Лука 13 - Коми Библия 2023

Бергӧдчӧй мыжъяссьыныд

¹ Исуслӧн велӧдігӧн Сы дінӧ матыстчисны кодсюрӧ да висьталісны Галилеяысь локтысьясӧс крамын виӧм йылысь. Пилатлӧн тшӧктӧм серти найӧс виӧмаӧсь вись вайиганыс, и налӧн вирыс сорласьӧма вись виркӧд.

² Исус шуис: «Ті ног, найӧ вӧліны мыжаджыкӧсь Галилеяысь мукӧд локтысьяс дорысь, тадзи кӧ кулісны?

³ Эз. Шуа тіянлы: на моз ті ставныд куланныд, онӧ кӧ бергӧдчӧй мыжъяссьыныд.

⁴ Мый шуанныд дас кӧкъямысыс йылысь, кодъяс вылӧ Силоамын усис башня да лямӧдіс кувтӧдзныс? Вӧліны-ӧ найӧ мыжаджыкӧсь Ерусалимын мукӧд олысьяс дорысь?

⁵ Эз. Шуа тіянлы: на моз ті ставныд куланныд, онӧ кӧ бергӧдчӧй мыжъяссьыныд».

Вотӧстӧм инжир пу йылысь велӧданвисьт

⁶ Исус висьталіс татшӧм велӧданвисьт: «Ӧти мортлӧн виноград йӧрас вӧлі быдмӧ инжир пу. Сійӧ локтас инжирла, но вотӧсыс оз сюр.

⁷ Сэки сійӧ шуас виноград йӧрын уджалысьлы: ”Куим во чӧж нин виччыся тайӧ инжир пуыслысь вотӧссӧ, но аддза, мый весьшӧрӧ. Керышт сійӧс, ӧд сӧмын муыслысь вынсӧ босьтӧ”.

⁸ Уджалысь вочавидзас: ”Ыджыдӧй, коль на сійӧс тайӧ во кежлас. Ме сійӧс мудъя да мусӧ куйӧдала.

⁹ Локтан вонас кӧ оз вай вотӧссӧ, сэки керыштан сійӧс”».

Шойччан лунӧ аньӧс бурдӧдӧм

¹⁰ Шойччан лунӧ Исус велӧдіс синагогаын.

¹¹ Сэні вӧлі мышкыртчӧм, веськӧдчыны вермытӧм ань. Дас кӧкъямыс во чӧж пеж лов кутӧма сійӧс тайӧ висьӧмнас.

¹² Исус аддзис аньӧс, корис сійӧс да шуис: «Аньӧй, тэ мездмин висьӧмсьыд».

¹³ Исус пуктыліс кисӧ ань вылӧ, и сійӧ дзик пыр веськӧдчис да пондіс ошкыны Енмӧс.

¹⁴ Шойччан лунӧ висьысьӧс бурдӧдӧмыс скӧрмӧдіс синагогаса юралысьӧс. Сійӧ шуис йӧзыслы: «Вежонас квайт лун сетӧма уджавнысӧ, сэки локтӧй бурдӧдчынытӧ, а энӧ шойччан лунӧ».

¹⁵ Господь воча шуис: «Кык бана шаньга! Шойччан лунӧ ті ӧмӧй онӧ разьлӧй лясни дорысь ӧш-осёлнытӧ да онӧ нуӧдлӧй найӧс юктавны?

¹⁶ Ӧвраамлысь тайӧ нывсӧ сӧтана кӧрталӧмӧн кутіс дас кӧкъямыс во чӧж. Эз ӧмӧй ков мездыны сійӧс шойччан лунӧ?»

¹⁷ Исуслӧн кывъясысь яналісны Сылы паныд сувтысьяс. Йӧзыс, мӧдарӧ, нимкодясисны Сылӧн чуймӧдана уджъясысь.

Горчица тусь да няньшом йылысь велӧданвисьтъяс

¹⁸ Сэсся Исус шуис: «Кутшӧм Енлӧн Юралӧмыс? Мыйкӧд ӧткодяла сійӧс?

¹⁹ Енлӧн Юралӧмыс муӧ кӧдзӧм горчица тусь кодь. Сійӧ быдмӧ да лоӧ пу кодь ыджыд, весиг енэжвыв лэбачьяс поздысьӧны вожъясас».

²⁰ Исус бара шуис: «Мыйкӧд ӧткодяла Енлысь Юралӧмсӧ?

²¹ Сійӧ няньшом кодь. Ань гудралас сэтчӧ куим шомӧс тыр пызь, кад мысти няньыс ловзяс».

Векньыд ӧдзӧс

²² Исус мӧдӧдчис Ерусалимӧ. Кар-сиктъясті мунігӧн Сійӧ велӧдіс йӧзсӧ.

²³ Кодкӧ юаліс Исуслысь: «Господьӧй, этшаӧн ӧмӧй мездмасны?» Исус вочавидзис:

²⁴ «Став вынтӧ пуктӧй, медым пырны векньыд ӧдзӧсӧд. Висьтала тіянлы: унаӧн зілясны пырны, сӧмын оз вермыны.

²⁵ Воас кад, кор керка кутысь чеччас да йигналас ӧдзӧссӧ. Ывласяньыс ӧдзӧсӧ игӧдчӧмӧн понданныд вӧзйысьны: ”Ыджыдӧй, Ыджыдӧй, восьт миянлы!” Сійӧ вочавидзас: ”Кодъяс ті? Ме ог тӧд тіянӧс”.

²⁶ Ті шуанныд: ”Ми тэкӧд ӧтлаын сёйлім-юлім. Тэ велӧдлін миян каръясын”.

²⁷ Сійӧ шуас: ”Висьтала тіянлы: ог тӧд тіянӧс. Ог тӧд, кытысьӧсь ті. Мунӧй Ме дінысь, ставныд ті лёк вӧчысьяс!”

²⁸ Кор ті аддзанныд Енлӧн Юраланінысь Ӧвраамӧс, Исаакӧс, Яковӧс да став пророксӧ, а асьнытӧ ортсыас шыбитӧмаӧн, сэки лоӧ бӧрдӧм да пинь йирӧм.

²⁹ Асыввылысь да рытыввылысь, войвылысь да лунвылысь локталасны Енлӧн Юраланінӧ да пуксясны пызан сайӧ.

³⁰ Сэки бӧръяяс лоӧны воддзаӧн, а воддзаяс – бӧръяӧн».

Ерусалим вӧсна шогсьӧм

³¹ Сійӧ лунӧ фарисейясысь кодсюрӧ локтісны да шуисны Исуслы: «Тэныд колӧ мунны татысь, Ирӧд кӧсйӧ вины Тэнӧ».

³² Исус воча шуис налы: «Мунӧй, висьталӧй тайӧ ручыслы: талун да аски Ме вӧтлала пеж ловъясӧс да бурдӧда йӧзӧс, а коймӧд луннас эштӧда уджӧс.

³³ Но талун, аски да аскомысь Меным колӧ водзӧ мунны, ӧд оз овлы, медым пророкӧс виисны Ерусалимысь кындзи мӧдлаын.

³⁴ Ерусалим, Ерусалим! Пророкъясӧс виалысь да тэ дінӧ ыстӧмаясӧс изъялысь! Кымынысь Ме кӧсйи чукӧртны тэнсьыд ныв-питӧ, кыдзи лэбач чукӧртӧ ассьыс пиянсӧ борд улас, но ті энӧ кӧсйӧй.

³⁵ Со, тіян крамныд тыртӧммас. Шуа тіянлы: онӧ аддзӧй Менӧ тайӧ кывъяссӧ шутӧдз: ”Бурсиӧма Господь нимӧн Локтысьӧс!”»