Левит 5 - Коми Библия 2023

¹ Мортыс кӧ тӧдӧ кодӧскӧ ёрӧм йылысь, но ёрд водзын оз висьтав та йылысь, сійӧ лоӧ мыжа.

² Мортыс кӧ тӧдлытӧг инмӧдчылӧ мыйкӧ пеж дінӧ, пеж пемӧслӧн шой дінӧ, пеж ыж-мӧслӧн шой дінӧ либӧ пеж гаглӧн шой дінӧ, сійӧ лоӧ пеж да мыжа.

³ Коді тӧдлытӧг инмӧдчылӧ мортлӧн пежыс дінӧ, мый вӧсна лоӧ пежӧн, и та йылысь тӧдмалӧ бӧрынджык, сійӧ лоӧ мыжа.

⁴ Коді мӧвпышттӧг кыв сетӧмӧн кӧсйысьӧ вӧчны лёктор либӧ буртор, и оз гӧгӧрво, мый кӧсйысьӧ, но гӧгӧрвоӧ бӧрынджык, сійӧ лоӧ мыжа.

⁵ Коді лои мыжа татшӧмторсӧ вӧчӧмысь, сійӧ мед висьтасяс мыж вӧчӧмсьыс.

⁶ Аслас мыжысь мед ваяс Господьлы мыж вештан вись пыдди ыжӧс либӧ энь кӧзаӧс. Поп мед вештас сылысь мыжсӧ.

⁷ Коді гӧльлун вӧсна оз вермы вайны ыжӧс, мед ваяс Господьлы мыж вештӧм могысь кык гулюӧс либӧ кык гулюпиӧс, ӧтисӧ мыжысь вись пыдди, мӧдсӧ сотан вись пыдди.

⁸ Найӧс мед ваяс поплы. Поп медводз мед песовтас мыжысь вись пыдди ваян гулюлысь голясӧ, но юрсӧ мед оз орӧд.

⁹ Мыжысь висьлӧн вирнас поп мед резас висьпуктанінлысь боксӧ, а коляс вирсӧ мед пычкас висьпуктанін улӧ. Тайӧ лоӧ мыжысь вись.

¹⁰ Мӧд лэбачсӧ мед ваяс сотан вись пыдди, кыдзи тшӧктӧма. Тадзи поп вештас вись вайысьлысь мыжсӧ, и сійӧс лоӧ прӧститӧма.

¹¹ Коді гӧльлун вӧсна оз вермы вайны кык гулюӧс либӧ кык гулюпиӧс, аслас мыжысь вись пыдди мед ваяс шобді пызь – ефалысь дасӧд юкӧнсӧ. Пызяс мед оз кисьт олив вый, пызь вылӧ мед оз пукты ладан, ӧд тайӧ мыжысь вись.

¹² Пызьсӧ мед ваяс поплы, а поп мед босьтас китыр пызь да сотас сійӧс висьпуктанін вылын Господьлы казьтылан вись пыдди. Вайӧм шобді пызьыс лоӧ мыжысь вись.

¹³ Тадзи поп вештас вись вайысьлысь мыжсӧ, и сійӧс лоӧ прӧститӧма. Коляс висьыс нянь вись моз вичмӧ поплы».

Мыж вештан вись

¹⁴ Господь шуис Мӧисейлы:

¹⁵ «Коді тӧдлытӧг Господьлӧн вежаторлы паныд мыж вӧчас, сійӧ лоӧ мыжа. Та вӧсна мед ваяс Господьлы мыж вештан вись пыдди аслас ыж чукӧрысь дзоньвидза межӧс. Мыж вештан висьлысь донсӧ тэныд колӧ индыны эзысьӧн вежаинса сикель серти.

¹⁶ Господьлӧн вежаторлы паныд мыж вӧчӧмысь морт мед мынтас поплы индӧм донсӧ сы дінӧ витӧд пай содтӧмӧн. Поп мед ваяс межӧс мыж вештан вись пыдди, тадзи вештас мыжа мортлысь мыжсӧ, и сійӧс лоӧ прӧститӧма.

¹⁷ Коді тӧдлытӧг мыж вӧчӧмнас торкас Господьлысь тшӧктӧмсӧ и вӧчас сійӧ, мый вӧчнысӧ оз позь, лоӧ мыжа, сылы колӧ кывкутны аслас мыж вӧсна.

¹⁸ Мыж вештан вись пыдди мед вайӧдас поп дінӧ дзоньвидза межӧс. Висьлысь донсӧ тэныд колӧ индыны. Поп мед вештас тӧдлытӧг мыж вӧчысьлысь мыжсӧ, и сійӧс лоӧ прӧститӧма.

¹⁹ Тайӧ мыж вештан вись, кор мортыс мыжмӧ Господь водзын».