Лука 17 - Коми Библия 2023

Ыштӧдӧмъяс да мыж вӧчӧм йылысь

¹ Исус висьталіс велӧдчысьяслы: «Ыштӧдӧмъяслы колӧ локнысӧ, но курыд шог сылы, код пыр локтӧны ыштӧдӧмъясыс!

² Сылы бурджык лоӧ, сьыліас кӧ ыджыд изки ӧшӧдасны да шыбитасны саридзӧ, тайӧ ичӧтъясысь ӧтикӧс ыштӧдӧм дорысь.

³ Видзчысьӧй таысь! Вокыд кӧ мыж вӧчас тэныд паныд, ӧлӧд сійӧс. Ассьыс мыжмӧмсӧ кӧ восьтас, прӧстит сійӧс.

⁴ Сизимысь кӧ луннас тэ водзын мыжмас да сизимысь кӧ тэ дінӧ локтӧмӧн шуас: ”Ме мыжа”, прӧстит сійӧс».

Эскӧм йылысь

⁵ Апостолъяс шуисны Господьлы: «Содты миянлы эскӧмсӧ».

⁶ Господь шуис: «Лоас кӧ тіян эскӧмныд горчица тусь ыджда, верманныд шуны тайӧ пуыслы: ”Нетшыштчы вужнад да вужъясь саридзас” – и сійӧ кывзысяс тіянлысь».

Кесъялӧм йылысь

⁷ «Гӧрӧм бӧрын либӧ пемӧсъясӧс видзӧм бӧрын кӧ кесйӧгныд локтас, шуанныд-ӧ сылы: ”Медводз пуксьы да сёй”.

⁸ Дерт, онӧ. Ті шуанныд: ”Дасьты меным сёян, вӧнясь да кесъяв меным. А менам сёйӧм-юӧм бӧрын ачыд верман сёйны-юны”.

⁹ Кесйӧг кӧ вӧчӧ тшӧктӧм серти, сэки сійӧс оз аттьӧавлыны.

¹⁰ Тадзи тшӧтш ті, вӧчанныд кӧ тшӧктӧм серти, вӧчӧм бӧраныд шуӧй: ”Ми сӧмын кесйӧгъяс. Мый колӧ вӧлі вӧчны, ми вӧчим”».

Проказаӧн висьысьясӧс бурдӧдӧм

¹¹ Ерусалимӧ мунігӧн Исус муніс Самария да Галилея муяс пыр.

¹² Ӧти сиктӧ воигӧн Сійӧс паныдалісны проказаӧн висьысь дас морт. Ылӧ сувтӧмӧн

¹³ найӧ горзісны: «Исус, Велӧдысь, ло бур сьӧлӧма миян дінӧ!»

¹⁴ Исус видзӧдліс на вылӧ да шуис: «Мунӧй да петкӧдлӧй асьнытӧ попъяслы». Мунігкостіыс найӧ сӧстӧммисны.

¹⁵ Ассьыс бурдӧмсӧ казялӧм бӧрын ӧти косіс Енмӧс гораа ошкигтырйи.

¹⁶ Сійӧ кымынь уськӧдчис Исус водзӧ да аттьӧаліс Сійӧс. Тайӧ мортыс вӧлі Самарияысь.

¹⁷ Исус юаліс: «Эз ӧмӧй даснаныс сӧстӧммыны? Кӧнӧсь нӧ ӧкмысыс?

¹⁸ Тайӧ бокыса мортысь кындзи некод эз лок ошкыны Енмӧс».

¹⁹ Исус шуис сылы: «Чеччы да мун. Эскӧмыд мездіс тэнӧ».

Морт Пилӧн лун

²⁰ Фарисейяс юалісны, корджык воас Енлӧн Юралӧмыс. Исус вочавидзис: «Енлӧн Юралӧмыс оз во тыдалана ногӧн.

²¹ Он вермы шуны: ”Видзӧд, сійӧ тані” либӧ ”Сійӧ сэні”. Енлӧн Юралӧмыс ӧд тіян пытшкын».

²² Исус шуис велӧдчысьясыслы: «Воас кад, кор ті кӧсъянныд аддзывны Морт Пилӧн лунъясысь ӧтиӧс, но онӧ аддзылӧй.

²³ Тіянлы кӧ шуасны: ”Сійӧ тані”, либӧ шуасны: ”Сійӧ сэні”, энӧ мунӧй да энӧ вӧтчӧй на бӧрся.

²⁴ Енэж ӧтар помсяньыс мӧдарӧдзыс югнитысь чардби моз Морт Пи тыдовтчас Аслас лунӧ.

²⁵ Но таӧдз Сылы ковмас нуны уна сьӧкыд да ӧтдортӧм ӧнія олысьяссянь.

²⁶ Кыдзи вӧлі Ной лунъяс дырйи, сідзи лоӧ Морт Пи локтігӧн.

²⁷ Ковчегӧ Нойлӧн пыртӧдз йӧзыс сёйисны-юисны, гӧтрасисны да верӧс сайӧ мунісны. Сэки ыджыд ойдӧм дырйи ваыс пӧдтіс ставнысӧ.

²⁸ Тадзи вӧлі тшӧтш Лот лунъясӧ: йӧзыс сёйисны-юисны, ньӧбасисны-вузасисны, кӧдзисны да керкаяс лэптісны.

²⁹ Содом карысь Лотлӧн петан лунӧ енэжсянь киссис тэгъя-биа зэр да бырӧдіс ставнысӧ.

³⁰ Тадзи лоас Морт Пилӧн петкӧдчан лунӧ.

³¹ Коді сійӧ лунӧ лоас керка вылас, мед оз пыр керкаас босьтны мыйкӧ. Коді лоас видз-му вылас, мед оз кос гортас.

³² Энӧ вунӧдӧй, мый лои Лот гӧтыркӧд.

³³ Коді зільӧ видзны ассьыс олӧмсӧ, воштас сійӧс. Ассьыс олӧмсӧ воштысь видзас сійӧс.

³⁴ Висьтала тіянлы: сійӧ войӧ ӧти вольпасьын лоасны кыкӧн: ӧтисӧ босьтасны, мӧдсӧ колясны.

³⁵ Ӧтлаын пондасны изны кык ань: ӧтисӧ босьтасны, мӧдсӧ колясны.

³⁶ Видз-му вылын лоасны кыкӧн: ӧтисӧ босьтасны, мӧдсӧ колясны».

³⁷ «Кӧні тайӧ лоӧ, Господьӧй?» – юалісны велӧдчысьясыс. Сійӧ вочавидзис: «Кӧні шой, сэтчӧ чукӧртчасны кутшъяс».