынысӧ?»

²⁷ Исус шуис: «Мортлы вермытӧмыс – вермана Енлы».

²⁸ Сэки Петыр шуис: «Ми ставсӧ эновтім да мунім Тэ бӧрся».

²⁹ Исус шуис налы: «Веськыда висьтала тіянлы: коді Енлӧн Юралӧм вӧсна коляс керкасӧ, бать-мамсӧ, чой-воксӧ, гӧтырсӧ да ныв-писӧ,

³⁰ сылы тайӧ олӧмас на уна пӧвстӧн бӧр воас, нӧшта локтан нэмас сылы помтӧм олӧм вичмас».

Исус бара висьталӧ Аслас кулӧм йылысь

³¹ Исус корис дас кыкнан велӧдчысьсӧ да шуис налы: «Ӧні ми мунам Ерусалимӧ. Сэні инас пророкъяслӧн Морт Пи йылысь став гижӧмаыс.

³² Сійӧс сетасны ентӧдтӧмъяс киӧ. Найӧ сераласны-лёкӧдасны, янӧдасны да сьӧлаласны Сійӧс.

³³ Чорыда нӧйтасны, сэсся виасны, но коймӧд луннас Сійӧ ловзяс».

³⁴ Велӧдчысьяслы тайӧ вӧлі гӧгӧрвотӧм, кывъясыс вӧліны налы пӧдсаӧсь. Найӧ эз вермыны вежӧртны Исуслысь висьталӧмсӧ.

Синтӧмӧс бурдӧдӧм

³⁵ Исус матыстчис Ерикон карлань. Туй бокын пукаліс синтӧм корысь морт.

³⁶ Сійӧ кыліс йӧзлысь локтӧмсӧ да юаліс: «Мый тайӧ?»

³⁷ Сылы висьталісны, Назаретса Исус пӧ локтӧ.

³⁸ Сэки синтӧм пондіс горзыны: «Исус, Давид Пи! Ло бур сьӧлӧма ме дінӧ!»

³⁹ Исус водзвылын мунысьяс ӧлӧдісны синтӧмӧс горзӧмсьыс, но сійӧ ёнджыка на пондіс горзыны: «Давид Пи, ло бур сьӧлӧма!»

⁴⁰ Исус сувтіс да тшӧктіс вайӧдны синтӧм мортӧс, сэсся юаліс сылысь:

⁴¹ «Мый тэ кӧсъян?» Сійӧ вочавидзис: «Господьӧй, кӧсъя аддзыны».

⁴² Исус шуис: «Аддзы. Эскӧмыд мездіс тэнӧ».

⁴³ Синтӧм дзик пыр кутіс аддзыны да Енмӧс ошкигтыр муніс Исус бӧрся. Тайӧс аддзӧм бӧрын став йӧзыс аттьӧалісны-ошкисны Енмӧс.