Левит 7 - Коми Библия 2023

Мыж вештан вись йылысь содтӧд индӧд

¹ «Мыж вештан вись йылысь индӧдыс татшӧм. Тайӧ висьыс – вежасьыс-вежатор.

² Сійӧс колӧ начкыны сэні, кӧні начкӧны сотан вись. Сылӧн вирнас колӧ резны висьпуктанінсӧ быд боксянь.

³ Вись пыдди колӧ вайны пемӧслысь став госсӧ: бӧждор госсӧ, ты-мус вывсьыс пытшкӧс госсӧ,

⁴ кыкнан вӧрксӧ госнас да мус вывсьыс госа юкӧнсӧ. Ставсӧ тайӧс мед лоӧ перъялӧма вӧркъяснас.

⁵ Поп мед сотас тайӧс висьпуктанін вылын Господьлы вись пыдди. Тайӧ лоӧ мыж вештан вись.

⁶ Поп рӧдысь став айуловыс вермӧ сёйны мыж вештан висьлысь яйсӧ. Сӧмын колӧ сёйны сійӧс вежаинын, ӧд сійӧ – вежасьыс-вежатор.

⁷ Мыжысь вись да мыж вештан вись йылысь индӧдыс ӧти. Вись яйыс вичмӧ поплы, коді вештас мыжа мортлысь мыжсӧ.

⁸ Пемӧслӧн кульӧм кучикыс вичмӧ сотан вись вайысь поплы.

⁹ Став нянь висьыс, мый пӧжалӧма пачын, рачын либӧ кӧрт лист вылын, вичмӧ вись вайысь поплы.

¹⁰ Мукӧд нянь висьыс, олив выяыс и выйтӧмыс, ӧтмындаӧн вичмӧ Ааронсянь чужысьяслы».

Бурасян вись йылысь содтӧд индӧд

¹¹ «Господьлы ваян бурасян вись йылысь индӧдыс татшӧм.

¹² Аттьӧалана вись вайысь мед ваяс висьыскӧд выйӧн гудралӧм шомтӧм нянь, выйӧн мавтӧм шомтӧм сӧчӧн да шобді пызьысь выйӧн гудралӧм нянь.

¹³ Шомтӧм няньысь ӧтдор аттьӧалана вись вайысь вермас вайны тшӧтш шоммӧдӧм нянь.

¹⁴ Быдсикас няньысь ӧтиӧс вись вайысь мед вайӧ Господьлы, и сійӧ вичмӧ поплы, коді резӧ бурасян вись вирнас.

¹⁵ Аттьӧалӧм могысь вайӧм бурасян висьлысь яйсӧ колӧ сёйны вись ваян лунӧ, асылӧдзыс сійӧс кольны оз позь.

¹⁶ Кыв сетан вись либӧ ас кӧсйӧм серти вайӧм вись колӧ сёйны сійӧ жӧ лунӧ, но коляс кӧ мыйкӧ, сійӧс позьӧ сёйны мӧд луннас на.

¹⁷ Коймӧд лунся яйсӧ колӧ сотны биын.

¹⁸ Коймӧд луннас кӧ сёянныд бурасян висьлысь яйсӧ, висьныд оз ло шогмана. Вись вайысьлы бурыс оз ло. Тайӧ яйыс лоӧ пеж, и коді сёяс сійӧс, лоӧ мыжа.

¹⁹ Яйыс кӧ инмылас мыйкӧ пеж дінӧ, сёйнысӧ сійӧс оз позь. Сійӧс колӧ сотны биын. Бурасян висьлысь яйсӧ позьӧ сёйны быдӧнлы, коді сӧстӧм.

²⁰ А коді пеж, но сёяс Господьлы вайӧм бурасян висьлысь яйсӧ, сійӧс лоӧ бырӧдӧма аслас войтыр пӧвстысь.

²¹ Коді инмӧдчылас мыйкӧ пеж дінӧ – мортлӧн пеж дінӧ, пеж пемӧс дінӧ либӧ пеж нюглясьысь дінӧ – и сёяс Господьлы вайӧм бурасян висьлысь яйсӧ, сійӧс лоӧ бырӧдӧма аслас войтыр пӧвстысь».

²² Господь шуис Мӧисейлы:

²³ «Тшӧкты Израиль пиянлы, мед оз сёйны ӧш-мӧслысь да ыж-кӧзалысь госсӧ.

²⁴ Кулӧм либӧ зверӧн косявлӧм пемӧс госнас вермасны вӧдитчыны овмӧсын, но сёйны сійӧс оз позь.

²⁵ Коді сёяс Господьлы вись пыдди вайӧм пемӧслысь госсӧ, сійӧс лоӧ бырӧдӧма аслас войтыр пӧвстысь.

²⁶ Кӧть кӧні ті кутанныд овны, лэбачлысь ни пемӧслысь вирсӧ энӧ сёйӧй.

²⁷ Вир сёйысьӧс лоӧ бырӧдӧма аслас войтыр пӧвстысь».

²⁸ Господь шуис Мӧисейлы:

²⁹ «Висьтав Израиль пиянлы, мый бурасян вись вайысьлы колӧ сетны Господьлы висьсьыс пай.

³⁰ Аслас киӧн сылы колӧ вайны Господьлы вись пыдди пемӧслысь госсӧ да морӧсвыв яйсӧ [да мус вывсьыс госа юкӧнсӧ]. Морӧсвыв яйсӧ мед ваяс Господь водзын пыркӧдан вись пыдди,

³¹ а госсӧ поп мед сотас висьпуктанін вылын. Морӧсвыв яйыс вичмӧ Ааронлы да сысянь чужысьяслы.

³² Бурасян вись пыдди вайӧм пемӧслысь веськыдладор задвыв яйсӧ сетӧй поплы.

³³ Коді Ааронсянь чужысьяс пӧвстысь висьпуктанін вылын вайӧ вись пыдди бурасян висьлысь вирсӧ да госсӧ, сылы вичмӧ веськыдладор задвыв яйыс.

³⁴ Ӧд Израиль пиянлӧн бурасян висьысь пыркӧдан вись пыдди вайӧм морӧсвыв яйсӧ да кыпӧдлан вись пыдди вайӧм задвыв яйсӧ Ме инді Аарон поплы да сысянь чужысьяслы нэмъяс кежлӧ.

³⁵ Господьлы вайӧм висьлӧн тайӧ юкӧнъясыс вичмӧны Ааронлы да сысянь чужысьяслы сійӧ лунсяньыс, кор найӧс пуктасны попъясӧн кесъявны Господьлы.

³⁶ Сійӧ лунсяньыс, кор Ааронсянь чужысьясӧс мавтыштасны попъясӧ, Израиль пиян мед сетасны налы тайӧ пайсӧ. Тадзи Господь индіс нэмъяс кежлӧ чужысьяссянь чужысьясӧдз».

³⁷ Тайӧ вӧлі сотан вись, нянь вись, мыжысь вись, мыж вештан вись, попӧ сувтӧдан вись да бурасян вись йылысь индӧд.

³⁸ Синай овтӧминын Господь тшӧктіс Израиль пиянлы, мед ваясны Сылы висьяс. Ставсӧ тайӧс Господь висьталіс Мӧисейлы Синай керӧсын.