Лука 16 - Коми Библия 2023

Овмӧс нуӧдысьлӧн пӧръялӧм йылысь велӧданвисьт

¹ Исус висьталіс велӧдчысьясыслы: «Ӧти озыр мортлӧн вӧлі овмӧс нуӧдысь. Озыр мортлы норасясны, овмӧс нуӧдысьыд пӧ куштӧ овмӧстӧ.

² Сійӧ корас овмӧс нуӧдысьсӧ ас дінас да шуас сылы: ”Тӧдан он, мый кывсьӧ тэ йылысь? Висьтась, кыдзи тэ веськӧдлін менам овмӧсӧн. Талунсянь тэ он кут уджавны ме ордын”.

³ Овмӧс нуӧдысь кутас мӧвпавны: ”Ыджыдӧй вӧтлӧ менӧ. Мый вӧчны? Му бертны ог вермы, корысьӧдз усьны яндзим.

⁴ Со мый вӧча, медым мукӧдыс сибӧдасны менӧ асланыс керкаӧ”.

⁵ Сійӧ корас ӧти бӧрся мӧдӧс ыджыдыслы уджйӧзаясӧс. Ӧтилысь юалас: ”Уна-ӧ тэ уджйӧза?”

⁶ Сійӧ вочавидзас: ”Сё пельса вый”. Овмӧс нуӧдысь шуас: ”Со тэнад уджйӧз гижӧдыд. Пуксьы да гиж ветымынӧс”.

⁷ Сэсся мӧдлысь юалас: ”Тэ уна-ӧ уджйӧза?” Сійӧ вочавидзас: ”Сё мешӧк шобді”. Овмӧс нуӧдысь шуас: ”Со тэнад уджйӧз гижӧдыд. Гиж кӧкъямысдасӧс”.

⁸ Ыджыдыс ошкыштас пӧръялысь овмӧс нуӧдысьӧс сылӧн сюсьлунысь. Тайӧ муюгыдса пияныс ас костаныс сюсьджыкӧсь югыдыслӧн пиян дорысь.

⁹ Висьтала тіянлы: лӧсьӧдӧй аслыныд ёртъяснытӧ мувывса ылӧг озырлун отсӧгӧн, медым озырлунныд бырӧм бӧрын найӧ сибӧдасны тіянӧс бырлытӧм оланінӧ».

Онӧ вермӧй кесъявны кык ыджыдлы

¹⁰ «Коді эскана ичӧтас, сійӧ лоӧ эскана ыджыдас. Ичӧтас ылӧдлысь ылӧдлас и ыджыдас.

¹¹ Ті кӧ лёка веськӧдланныд мувывса ылӧг озырлуннас, сетасны-ӧ тіянлы збыльысь донасӧ?

¹² Ті кӧ лёка веськӧдланныд йӧз озырлунӧн, сетасны-ӧ тіянлы ассьыныдлысь?

¹³ Кесйӧг оз вермы кесъявны кык ыджыдлы. Ӧтисӧ кӧ радейтӧ, мӧдсӧ мустӧмтӧ. Ӧтисӧ кӧ пыдди пуктӧ, мӧдсӧ увтыртӧ. Ті онӧ вермӧй кесъявны Енлы, кесъяланныд кӧ озырлунлы».

¹⁴ Тайӧс кывлісны фарисейяс. Найӧ сералісны Исусӧс, ӧд налы вӧлі муса озырлуныс.

¹⁵ Исус шуис налы: «Йӧз водзын ті петкӧдланныд асьнытӧ веськыда олысьясӧн, но Енмыс тӧдӧ тіянлысь сьӧлӧмнытӧ. Мый йӧзыс донъялӧны вылӧ, сійӧ Енмыслы зывӧк».

Индӧд да Енлӧн Юралӧм

¹⁶ «Индӧдыс да пророкъяс вӧліны Иоанӧдз. Ӧні юӧртӧны Енлӧн Юралӧм йылысь, и быдӧн ёна зільӧ пырны сэтчӧ.

¹⁷ Индӧдысь ӧти чуттор вошӧм дорысь енэжыс да муыс ӧдйӧджык бырас.

¹⁸ Гӧтырсӧ эновтысь да мӧдкӧд гӧтрасьысь гозъякост олӧм пежалӧ. Юксьӧм аньӧс гӧтырӧ босьтысь тшӧтш пежалӧ».

Лазар да озыр морт

¹⁹ «Вӧлі озыр морт. Сійӧ новліс пемыдгӧрд да шабді паськӧм, быд лун лышкыда гажӧдчис.

^20-21 Лазар нима корысь куйліс сылӧн дзиръя дорын да виччысис, оз-ӧ вичмы сылы озыр мортлӧн пызан вывсьыс гылалӧм торпыригыс. Лазарлӧн кучикыс ставнас вӧлі лӧмӧсь, весиг понъяс волывлісны нювны лӧмсӧ.

²² Лазар куліс, и анделъяс нуисны сійӧс Ӧвраам дінӧ. Куліс тшӧтш озыр морт, и сійӧс дзебисны.

²³ Адын мучитчигӧн озыр морт лэптіс синсӧ да аддзис ылынкодь Ӧвраамӧс да сы дорысь Лазарӧс.

²⁴ Озыр морт горӧдіс: ”Ӧвраам батьӧй, ло бур сьӧлӧма ме дінӧ! Мӧдӧд Лазарӧс, мед кӧтӧдас чунь помсӧ да кӧдзӧдас менсьым кывйӧс, ӧд ме мучитча тані би пытшкас”.

²⁵ Ӧвраам шуис: ”Пиукӧй, эн вунӧд, мый тэ босьтін нин бурсӧ, а Лазарлы лёкыс вичмис. Ӧні сійӧ сьӧлӧмсӧ бурмӧдӧ тані, а тэ мучитчан.

²⁶ Таысь ӧтдор миянӧс торйӧдӧ ыджыд пыдӧстӧмин – весиг кӧсъяс кӧ кодкӧ вуджнысӧ, миянсянь тіян дінӧ вуджны оз вермы, тадзи тшӧтш тіянсянь миян дінӧ некод оз вермы вуджнысӧ”.

²⁷ Сэки озыр морт шуис: ”Кора тэнӧ, Ӧвраам батьӧй, мӧдӧд сійӧс менам бать керкаӧ,

²⁸ мед ӧлӧдас менсьым витнан вокӧс тайӧ мучитчанінас веськалӧмысь”.

²⁹ Ӧвраам шуис сылы: ”Налӧн эм Мӧисей да пророкъяс, мед найӧс кывзасны”.

³⁰ Сійӧ шуис: ”Оз кывзыны, Ӧвраам батьӧй. Но найӧ бергӧдчасны мыжъяссьыныс, локтас кӧ на дінӧ кодкӧ кулӧмаясысь”.

³¹ Сэки Ӧвраам шуис сылы: ”Мӧисейӧс да пророкъясӧс кӧ оз кывзыны, найӧ оз эскыны весиг кулӧмысь ловзьысьлы”».