Левит 9 - Коми Библия 2023

Аарон вайӧ висьяс

¹ Кӧкъямысӧд луннас Мӧисей чукӧстіс Ааронӧс, сылысь пиянсӧ да израильса юрнуӧдысьясӧс.

² Ааронлы сійӧ шуис: «Мыжысь вись пыдди вайӧд дзоньвидза ӧшпиӧс, сотан вись пыдди – дзоньвидза межӧс. Сувтӧд найӧс Господь водзӧ.

³ Израиль пиянлы висьтав, мед вайӧдасны мыжысь вись пыдди ай кӧзаӧс, а сотан вись пыдди – арӧса да дзоньвидза [межӧс,] ӧшкӧс да баляӧс.

⁴ Бурасян вись пыдди мед вайӧдасны Господь водзӧ ӧшкӧс да межӧс, нӧшта мед ваясны выйӧн гудралӧм нянь вись. Талун Господь петкӧдчас тіянлы».

⁵ Израиль пиян вайисны вежа чом водзӧ ставсӧ, мый тшӧктіс Мӧисей. Став войтырыс локтіс да сувтіс Господь водзӧ.

⁶ Мӧисей шыасис: «Господь тадзи тшӧктіс вӧчны, медым тіянлы петкӧдчас Господьлӧн дзирдлуныс».

⁷ Ааронлы Мӧисей шуис: «Матыстчы висьпуктанін дорӧ да вай мыжысь висьтӧ да сотан висьтӧ, медым вештыны ассьыд мыжтӧ да войтырлысь мыжсӧ. Сэсся вай войтырлысь висьсӧ, медым вештыны налысь мыжсӧ, кыдзи тшӧктіс Господь».

⁸ Аарон матыстчис висьпуктанін дорӧ, начкис ӧшпиӧс, медым мыжысь вись вайны ас вӧснаыс.

⁹ Ааронлӧн пияныс сетісны сылы висьлысь вирсӧ. Чуньсӧ вирӧн кӧтӧдлӧм бӧрын сійӧ мавтыштіс висьпуктанінлысь сюръяссӧ. Коляс вирсӧ койыштіс висьпуктанін улӧ.

¹⁰ Мыжысь висьлысь госсӧ, вӧркъяссӧ да мус вывсьыс госа юкӧнсӧ сотіс висьпуктанін вылын. Тадзи Господь тшӧктіс Мӧисейлы.

¹¹ Яйсӧ да кучиксӧ сотіс биын чомъяс сайын.

¹² Сэсся Аарон начкис сотан вись. Сылӧн пияныс мыччисны сылы висьлысь вирсӧ. Вирнас сійӧ резіс висьпуктанінсӧ быд боксянь.

¹³ Ааронлӧн пияныс мыччисны сылы висьлысь юрсӧ да кералӧм яйсӧ, и сійӧ сотіс ставсӧ висьпуктанін вылын.

¹⁴ Сійӧ мыськаліс висьлысь пытшкӧссӧ да кокъяссӧ, сотіс найӧс сотан виськӧд висьпуктанін вылын.

¹⁵ Аарон вайис войтырлысь висьсӧ. Сійӧ босьтіс войтырлӧн мыжысь вись пыдди вайӧм ай кӧзаӧс, начкис сійӧс да воддза вись мозыс вайис мыжысь вись пыдди.

¹⁶ Сэсся вайӧдіс мӧд пемӧсӧс да вайис сотан вись пыдди, кыдзи тшӧктӧма.

¹⁷ Асъя сотан висьысь ӧтдор вайис нянь вись. Нянь висьысь китыр пызь сотіс висьпуктанін вылын.

¹⁸ Аарон начкис ӧшкӧс да межӧс, кодъясӧс войтырыс вайис бурасян вись пыдди. Ааронлӧн пияныс мыччисны сылы вирсӧ, и сійӧ резіс висьпуктанінсӧ быд боксянь.

¹⁹ Пияныс мыччисны и ӧшлысь госсӧ, межлысь бӧждор госсӧ, пытшкӧс госсӧ, вӧркъяссӧ да мус вывсьыс госа юкӧнсӧ.

²⁰ Госсӧ пуктісны морӧсвыв яй вылӧ, та бӧрын Аарон сотіс госсӧ висьпуктанін вылын.

²¹ Морӧсвыв яйсӧ да веськыдладор задвыв яйсӧ Аарон вайис Господь водзын пыркӧдан вись пыдди, кыдзи тшӧктіс Мӧисей.

²² Аарон лэптіс ассьыс кисӧ войтырлань да бурсиис найӧс. Мыжысь вись, сотан вись да бурасян вись вайӧм бӧрын Аарон лэччис

²³ да Мӧисейкӧд пырис вежа чомйӧ. Сэсся сэтысь петӧм бӧрын найӧ бурсиисны войтырсӧ. Сэки Господьлӧн дзирдлуныс петкӧдчис став войтырлы.

²⁴ Господьсянь петіс би да сотіс висьпуктанін вылысь сотан висьсӧ да госсӧ. Тайӧс аддзӧм бӧрын войтырыс нимкодьысла горӧдіс да кымынь уськӧдчис муӧ.