Лука 1 - Коми Библия 2023

^1-3 Пыдди пуктана Феофил! Унаӧн нин босьтчылісны гижны миянын вӧвлӧмторъяс йылысь. Та йылысь миянлы юӧртісны найӧ, кодъяс ставсӧ аддзылісны да лоисны Ен кывлы кесъялысьясӧн. Водзысяньыс ставсӧ лючки-бура туялӧм бӧрын ме тшӧтш шуи гижны тэныд став йывсьыс сьӧрсьӧн-бӧрсьӧн.

⁴ Тэныд вӧлі висьталӧма тайӧ вӧвлӧмторъяс йывсьыс, но ме кӧсъя подулалӧмӧн петкӧдлыны тэныд Бур Юӧрлысь збыльсӧ.

Андел юӧртӧ Иоанлӧн чужӧм йылысь

⁵ Ирӧд ӧксыалан лунъясӧ Иудея муын оліс Закар нима поп, сійӧ вӧлі Авий поп котырысь. Закарлӧн Елизавета гӧтырыс вӧлі Аарон чужанвужйысь.

⁶ Найӧ кыкнанныс олісны Ен водзын веськыда, ставсӧ вӧчисны Господьлӧн тшӧктӧм серти.

⁷ Челядьыс налӧн эз вӧв, ӧд Елизавета эз вермы вайны кагасӧ, да и кыкнанныс вӧліны нин ыджыд арлыдаӧсь.

⁸ Воис кад Закар котырлы кесъявны Ен водзын.

⁹ Попъяслӧн лӧсьӧдӧм серти пудъясисны, и Закар пырис Господьлӧн крамӧ тшынӧдчыны.

¹⁰ Закарлӧн тшынӧдчигкості став йӧзыс кевмысисны крам ортсыас.

¹¹ Та дырйи Закарлы петкӧдчис Господьлӧн андел, коді сулаліс тшынӧдчан висьпуктанін веськыдладорын.

¹² Анделӧс аддзӧмысь Закар шӧйӧвошис, сійӧс полӧм босьтіс.

¹³ Андел шуис: «Эн пов, Закар! Енмыс кылӧма тэнсьыд кевмӧмтӧ. Елизавета гӧтырыд чужтас тэныд пи. Пукты сылы Иоан ним.

¹⁴ Долыд гажӧн тырас тэнад сьӧлӧмыд, уна йӧзлы нимкодьлун ваяс сылӧн чужӧмыс.

¹⁵ Господь водзын сійӧ лоас ыджыд мортӧн, вина-сур оз кут юны, мам кынӧмас на сійӧ тырас Вежа Лолӧн.

¹⁶ Израиль войтырысь сійӧ унаӧс бергӧдас налӧн Господь Енлань.

¹⁷ Сійӧ мунас Господь водзын Илля лов-вынӧн, бергӧдас батьяслысь сьӧлӧмсӧ ныв-пиланьыс, кывзысьтӧмъясӧс – веськыда олысьлӧн мывкыдлунӧ, медым дасьтыны войтырсӧ Господьлы».

¹⁸ Закар юаліс анделлысь: «Кыдзи ме тӧдмала тайӧс? Ачым пӧрысь, дай гӧтырӧй абу нин том».

¹⁹ Андел вочавидзис: «Ме, Гавриил, сулала Ен водзын. Менӧ мӧдӧдӧма сёрнитны тэкӧд, висьтавны тайӧ Бур Юӧрсӧ тэныд.

²⁰ Но меным эскытӧмыдла тэ воштан кыв-вортӧ, менам кывъяслӧн ас кадӧ интӧдз он вермы сёрнитнытӧ».

²¹ Сэккості йӧзыс виччысисны Закарӧс да шензисны крамын сылӧн нюжмасьӧмысь.

²² Крамысь петӧм бӧрын Закар эз вермы сёрнитнысӧ. Йӧзыс гӧгӧрвоисны, мый сійӧ аддзылӧма Енсянь петкӧдчылӧм. Закар сёрнитіс йӧзыскӧд пасъясӧн.

²³ Кесъялан лунъяс бӧрын Закар локтіс гортас.

²⁴ Елизавета гӧтырыс регыд пондіс нӧбасьны. Вит тӧлысь чӧж сійӧ эз петкӧдчыв йӧз син водзӧ, оліс татшӧм мӧвпъясӧн:

²⁵ «Господь вӧчис тайӧс. Сійӧ бергӧдчис мелань да вештіс менсьым йӧз водзын яналӧмӧс».

Андел юӧртӧ Исуслӧн чужӧм йылысь

²⁶ Елизаветалӧн нӧбасигас квайтӧд тӧлысьнас Ен мӧдӧдіс Гавриил анделӧс Назаретӧ, галилеяса карӧ,

²⁷ Мария нима ныв дінӧ. Мария вӧлі кикутӧма Давид чужанвужйысь Ӧсип нима морткӧд.

²⁸ Мария дінӧ пырӧм бӧрын андел шуис: «Нимкодясь, бурсиӧм аньӧй! Господь тэкӧд!»

²⁹ Мария чуймис анделӧс аддзӧмысь да сылӧн кывъясысь. Сійӧ мӧвпаліс, мый водзын нӧ сылы татшӧм чолӧмалӧмыс.

³⁰ Андел шуис сылы: «Эн пов, Мария, тэныд вичмис Енсянь буралӧм.

³¹ Тэ сьӧктан, чужтан пи да пуктан Сылы Исус ним.

³² Ыджыд морт Сыысь петас, Сійӧс шуасны Медвылыссалӧн Пиӧн. Господь Ен сетас Сылы Давид батьыслысь юралан пуклӧссӧ.

³³ Сійӧ кутас ыджыдавны Яков котырын нэмъяс чӧж, да Сылӧн Юралӧмлы оз ло помыс».

³⁴ Мария юаліс анделлысь: «Вермас ӧмӧй тадзисӧ лоны, ме ӧд ныв на?»

³⁵ Андел вочавидзис: «Вежа Лов лэччас тэ вылӧ, Медвылыссалӧн выныс вевттяс тэнӧ. Та вӧсна тайӧ чужысьыс вежа, Сійӧс шуасны Ен Пиӧн.

³⁶ Тэнад рӧдвужыд, ныв-питӧм Елизавета, пӧрысьӧ-нэмӧ квайтӧд тӧлысь нин пиӧн нӧбасьӧ.

³⁷ Енлы нинӧм вермытӧмыс абу».

³⁸ Сэки Мария шуис: «Ме Господьлӧн кесйӧг, мед лоас тэнад висьталӧм серти». Сэсся андел муніс.

Мария Елизавета ордын

³⁹ Кымынкӧ лун мысти Мария тэрмасьӧмӧн мӧдӧдчис керӧсвыв муӧ, Иуда карӧ.

⁴⁰ Закар керкаӧ пыригӧн сійӧ чолӧмаліс Елизаветаӧс.

⁴¹ Мариялӧн чолӧмалӧмысь Елизаветалӧн кынӧмас кагаыс чеччыштліс. Елизавета тырис Вежа Лолӧн

⁴² да гораа шыасис: «Бурсиӧма тэнӧ аньяс пиысь, бурсиӧма сьӧлӧмув кагатӧ!

⁴³ Коді нӧ ме сэтшӧмыс, мый Господьӧйлӧн мамыс локтӧ ме ордӧ?

⁴⁴ Мыйӧн сӧмын кылі чолӧмасьӧмтӧ, кагаӧй нимкодьысла чеччыштліс кынӧмын.

⁴⁵ Тэ шуда, эскин да, ӧд Господьлӧн тэныд шуӧмыс инас».

Мариялӧн ошкӧм

⁴⁶ Мария шуис: – Ошкӧ сьӧлӧмӧй Господьӧс,

⁴⁷ нимкодясьӧ лолӧй Ен вӧсна, Мездысьӧй вӧсна,

⁴⁸ ӧд Сійӧ видзӧдліс Аслас коньӧр кесйӧглань. Ӧнісянь став чужысьыс шуас менӧ шудаӧн,

⁴⁹ ӧд татшӧм ыджыдтор вӧчис меным Вынаыс. Сылӧн нимыс вежа!

⁵⁰ Чужысьяссянь чужысьясӧдз Сылӧн буралӧмыс вуджӧ Сыысь полысьяс дінӧ.

⁵¹ Сылӧн киыс вӧчис ыджыдсьыс-ыджыд уджъяс: ыкша сьӧлӧмаясӧс разӧдіс,

⁵² юралан пуклӧсысь юралысьясӧс чӧвтіс, улӧ пуктӧмаясӧс кыпӧдіс,

⁵³ тшыгъялысьясӧс пӧттӧдзныс вердіс, озыръясӧс куш киӧн мӧдӧдіс.

⁵⁴ Сійӧ сибӧдіс Израильӧс, Ассьыс кесъялысьсӧ, эз вунӧд Ассьыс буралӧмсӧ,

⁵⁵ мый кӧсйысис сетны нэмъяс кежлӧ Ӧвраамлы да сысянь чужысьяслы. Тадзи Сійӧ висьталіс миян батьяслы.

⁵⁶ Мария оліс Елизавета ордын тӧлысь куим, сэсся бӧр муніс гортас.

Пыртысь Иоанлӧн чужӧм

⁵⁷ Елизаветалы воис кад чужтыны, да сійӧ чужтіс пи.

⁵⁸ Матігӧгӧр олысьяс да рӧдвужыс тӧдмалісны Господьлысь буралӧмсӧ Елизавета дінӧ да тшӧтш нимкодясисны сыкӧд.

⁵⁹ Кӧкъямысӧд луннас локтісны вундыштны кагасӧ да кӧсйисны сетны сылы Закар батьыслысь нимсӧ.

⁶⁰ Мамыс шуис: «Энӧй. Пуктам сылы Иоан ним».

⁶¹ Сылы шуисны: «Тэнад рӧдвужын татшӧм нимаыс некод абу».

⁶² Сэсся пасъяс отсӧгӧн юалісны батьыслысь, кутшӧм ним сійӧ кӧсйӧ сетны кагаыслы.

⁶³ Закар корис пӧвтор да сэтчӧ гижис: «Иоан лоӧ нимыс». Ставныс чуймисны.

⁶⁴ Сэки воссис Закарлӧн кыв-ворыс, да сійӧ кутіс ошкыны Енмӧс.

⁶⁵ На гӧгӧр олысьясӧс полӧм босьтіс. Став тайӧ лоӧмтор йывсьыс сёрниыс паськаліс керӧсвыв Иудея му пасьтала.

⁶⁶ Тайӧс кывлысьяс чуймӧмӧн юасисны: «Кодӧн лоӧ тайӧ кагаыс?» Господьлӧн киыс збыльысь вӧлі сы вылын.

Закарлӧн ошкӧм

⁶⁷ Кагалӧн Закар батьыс тырис Вежа Лолӧн да пондіс пророкавны:

⁶⁸ – Ошка Господьӧс, Израильлысь Енсӧ! Сійӧ бергӧдчис Аслас войтырлань, дасьтіс сылы мездмӧм.

⁶⁹ Давид кесъялысьыслӧн чужанвужйысь Сійӧ сетіс миянлы Вына Мездысьӧс.

⁷⁰ Тадзи важысянь Сійӧ кӧсйысьліс Аслас вежа пророкъяс пыр.

⁷¹ Сійӧ кӧсйысис мездыны миянӧс дзескӧдысьясысь, дорйыны мустӧмтысьяс киысь,

⁷² лоны бур сьӧлӧмаӧн миян батьяс дінӧ да кутны тӧд вылас Ассьыс вежа йитӧдсӧ,

⁷³ Ӧвраам батьнымлы Ассьыс сетӧм кывсӧ.

⁷⁴ Мустӧмтысьясысь мездмӧм бӧрын ми вермам повтӧг

⁷⁵ кесъявны Сылы вежалунӧн да веськыда став олӧм чӧжным.

⁷⁶ Тэнӧ, кагаӧй, пуктасны Медвылыссалӧн пророкӧ. Тэ мунан Господь водзын дасьтыны туйсӧ Сылы,

⁷⁷ юӧртны Сылӧн войтырлы мездмӧм йылысь да налысь мыжъяссӧ прӧститӧм йылысь.

⁷⁸ Миян бур сьӧлӧма Ен ыстас миянлы енэжсянь асъя кыа,

⁷⁹ сетас югыдсӧ пемыдын олысьяслы, кулӧмыслӧн вуджӧр улын пукалысьяслы, Сійӧ веськӧдас кокнымӧс лӧньлуна туй вылӧ.

⁸⁰ Кага быдмис да ловнас вынсяліс. Израильлы аслас петкӧдчан лунӧдз сійӧ оліс овтӧминын.