Левит 8 - Коми Библия 2023

Ааронӧс да сылысь пиянсӧ попъясӧ пуктӧм

¹ Господь шуис Мӧисейлы:

² «Босьт аскӧдыд Ааронӧс да сылысь пиянсӧ, налысь попӧн кесъялан паськӧмсӧ, мавтыштан вый, мыжысь вись пыдди ваян ӧшкӧс, кык межӧс да куд тыр шомтӧм нянь.

³ Чукӧрт став войтырсӧ вежа чом пыранін дорӧ».

⁴ Мӧисей вӧчис Господьлӧн тшӧктӧм серти. Кор став войтырыс чукӧртчис вежа чом пыранін дорӧ,

⁵ Мӧисей шыасис на дінӧ: «Тадзи тшӧктіс вӧчны Господь».

⁶ Мӧисей вайӧдіс Ааронӧс пияныскӧд да мыссьӧдіс найӧс ваӧн.

⁷ Ааронӧс дӧрӧмӧдіс да вӧньӧдіс, пасьтӧдіс риза да ефод, ефод вывтіыс вӧньӧдіс.

⁸ Сэсся пасьтӧдіс морӧсводз, морӧсводзас сюйис урим да туммим.

⁹ Юр вылас пуктіс юркӧртӧд. Юркӧртӧд водзладорас пысаліс шыльӧдӧм зарни пӧвтор – вежа мичмӧдчантор. Тадзи Господь тшӧктіс Мӧисейлы.

¹⁰ Сэсся Мӧисей босьтіс мавтыштан вый да мавтыштіс вежа чомсӧ да ставсӧ, мый сэні вӧлі. Тадзи вежӧдіс ставсӧ.

¹¹ Висьпуктанінсӧ сизимысь резіс выйӧн, мавтыштіс сійӧс да став дозмук-кӧлуйсӧ, тшӧтш мыссян дозсӧ да сылысь коксӧ. Тадзи вежӧдіс найӧс.

¹² Ааронлы юр вылас Мӧисей кисьтіс мавтыштан вый. Тадзи мавтыштіс да вежӧдіс сійӧс.

¹³ Сэсся вайӧдіс Ааронлысь пиянсӧ, дӧрӧмӧдіс да вӧньӧдіс найӧс, юр выланыс пуктіс юрвевттьӧд. Тадзи Господь тшӧктіс Мӧисейлы.

¹⁴ Мыжысь вись вайӧм могысь Мӧисей вайӧдіс ӧшкӧс. Аарон да сылӧн пияныс пуктылісны кинысӧ ӧшлы юр вылас.

¹⁵ Мӧисей начкис ӧшсӧ, сэсся чуньсӧ кӧтӧдіс ӧш вирнас да мавтыштіс висьпуктанінлысь сюръяссӧ быд боксянь, медым сӧстӧммӧдны висьпуктанінсӧ. Коляс вирсӧ койыштіс висьпуктанін улӧ. Тадзи Мӧисей вежӧдіс-сӧстӧммӧдіс висьпуктанінсӧ.

¹⁶ Сэсся Мӧисей босьтіс ӧшпилысь пытшкӧс госсӧ, мус вывсьыс госа юкӧнсӧ, кыкнан вӧрксӧ госнас да сотіс висьпуктанін вылын.

¹⁷ А ӧшлысь яйсӧ, кучиксӧ да сювсӧ сотіс чомъяс сайын. Тадзи Господь тшӧктіс Мӧисейлы.

¹⁸ Сотан вись вайӧм могысь Мӧисей вайӧдіс межӧс. Аарон да сылӧн пияныс пуктылісны кинысӧ межлы юр вылас.

¹⁹ Мӧисей начкис межсӧ да резіс сылӧн вирнас висьпуктанінсӧ быд боксянь.

²⁰ Сэсся кераліс межсӧ да сотіс юрсӧ, яйторъяссӧ да госсӧ.

²¹ Межлысь пытшкӧссӧ да кокъяссӧ ваӧн мыськалӧм бӧрын сотіс став межсӧ висьпуктанін вылын. Тайӧ вӧлі сотан вись, Господьлы чӧскыд ӧвтантор. Тадзи Господь тшӧктіс Мӧисейлы.

²² Попӧ сувтӧдан вись вайӧм могысь Мӧисей вайӧдіс мӧд межӧс. Аарон пияныскӧд пуктылісны кинысӧ межлы юр вылас.

²³ Сэсся Мӧисей начкис межсӧ, босьтіс сылысь вирсӧ да мавтыштіс Ааронлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ.

²⁴ Мӧисей вайӧдіс Ааронлысь пиянсӧ да мавтыштіс вирнас веськыд пельтугнысӧ, веськыд кисьыс певнысӧ да веськыд коксьыс ыджыд чуньнысӧ. Сэсся вирнас резіс висьпуктанінсӧ быд боксянь.

²⁵ Мӧисей босьтіс межлысь бӧждор госсӧ, пытшкӧс госсӧ, мус вывсьыс госа юкӧнсӧ, кыкнан вӧрксӧ госнас да веськыдладор задвыв яйсӧ.

²⁶ Господь водзӧ пуктӧм шомтӧм нянь тыра кудйысь Мӧисей босьтіс ӧти гӧгрӧс нянь, выйӧн гудралӧм нянь да сӧчӧн, пуктіс найӧс меж гос вылӧ да веськыдладор задвыв яй вылӧ.

²⁷ Ставсӧ тайӧс Мӧисей сетіс Ааронлы да сылӧн пияныслы кианыс, а найӧ вайисны ставсӧ Господь водзын пыркӧдан вись пыдди.

²⁸ Сэсся Мӧисей босьтіс тайӧс налӧн киысь да сотіс висьпуктанін вылын сотан виськӧд. Тайӧ вӧлі попӧ сувтӧдан вись, Господьлы чӧскыд ӧвтантор.

²⁹ Мӧисей босьтіс межлысь морӧсвыв яйсӧ да вайис сійӧс Господь водзын пыркӧдан вись пыдди. Тайӧ вӧлі попӧ сувтӧдан вись пыдди вайӧм межысь Мӧисейлӧн пайыс. Тадзи Господь тшӧктіс Мӧисейлы.

³⁰ Сэсся Мӧисей босьтіс мавтыштан вый да висьпуктанін вылысь вир, резіс Ааронӧс, сылысь пиянсӧ да налысь паськӧмнысӧ. Тадзи сійӧ вежӧдіс Ааронӧс, сылысь пиянсӧ да налысь паськӧмнысӧ.

³¹ Мӧисей шуис Ааронлы да сылӧн пияныслы: «Пуӧй яйсӧ вежа чом пыранін дорын. Сэні сёйӧй яйсӧ да кудйысь няньсӧ, мый вайӧма попӧ сувтӧдан виськӧд. Меным вӧлі тшӧктӧма, медым Аарон пияныскӧд сёясны тайӧ висьсӧ.

³² Яй да нянь коляссӧ сотӧй биын.

³³ Сизим лун чӧж энӧ ылыстчӧй вежа чом пыранін дорысь, ӧд тіянӧс попӧ сувтӧдан лунъясыс мунӧны сизим лун чӧж.

³⁴ Талун мый вӧлі вӧчӧма, Господь тшӧктіс вӧчны мыжнытӧ вештӧм могысь.

³⁵ Сизим лун чӧж, лун и вой, олӧй вежа чом пыранін дорын да ставсӧ вӧчӧй Господьлӧн тшӧктӧмъяс серти, медым ті энӧ кулӧй. Тадзи меным тшӧктӧма [Господь Ен]».

³⁶ Аарон пияныскӧд вӧчисны ставсӧ, кыдзи Господь тшӧктіс Мӧисей пыр.