Лука 12 - Коми Библия 2023

Видзчысьӧй кык бана оласногысь

¹ Сэккості чукӧрмис уна сюрс морт, найӧ весиг дзескӧдісны ӧта-мӧднысӧ. Исус медводз шыасис велӧдчысьяс дінас: «Видзчысьӧй фарисей няньшомысь, налӧн кодь кык бана оласногысь.

² Став дзебӧмаыс тыдовтчас да став гусяыс йӧзасяс.

³ Пемыдын шуӧмтӧ кыласны югыдын, керка пытшкын пельӧ вашкӧдӧмтӧ юӧртасны керка вывсянь».

Кодысь колӧ повны?

⁴ «Ёртъясӧй, висьтала тіянлы: энӧ полӧй вир-яйтӧ виысьясысь, унджыксӧ найӧ сэсся вӧчны оз вермыны.

⁵ Висьтала, кодысь колӧ повнысӧ. Полӧй Сыысь, коді виӧм бӧрас вермӧ шыбитны адӧ. Шуа тіянлы: Сыысь полӧй.

⁶ Оз-ӧ сӧмын кык урысь вузавны вит пышкайӧс? На пиысь весиг ӧтиӧс абу вунӧдӧма Енмыс.

⁷ А тіянлысь став юрсинытӧ лыддьӧма. Сідзкӧ, энӧ полӧй, ті ӧд донаджыкӧсь пышкайясысь».

Кристосысь соссьӧм

⁸ «Висьтала тіянлы: коді оз яндысь Меысь йӧз водзын, сыысь Морт Пи оз яндысь Енлӧн анделъяс водзын.

⁹ Коді соссяс Меысь йӧз водзын, сыысь Ме сосся Енлӧн анделъяс водзын.

¹⁰ Коді лёкӧдас Морт Пиӧс, сійӧс лоӧ прӧститӧма. Но коді омӧльтас Вежа Лолӧс, сійӧс оз ло прӧститӧма.

¹¹ Кор тіянӧс нуӧдасны синагогаясӧ да юралысь-веськӧдлысьяс водзӧ, энӧ майшасьӧй, кыдзи дорйыны асьнытӧ да мый шуны.

¹² Сійӧ кадас Вежа Лов туйдӧдас тіянӧс, мый колӧ шунысӧ».

Вежӧртӧм озыр морт йылысь велӧданвисьт

¹³ Йӧз чукӧрысь ӧти морт шуис Исуслы: «Велӧдысь, шу вокӧйлы, мед бать-мамсянь кольӧм овмӧссӧ юкас мекӧд».

¹⁴ Исус шуис: «Коді пуктіс Менӧ ёрдысьӧ, мед тіянлысь овмӧснытӧ юкны?»

¹⁵ Сэсся шуис ставныслы: «Видзчысьӧй горшасьӧмысь, ӧд мортыдлӧн олӧмыс абу сылӧн ыджыд озырлун сайын».

¹⁶ Исус висьталіс налы велӧданвисьт: «Озыр мортлӧн муыс бур быдтас сетас.

¹⁷ Сійӧ мӧвпыштас: ”Мый вӧчны? Быдтасӧй видзанінъясӧ оз тӧр”.

¹⁸ Сэсся шуас: ”Косяла йӧртӧдъясӧс да вӧча гырысьджыкӧс, чукӧрта сэтчӧ став няньӧс да ассьым став эмбурӧс.

¹⁹ Сэки шуа аслым: уна эмбур тэнад чӧжӧма, тырмас уна во кежлӧ – шойччы, сёй, ю да гажӧдчы!”

²⁰ А Ен шуас сылы: ”Вежӧртӧмӧй, тавой босьтасны тэнсьыд ловтӧ. Кодлы коляс тэнад чӧжӧмаыд?”

²¹ Тадзи лоӧ быдӧнкӧд, коді аслыс чукӧртӧ озырлунсӧ, а оз Енсянь озырмӧдчы».

Энӧ майшасьӧй

²² Исус шуис велӧдчысьясыслы: «Та вӧсна шуа тіянлы: энӧ майшасьӧй сёян да паськӧм вӧсна.

²³ Олӧмныд ӧд донаджык сёянысь, вир-яйныд – паськӧмысь.

²⁴ Видзӧдлӧй кырнышъяс вылӧ: найӧ оз кӧдзны, оз вундыны, налӧн абу йӧртӧдъяс, абу эмбур видзанінъяс, но Енмыс вердӧ найӧс. Кымын пӧв ті донаджыкӧсь лэбачьясысь!

²⁵ Вермас-ӧ тіян пиысь кодкӧ зільӧмӧн-тӧждысьӧмӧн нюжӧдыштны ассьыс олан нэмсӧ?

²⁶ Ті кӧ весиг ичӧтикторсӧ онӧ вермӧй, мыйла мукӧдторйыс вӧсна майшасянныд?

²⁷ Видзӧдлӧй видз вылын быдмысь дзоридзьяс вылӧ: найӧ оз мырсьыны, оз печкыны. Висьтала тіянлы: ачыс Соломон став озырлун дырйиыс эз пасьтасьлы весиг ӧти татшӧм дзоридзысь мичаджыка.

²⁸ Енмыс кӧ тадзи пасьтӧдӧ видзвыв турунӧс, коді талун быдмӧ, а аски веськалӧ пачӧ, оз ӧмӧй Сійӧ пасьтӧд тіянӧс, этша эскысьяс!

²⁹ Энӧ корсьысьӧй, мый сёйны-юны. Энӧ майшасьӧй та вӧсна.

³⁰ Тайӧ ставыс майшӧдлӧ ентӧдтӧмъясӧс. Но тіян Батьныд тӧдӧ, мый тайӧ колӧ тіянлы.

³¹ Корсьӧй Енлысь Юралӧмсӧ, сэки тіян ставыс тайӧ лоӧ.

³² Эн пов, ичӧт чукӧр! Ӧд тіян Батьныд шуис сетны тіянлы Юралӧм.

³³ Вузалӧй ассьыныд овмӧстӧ, сьӧмсӧ сетӧй гӧльяслы. Лӧсьӧдӧй аслыныд важмытӧм видзанінъяс да чӧжӧй бырлытӧм озырлун енэжӧ. Сэтчӧ гусясьысь оз пыр да сэні воз оз сёй.

³⁴ Кӧні ӧд озырлунныд, сэні лоӧ и сьӧлӧмныд».

Ыджыднысӧ виччысьысьяс

³⁵ «Вӧнясьӧй да ӧзтӧй бинытӧ.

³⁶ Лоӧй кесйӧгъяс кодьӧсь, кодъяс виччысьӧны асланыс ыджыдлысь кӧлысь вылысь локтӧмсӧ. Воӧм бӧрас ыджыдныс тотшкӧдчас ӧдзӧсас, да найӧ пырысь-пыр восьтасны.

³⁷ Кесйӧгъяс шудаӧсь, ыджыдыс кӧ гортас воигӧн аддзас, мый найӧ виччысьӧны сійӧс. Веськыда висьтала тіянлы: ыджыдыс сэки вӧнясяс, корас кесйӧгъяссӧ пызан сайӧ да ачыс пондас кесъявны налы.

³⁸ Ыджыдыс кӧ воас весиг войшӧрнас либӧ войшӧр бӧрас да аддзас, мый кесйӧгъясыс виччысьӧны сійӧс – тайӧ кесйӧгъясыс шудаӧсь!

³⁹ Ті гӧгӧрвоанныд тайӧс: керка кутысь кӧ тӧдіс гусясьысьлысь локтан кадсӧ, сэки эськӧ эз узь да эз лэдз керкаас.

⁴⁰ Лоӧй дасьӧсь, ӧд Морт Пи локтас виччысьтӧг».

Бур кесйӧг да шогмытӧм кесйӧг йылысь велӧданвисьт

⁴¹ Петыр юаліс: «Господьӧй, тайӧ велӧданвисьтсӧ висьталан миянлы али быдӧнлы?»

⁴² Господь шуис: «Лоӧй эскана да мывкыд кесйӧг кодьӧсь. Татшӧмсӧ ыджыдыс пуктас веськӧдлыны мукӧд кесйӧгъясӧн, медым ас кадӧ сетны налы сёян-юан.

⁴³ Кесйӧгыс шуда, ыджыдыс кӧ гортас воигӧн аддзас сійӧс тадзи вӧчӧмӧн.

⁴⁴ Збыльысь висьтала тіянлы: ыджыдыс пуктас сійӧс веськӧдлыны став аслас овмӧсӧн.

⁴⁵ Но кесйӧгыс вермас мӧвпыштны: ”Ыджыдӧй дыр на оз лок”. Сійӧ пондас нӧйтны мукӧд кесйӧгъясӧс, сёйны-юны да кодавны.

⁴⁶ Но виччысьтӧм лунӧ, лӧсявтӧм кадӧ, кесйӧглӧн ыджыдыс воас. Сійӧ кералас кесйӧгсӧ да шыбитас сійӧс эскытӧмъяс дінӧ.

⁴⁷ Кесйӧг кӧ тӧдӧ ыджыдыслысь кӧсйӧмсӧ да оз дасьтысь-вӧч сы ног, сійӧс чорыда нӧйтасны.

⁴⁸ А тӧдтӧг кӧ вӧчас мыжсӧ, сійӧс нӧйтасны этшаджык. Кодлы уна сетӧма, сылысь уна корасны. Кодлы уна эскӧма, сылысь уна юаласны».

Исус вайис торйӧдӧм, эз лӧнь олӧм

⁴⁹ «Ме локті би вайны му вылӧ да ёна кӧсъя, медым сійӧ ӧзйис нин.

⁵⁰ Пыртчӧмӧн колӧ Меным пыртчыны, и Ме ёна сьӧкыдала, кытчӧдз тайӧ оз ло.

⁵¹ Ті ног, Ме локті вайны му вылӧ лӧнь олӧм? Эг! Ме локті торйӧдны йӧзсӧ.

⁵² Ӧнісянь ӧти керкаын вит олысь ӧта-мӧдныслы паныд сувтасны: куимыс – кыкыслы паныд, кыкыс – куимыслы.

⁵³ Батьыс паныд сувтас пиыслы, пиыс – батьыслы, мамыс – нылыслы, нылыс – мамыслы, энькаыс – моньыслы, моньыс – энькаыслы».

Кадлӧн пасъяс

⁵⁴ Исус висьталіс йӧзыслы: «Рытыввывсянь кыпӧдчысь кымӧр аддзигӧн ті шуанныд, зэрмас пӧ. Тайӧ тадзи.

⁵⁵ Лун тӧв кӧ петас, шуанныд, пӧжны пӧ кутас. Тадзи и эм.

⁵⁶ Кык бана шаньгаяс! Енэжлысь да мулысь чужӧмбансӧ кужанныд тӧдмавны. А мыйла ӧнія кадсӧ онӧ вермӧй тӧдны?»

Мыжалыськӧд бурасьӧм

⁵⁷ «Мыйла асьныд онӧ вермӧй гӧгӧрвоны, кыдзи колӧ вӧчнысӧ?

⁵⁸ Ковмас кӧ мунны ёрдӧ, зіль бурасьны тэнӧ мыжалыськӧд ёрдӧ вотӧдзыд на. Он кӧ вӧч тадзи, сійӧ нуӧдас тэнӧ ёрдысь дінӧ, ёрдысь сетас тэнӧ шыпурталы, а сійӧ йӧртас тэнӧ дзескыдінӧ.

⁵⁹ Висьтала тэныд: бӧръя сьӧмтӧ сеттӧдз он пет сэтысь».