Лука 15 - Коми Библия 2023

Вошлӧм ыж йылысь велӧданвисьт

¹ Вот перйысьяс мукӧд мыжаяскӧд локтісны Исус дінӧ кывзыны Сійӧс.

² Фарисейяс да Индӧдӧ велӧдысьяс шуасисны: «Сійӧ мыжаяскӧд ветлӧдлӧ да накӧд ӧтлаын сёйӧ!»

³ Сэки Исус висьталіс налы велӧданвисьт:

⁴ «Мый вӧчас морт, вошас кӧ сылӧн сё ыжсьыс ӧти? Оз-ӧ сійӧ коль ӧкмысдас ӧкмыссӧ овтӧминӧ да мун корсьны вошӧмасӧ?

⁵ Аддзӧм бӧрас долыдпырысь босьтас ыжсӧ пельпом вылас.

⁶ Локтас гортас, чукӧстас ёртъяссӧ, орччӧн олысьяссӧ да шуас налы: ”Нимкодясьӧй, менам вошӧм ыжӧй сюрис!”

⁷ Висьтала тіянлы: енэжын нимкодясьӧмыс ӧти морт вӧсна, коді бергӧдчис мыжъяссьыс, лоӧ ёна ыджыдджык ӧкмысдас ӧкмыс веськыда олысь дорысь, кодъяслӧн абу коланлуныс бергӧдчыны мыжъяссьыс».

Вошлӧм сьӧм йылысь велӧданвисьт

⁸ «Ань кӧ воштас дас эзысь сьӧмсьыс ӧтикӧс, оз-ӧ сійӧ биасьӧмӧн кут чышкыны джоджсӧ да корсьны вошӧмторсӧ.

⁹ Аддзӧм бӧрас корас нывъёртъяссӧ, орччӧн олысь аньяссӧ да шуас налы: ”Нимкодясьӧй! Ме аддзи воштылӧм сьӧмӧс”.

¹⁰ Висьтала тіянлы: тадзи тшӧтш нимкодясьӧны Енлӧн анделъяс ӧти морт вӧсна, коді бергӧдчӧ мыжъяссьыс».

Вошлӧм пи йылысь велӧданвисьт

¹¹ Нӧшта Исус висьталіс: «Ӧти мортлӧн вӧлі кык пи.

¹² Ичӧтджыкыс шуас батьыслы: ”Батьӧй, сет меным овмӧссьыд ассьым пайӧс”. Батьыс юкас овмӧссӧ кыкнан пиыслы.

¹³ Кымынкӧ лун мысти ичӧт пиыс босьтас ассьыс пайсӧ да мунас ылі муӧ. Сэні кокньыд оласногысла лотас ставсӧ.

¹⁴ Сэки сійӧ муас пуксяс тшыг олӧм. Тшыглуныс топӧдас сійӧс.

¹⁵ Сійӧ медасяс сэтчӧс ӧти морт дінӧ видзны порсьяссӧ.

¹⁶ Сійӧ дась вӧлі пӧткӧдчыны быдмӧгӧн, мый сёйлісны порсьяс, но весиг тайӧ сылы эз вичмыв.

¹⁷ Ас садяс воӧм бӧрын сійӧ шуас: ”Батьӧйлӧн меда йӧзыс пӧттӧдзныс сёйӧны, а ме тані тшыглы кула.

¹⁸ Чечча да муна бать дінӧ, шуа сылы: Батьӧй, ме мыжа енэжыс водзын да тэ водзын.

¹⁹ Ме ог шогмы шусьыны тэнад пиӧн, босьт менӧ медалӧм уджалысь пыдди”.

²⁰ Сійӧ чеччас да мӧдӧдчас батьыс ордӧ. Ылісянь на батьыс аддзас писӧ, да сылӧн сьӧлӧмыс нормас. Сійӧ котӧрӧн уськӧдчас пиыслы паныд, сывйыштас да окалас писӧ.

²¹ Пиыс шуас: ”Батьӧй, ме мыжа енэжыс водзын да тэ водзын. Ме ог шогмы шусьыны тэнад пиӧн”.

²² Батьыс тшӧктас кесйӧгъясыслы: ”Вайӧй медбур паськӧмсӧ да пасьтӧдӧй менсьым пиӧс, чунькытшӧдӧй да кӧмӧдӧй сійӧс.

²³ Начкӧй тшӧгӧдӧм кукань. Пондам сёйны-гажӧдчыны талун!

²⁴ Менам пиӧй вӧлі кулӧма, а ӧні ловъя, вӧлі вошӧма, а ӧні сюрис”. Ставныс пондасны гажӧдчыны.

²⁵ Ыджыд пиыс вӧлі видз вылын. Керка дорас матыстчигӧн сійӧ кылас сьылӧм-гажӧдчӧмсӧ,

²⁶ чукӧстас ӧти кесйӧгӧс да юалас: ”Мый тані?”

²⁷ Сійӧ вочавидзас: ”Тэнад вокыд бӧр локтіс. Батьыд тшӧктіс начкыны тшӧгӧдӧм куканьӧс, ӧд вокыд ловйӧн воис”.

²⁸ Ыджыд пиыс ёна скӧрмас, весиг оз пыр керкаас. Батьыс петас корны сійӧс.

²⁹ Пиыс шуас батьыслы: ”Кымын во ме тэныд уджала, тэнсьыд пыр кывзыся, но тэ весиг кӧзапитӧ эн сет меным, медым ёртъясӧйкӧд гажӧдчыштны.

³⁰ Тэнад тайӧ пиыд лотіс став овмӧссӧ кырсалысь аньяскӧд. Ӧні локтіс да, тшӧгӧдӧм куканьӧс начкин сылы!”

³¹ Батьыс шуас: ”Пиӧй, тэ ӧд пыр вӧлін мекӧд. Ставыс мый менам – тэнад.

³² Вокыд вӧсна колӧ гажӧдчыны-нимкодясьны, ӧд сійӧ вӧлі кулӧма, а ӧні ловъя, вӧлі вошӧма, а ӧні сюрис”».