Лука 10 - Коми Библия 2023

Исус мӧдӧдӧ сизимдас велӧдчысьӧс

¹ Та бӧрын Господь бӧрйис нӧшта сизимдас велӧдчысьӧс, сэсся кыкӧн-кыкӧн мӧдӧдіс найӧс кар-сиктъясӧ, кытчӧ кӧсйис Ачыс мунны.

² Сійӧ шуис налы: «Вунданыс уна, а вундысьыс этша. Кевмӧй вунданінын Ыджыдыслы, мед ыстас Аслас вунданінӧ уджалысьясӧс.

³ Мунӧй! Ме мӧдӧда тіянӧс баляпиянӧс моз кӧинъяс пӧвстӧ.

⁴ Энӧ босьтӧй аскӧдныд сьӧм, ноп да кӧм. Туй выланыд энӧ сувтӧй чолӧмасьны йӧзкӧд.

⁵ Керкаӧ пыриганыд медводз шуӧй: ”Лӧнь олӧм тайӧ керкаыслы!”

⁶ Сэні кӧ олӧ бур сьӧлӧма морт, бурсиӧмныд коляс сылы. Оз кӧ, бурсиӧмныд бӧр бергӧдчас тіянлы.

⁷ Кольччӧй сійӧ керкаас, сёйӧй-юӧй мый тіянлы сетасны, ӧд уджалысьлы мынтысьӧны уджыс серти. Энӧ вуджӧй мӧд керкаӧ.

⁸ Карӧ пыриганыд кӧ тіянӧс сибӧдасны, сёйӧй мый тіянлы сетасны.

⁹ Бурдӧдалӧй сэні висьысьясӧс да юӧртӧй: ”Енлӧн Юралӧмыс воис тіянӧдз”.

¹⁰ Оз кӧ сибӧдны карас, туйяс кузя ветлӧмӧн юӧртӧй:

¹¹ ”Буссӧ, мый кӧласис коканым тіян карын, ми бӧр пыркӧдам тіянлы. Тӧдӧй, мый Енлӧн Юралӧмыс матын”.

¹² Висьтала тіянлы: мыждан лунӧ Содом карлы лоас кокньыдджык сійӧ карыслы дорысь».

Эскытӧмъясӧс мыжалӧм

¹³ «Курыд шог тэныд, Коразин кар! Курыд шог тэныд, Випсаида кар! Тир да Сидон каръясын кӧ аддзылісны тіянын кодь вӧчӧм шензьӧданаторъяссӧ, сэки эськӧ сэтчӧс олысьясыс важӧн нин бергӧдчисны мыжъяссьыныс, шогалан паськӧм пасьталісны да юрнысӧ пӧимӧн коялісны.

¹⁴ Мыждан лунӧ Тир да Сидон каръяслы лоас кокньыдджык тіянлы дорысь.

¹⁵ Тэ, Капернаум кар, чайтан енэжӧдз кыпӧдчыны? Ад пыдӧсӧдз усян!

¹⁶ Тіянӧс кывзысь Менӧ кывзӧ, тіянӧс ӧтдортысь Менӧ ӧтдортӧ, а Менӧ ӧтдортысь ӧтдортӧ Менӧ Мӧдӧдысьӧс».

Велӧдчысьяс воӧны бӧр

¹⁷ Сизимдас велӧдчысь бӧр воисны нимкодясигтыр да шуисны: «Господьӧй, Тэнад нимӧн тшӧктігӧн весиг пеж ловъяс кывзысьӧны миянлысь».

¹⁸ Исус шуис налы: «Ме аддзылі сӧтаналысь чардби моз енэжсянь усьӧмсӧ.

¹⁹ Со, Ме сета тіянлы вын талявны змейясӧс, скорпионъясӧс да омӧльыслысь став вынсӧ, и тіянӧс нинӧм оз дойд.

²⁰ Энӧ нимкодясьӧй сыысь, мый пеж ловъяс кывзысьӧны тіянлысь, а нимкодясьӧй сыысь, мый тіянлысь нимъяснытӧ гижӧма енэжас».

Исус ошкӧ Ен Батьсӧ

²¹ Сэки Исус тырис Вежа Ловсянь нимкодьлунӧн да шуис: «Ошка Тэнӧ, Батьӧй, енэжыс да муыс вылын Ыджыдалысьӧс! Тэ дзебин тайӧс сюсь вежӧраясысь да восьтін кага коддьӧмлы. Татшӧм вӧлі Тэнад бур кӧсйӧмыд, Батьӧй».

²² Исус висьталіс велӧдчысьясыслы: «Ставсӧ сетіс Меным Батьӧй. Сӧмын Батьыс тӧдӧ, коді Пиыс, и сӧмын Пиыс тӧдӧ, коді Батьыс. Тӧдӧ нӧшта сійӧ, кодлы Пиыс кӧсйӧ восьтны Батьсӧ».

²³ Сэсся велӧдчысьясыс дінӧ бергӧдчӧмӧн Исус торйӧн шуис налы: «Шудаӧсь найӧ, кодъяслӧн синмыс аддзӧ, мый ті аддзанныд!

²⁴ Висьтала тіянлы: уна пророк да ӧксы кӧсйисны аддзывны, мый ті аддзанныд, но эз аддзывны. Кӧсйисны кывны, мый ті кыланныд, но эз кывлыны».

Самарияса бур сьӧлӧма морт

²⁵ Индӧдӧ велӧдысьясысь ӧти Исусӧс кыйӧм могысь юаліс: «Велӧдысь, мый меным колӧ вӧчны, мед вичмис меным помтӧм олӧм?»

²⁶ Исус юаліс сылысь: «Мый гижӧма Индӧдас? Мый сэтысь лыддян?»

²⁷ Индӧдӧ велӧдысь вочавидзис: «Радейт Господьӧс, ассьыд Ентӧ, став сьӧлӧмнад, став олӧмнад, став выннад да став мывкыднад, и матыссатӧ радейт асьтӧ моз».

²⁸ Исус шуис сылы: «Бура вочавидзин. Вӧч тадзи, сэки кутан овны».

²⁹ Асьсӧ дорйӧм могысь Индӧдӧ велӧдысь юаліс Исуслысь: «Коді меным матыссаыс?»

³⁰ Исус вочавидзис тадзи: «Ӧти морт ветлас Ерусалимысь Ерикон карӧ. Туяс сійӧ веськалас лёк вӧчысьяс киӧ. Найӧ пӧрччӧдасны сійӧс, вирӧдз нӧйтасны да колясны туй вылас куланвыйын.

³¹ Сійӧ туйӧдыс мунас поп, казялас нӧйтӧм мортӧс да туй мӧдарас вуджас.

³² Сы моз вӧчас тшӧтш левит: воас сэтчӧ, аддзас нӧйтӧм мортӧс да вуджас туй мӧдарас.

³³ Сэсся мунас сэті самарияса олысь. Нӧйтӧм мортӧс аддзас да, сьӧлӧмыс сылӧн нормас.

³⁴ Матыстчас сы дінӧ, дойяссӧ мыськалас винаӧн, мавтас выйӧн да кӧртавлас. Пуксьӧдас сійӧс аслас осёл вылӧ да ваяс туйморт керкаӧ, сэні тӧждысяс сы вӧсна.

³⁵ Аскинас самарияса морт сетас туйморт керка кутысьлы кык динар да шуас: ”Тӧждысь сы вӧсна. Оз кӧ тырмы, локтӧм бӧрын содтӧд мынтыся”.

³⁶ Тэ ногӧн, коді тайӧ куим письыс нӧйтӧм мортыслы матыссаыс?»

³⁷ Индӧдӧ велӧдысь вочавидзис: «Сылы бур вӧчысьыс». Исус шуис сылы: «Мун да тшӧтш тадзи вӧч».

Марпа да Марья

³⁸ Исус велӧдчысьясыскӧд муніс водзӧ да пырис ӧти сиктӧ. Сэні Марпа нима ань корис Исусӧс гортас.

³⁹ Марпалӧн вӧлі Марья нима чой. Сійӧ пуксис Господь Исуслӧн кок дорӧ да кутіс кывзыны Сылысь висьталӧмсӧ.

⁴⁰ Марпа унатор вӧсна котраліс-тӧждысис. Сэсся Исус дінӧ матыстчӧмӧн шуис: «Господьӧй, Тэныд ӧмӧй веськодь, мый чойӧй менӧ ӧтнамӧс колис тӧждысьнысӧ. Висьтав сылы, мед отсалас меным».

⁴¹ Господь Исус вочавидзис: «Марпа, Марпа, тэ тӧждысян-мырсян унатор вӧсна,

⁴² а коланаыс сӧмын ӧтитор. Марья бӧрйис бурджыксӧ, и тайӧс сылысь оз мырддьыны».