Левит 27 - Коми Библия 2023

Кыв сетан висьяс йылысь

¹ Господь шуис Мӧисейлы:

² «Висьтав Израиль пиянлы: коді кыв сетӧмӧн мыйкӧ сиӧ Господьлы, сійӧ вермас мынтысьӧмӧн бӧр босьтны сиӧмторсӧ. А сиӧма кӧ мортӧс Господьлы,

³ донсӧ инды тадзи: кызь арӧссянь квайтымын арӧсӧдз айловысь вештысян доныс мед лоӧ ветымын сикель эзысь вежаинса сикель серти,

⁴ а аньысь – комын сикель.

⁵ Вит арӧссянь кызь арӧсӧдз зонмысь вештысян доныс мед лоӧ кызь сикель эзысь, а нылысь – дас сикель.

⁶ Тӧлысьсянь вит арӧсӧдз пи кагаысь вештысян доныс мед лоӧ вит сикель эзысь, а нылысь – куим сикель.

⁷ Квайтымын арӧса да ыджыдджык арлыда айловысь вештысян доныс мед лоӧ дас вит сикель эзысь, а аньысь – дас сикель.

⁸ Кыв сетысь кӧ гӧльлун вӧснаыс оз вермы мынтысьны, сідзкӧ, мед ваяс кыв сетӧмӧн сиӧм мортӧс поп дінӧ. Поп мед донъялас сійӧс да индас вештысян донсӧ сы серти, мыйта вермас мынтынысӧ кыв сетысьыс.

⁹ Кыв сетӧмӧн кӧ Господьлы сиӧма пемӧсӧс, кодӧс позьӧ вайны вись пыдди Господьлы, тайӧ вайӧмторйыс лоӧ вежаторйӧн.

¹⁰ Мӧд пемӧсӧн сійӧс вежны оз позь. Оз позь вежны бурсӧ лёк вылӧ, лёксӧ бур вылӧ. Но кыв сетысь кӧ сиӧм пемӧссӧ вежас мӧдӧн, сэки кыкнан пемӧсыс лоӧны вежаторйӧн.

¹¹ Кыв сетан пемӧсыс кӧ пеж пемӧс, кодӧс оз позь вайны вись пыдди Господьлы, сэки сійӧс колӧ вайӧдны поп дінӧ.

¹² Поп видзӧдлас, бур-ӧ сійӧ, да индас донсӧ. Кыдзи поп донъялас, сэтшӧм доныс и лоӧ.

¹³ Мортыс кӧ сиӧм пемӧссӧ кӧсъяс бӧр ньӧбны, сэки индӧм доныс дінӧ мед содтас пемӧс доныслысь витӧд пайсӧ.

¹⁴ Коді ассьыс керкасӧ сиас Господьлы, мед шыасяс поп дінӧ. Поп мед донъялас керкасӧ сы серти, бур-ӧ сійӧ. Кыдзи поп донъялас, сэтшӧм доныс и лоӧ.

¹⁵ Мортыс кӧ сиӧм керкасӧ кӧсъяс бӧр ньӧбны, сэки индӧм доныс дінӧ мед содтас керка доныслысь витӧд пайсӧ. Та бӧрын керкаыс бара лоӧ сылӧн.

¹⁶ Коді Господьлы сиас рӧдвуж овмӧссьыс мусӧ, сійӧ мед шуас муыслы донсӧ сы серти, мыйта сэтчӧ позьӧ кӧдзны. Муысь, кытчӧ позьӧ кӧдзны хомер мында ид, доныс мед лоӧ ветымын сикель эзысь.

¹⁷ Мортыс кӧ сиас ассьыс мусӧ тшупӧда воӧ, доныс кольӧ сэтшӧм жӧ, мыйта вӧлі индӧма.

¹⁸ Сиас кӧ мусӧ тшупӧда во кольӧм бӧрын, поплы колӧ артавны муыслысь донсӧ сы серти, кымын во кольӧ локтана тшупӧда воӧдз. Доныс сэки чинтыссьӧ.

¹⁹ Мортыс кӧ сиӧм мусӧ кӧсъяс бӧр ньӧбны, сэки арталӧм доныс дінӧ мед содтас му доныслысь витӧд пайсӧ да бӧр ньӧбас сійӧс, и муыс бара лоӧ сылӧн.

²⁰ Но сиӧм мусӧ кӧ бӧр оз ньӧб, а вузалас мӧдлы, сэки тайӧ мусӧ бӧр ньӧбны некор оз позь.

²¹ Тшупӧда воӧ татшӧм муыс вуджӧ Господьлы да лоӧ вежаторйӧн, кыдзи Господьлы ёрӧм улын сиӧм му. Муыс сэки вуджӧ поплы да лоӧ сылӧн.

²² Морт кӧ ньӧблӧм мусӧ, мый оз пыр сылӧн рӧдвуж овмӧсӧ, шуас сины Господьлы,

²³ но кӧсъяс бӧр ньӧбны сійӧс, сэки поп мед арталас муыслысь донсӧ сы серти, кымын во кольӧ тшупӧда воӧдз. Мортыс мед мынтас поплы муыслысь донсӧ сійӧ жӧ лунӧ. Тайӧ доныс – Господьлӧн вежатор.

²⁴ А тшупӧда воӧ муыс бӧр вуджас сылы, кодлӧн рӧдвуж овмӧсысь вӧлі ньӧбӧма.

²⁵ Став донсӧ колӧ артавны вежаинса сикель серти. Ӧти сикельын – кызь гера.

²⁶ Ыж-мӧслысь медводдза чужысьӧс Господьлы сины оз позь, ӧд сійӧ сідзи нин Господьлӧн. Мӧслӧн да ыж-кӧзалӧн медводдза чужысьыс – Господьлӧн.

²⁷ А медводдза чужысьыс кӧ пеж пемӧслӧн, сійӧс колӧ бӧр ньӧбны, и индӧм доныс дінӧ колӧ содтыны пемӧс доныслысь витӧд пайсӧ. Пемӧссӧ кӧ оз ло бӧр ньӧбӧма, сійӧс колӧ вузавны индӧм донысь.

²⁸ Мортӧс, пемӧсӧс либӧ рӧдвуж овмӧсысь муяс Господьлы ёрӧм улын сиӧм бӧрын вузавны либӧ бӧр ньӧбны оз позь. Мый сиӧма ёрӧм улын – тайӧ Господьлӧн вежасьыс-вежатор.

²⁹ Оз позь бӧр ньӧбны мортӧс, сійӧс кӧ вӧлі ёрӧм улын сиӧма Господьлы. Сійӧс мед виасны.

³⁰ Муӧн сетӧм быдтасысь да пуясӧн сетӧм вотӧсысь дасӧд юкӧныс лоӧ Господьлӧн. Тайӧ – Господьлӧн вежатор.

³¹ Коді кӧсйӧ бӧр ньӧбны ассьыс дасӧд юкӧнсӧ, мед содтас сылӧн доныс дінӧ витӧд пайсӧ.

³² Ыж-мӧссӧ арталігӧн пемӧс кутысь мед сиас Господьлы быд дасӧд пемӧссӧ.

³³ Оз ков торйӧдны бур пемӧсӧс лёксьыс, оз ков вежлавны сиӧм пемӧссӧ мӧдӧн. Вежас кӧ сиӧм пемӧссӧ мӧдӧн, кыкнан пемӧсыс лоӧны вежаторйӧн, и найӧс бӧр ньӧбнысӧ оз позь».

³⁴ Тайӧ тшӧктӧмъяссӧ Господь сетіс Мӧисей пыр Израиль пиянлы Синай керӧсын.