Левит 4 - Коми Библия 2023

Мыжысь вись

¹ Господь тшӧктіс Мӧисейлы

² висьтавны Израиль пиянлы: «Коді тӧдлытӧг мыж вӧчӧмнас торкас Господьлысь тшӧктӧмсӧ и вӧчас сійӧ, мый вӧчнысӧ оз позь, мед ваяс вись.

³ Мавтыштӧм поп кӧ мыж вӧчас, и сылӧн мыж вӧчӧмысь лоӧ мыжа став войтырыс, сэки сійӧ ас вӧснаыс мед ваяс Господьлы мыжысь вись пыдди дзоньвидза ӧшкӧс.

⁴ Ӧшсӧ мед сувтӧдас Господь водзӧ вежа чом пыранін дорӧ. Мед пуктылас кисӧ ӧшлы юр вылас, а сэсся мед начкас сійӧс Господь водзын.

⁵ Мавтыштӧм [да вежӧдӧм] поп мед босьтас ӧшлысь вирсӧ да пыртас вежа чомйӧ.

⁶ Сэсся вирнас мед кӧтӧдас ассьыс чуньсӧ да сизимысь резыштас Господь водзын Вежаинын, Вежасьыс-вежаинлӧн дӧра водзын.

⁷ Поп мед мавтас тайӧ вирнас Господь водзын вежа чомйын сулалысь тшынӧдчан висьпуктанінлысь сюръяссӧ, а коляс вирсӧ мед кисьтас вежа чом пыранін дорын сулалысь висьпуктанін улӧ.

⁸ Поп мед перъялас мыжысь вись пыдди вайӧм ӧшлысь став госсӧ: ты-мус вывсьыс пытшкӧс госсӧ,

⁹ кыкнан вӧрксӧ госнас да мус вывсьыс госа юкӧнсӧ. Ставсӧ тайӧс мед лоӧ перъялӧма вӧркъяснас.

¹⁰ Мед ставсӧ перъялас сідзи, кыдзи перъялӧны ӧшлысь госсӧ бурасян вись пыдди вайигӧн. Сэсся поп мед сотас ставсӧ висьпуктанін вылын.

¹¹ Ӧшлысь кучиксӧ, яйсӧ, юрсӧ, кокъяссӧ, ты-муссӧ да сювсӧ

¹² мед петкӧдас чомъяс сайӧ сӧстӧминӧ, кытчӧ петкӧдӧны пӧим. Сэні пӧим кояланінас пес вылӧ пукталӧмӧн ставсӧ мед сотас.

¹³ Израиль войтыр кӧ тӧдлытӧг мыж вӧчӧмнас торкас Господьлысь тшӧктӧмсӧ и вӧчас сійӧ, мый вӧчнысӧ оз позь, лоӧ мыжа.

¹⁴ Мыж вӧчӧм йылысь тӧдмалӧм бӧрын войтырлы колӧ вайны мыжысь вись пыдди ӧшкӧс. Ӧшсӧ мед вайӧдасны вежа чом водзӧ.

¹⁵ Сэсся войтырлӧн юрнуӧдысьяс мед пуктыласны кинысӧ ӧшлы юр вылас да начкасны ӧшсӧ Господь водзын.

¹⁶ Мавтыштӧм поп мед пыртас ӧшлысь вирсӧ вежа чомйӧ,

¹⁷ сэсся вирнас мед кӧтӧдас ассьыс чуньсӧ да сизимысь резыштас Господь водзын, Вежасьыс-вежаинлӧн дӧра водзын.

¹⁸ Мед мавтас тайӧ вирнас Господь водзын вежа чомйын сулалысь [тшынӧдчан] висьпуктанінлысь сюръяссӧ, а коляс вирсӧ мед кисьтас вежа чом пыранін дорын сулалысь висьпуктанін улӧ.

¹⁹ Ӧшлысь став госсӧ мед перъялас да сотас висьпуктанін вылын.

²⁰ Ставсӧ мед вӧчас сідзи, кыдзи вӧчӧны ӧшкӧс мыжысь вись пыдди вайигӧн. Тадзи поп вештас войтырлысь мыжсӧ, и найӧс лоӧ прӧститӧма.

²¹ Начкӧм ӧшсӧ мед петкӧдас чомъяс сайӧ да сотас, кыдзи таӧдз вӧлі тшӧктӧма сотны ӧшсӧ. Тайӧ лоӧ мыжысь вись, сійӧс колӧ вайны войтырлӧн мыж вӧсна.

²² Юралысь кӧ тӧдлытӧг мыж вӧчӧмнас торкас аслас Господь Енлысь тшӧктӧмсӧ и вӧчас сійӧ, мый вӧчнысӧ оз позь, лоӧ мыжа.

²³ Мыж вӧчӧм йылысь тӧдмалӧм бӧрын сылы колӧ вайны вись пыдди дзоньвидза ай кӧзаӧс.

²⁴ Мед пуктылас кисӧ кӧзалы юр вылас, а сэсся мед начкас сійӧс сэні, кӧні Господь водзын начкӧны сотан вись. Тайӧ лоӧ мыжысь вись.

²⁵ Поп мед кӧтӧдас чуньсӧ вись вирнас да мавтас висьпуктанінлысь сюръяссӧ, а коляс вирсӧ мед кисьтас висьпуктанін улӧ.

²⁶ Став госсӧ мед сотас висьпуктанін вылын, кыдзи сотӧны бурасян висьлысь госсӧ. Тадзи поп вештас юралысьлысь мыжсӧ, и сійӧс лоӧ прӧститӧма.

²⁷ Войтыр пӧвстысь кӧ кодкӧ тӧдлытӧг мыж вӧчӧмнас торкас Господьлысь тшӧктӧмсӧ и вӧчас сійӧ, мый вӧчнысӧ оз позь, лоӧ мыжа.

²⁸ Мыж вӧчӧм йылысь тӧдмалӧм бӧрын сылы колӧ вайны вись пыдди дзоньвидза энь кӧзаӧс.

²⁹ Мед пуктылас кисӧ кӧзалы юр вылас, а сэсся мед начкас сійӧс мыжысь вись пыдди сэні, кӧні начкӧны сотан вись.

³⁰ Поп мед кӧтӧдас чуньсӧ вись вирнас да мавтас висьпуктанінлысь сюръяссӧ, а коляс вирсӧ мед кисьтас висьпуктанін улӧ.

³¹ Мед перъялас кӧзалысь став госсӧ бурасян висьлысь госсӧ моз да сотас висьпуктанін вылын. Тайӧ лоӧ Господьлы чӧскыда ӧвтан вись. Тадзи поп вештас вись вайысьлысь мыжсӧ, и сійӧс лоӧ прӧститӧма.

³² А коді кӧсъяс вайны мыжысь вись пыдди баляӧс, мед ваяс дзоньвидза энь баляӧс.

³³ Мед пуктылас кисӧ балялы юр вылас, а сэсся мед начкас сійӧс мыжысь вись пыдди сэні, кӧні начкӧны сотан вись.

³⁴ Поп мед кӧтӧдас чуньсӧ вись вирнас да мавтас висьпуктанінлысь сюръяссӧ, а коляс вирсӧ мед кисьтас висьпуктанін улӧ.

³⁵ Мед перъялас балялысь став госсӧ бурасян вись пыдди вайӧм ыжлысь госсӧ моз да сотас висьпуктанін вылын Господьлы сотан виськӧд. Тадзи поп вештас вись вайысьлысь мыжсӧ, и сійӧс лоӧ прӧститӧма.