Левит 24 - Коми Библия 2023

Би дозъяс да вежа нянь

¹ Господь шуис Мӧисейлы:

² «Тшӧкты Израиль пиянлы вайны тэныд оливысь пычкӧм сӧстӧм вый, медым би дозъясысь выйыс эз бырлы.

³ Ааронлы [да сылӧн пияныслы] рытсяньыс асылӧдзыс колӧ видзӧдны би дозъяс бӧрся. Биыс мед ӧзъялас Господь водзын вежа чомйын, ӧшӧдӧм дӧра водзын, мый сайын сулалӧ Йитӧд куд. Тайӧ тшӧктӧмыс лоӧ тіянлы нэмъяс кежлӧ чужысьяссянь чужысьясӧдз.

⁴ Би дозъяссӧ мед пукталӧны весалӧм зарниысь вӧчӧм бикок вылӧ, мый сулалӧ Господь водзын.

⁵ Босьт ефа мында шобді пызьсӧ, юк дас пельӧ и сэтысь босьт кыксӧ. Таысь пӧжав дас кык нянь.

⁶ Господь водзӧ весалӧм зарниысь вӧчӧм пызан вылӧ пукты няньсӧ квайтӧн-квайтӧн кык визьӧ.

⁷ Нянь вылас пукты сӧстӧм ладан [да сов]. Тайӧ лоӧ казьтылан вись, Господьлы сотан вись.

⁸ Быд шойччан лунӧ Израиль пиян нимсянь колӧ пуктыны няньсӧ Господь водзӧ. Тайӧ лоӧ нэмъяс кежлӧ кӧрталӧм йитӧд.

⁹ Тайӧ няньсӧ Ааронлы да сысянь чужысьяслы колӧ сёйны вежаинын, ӧд тайӧ – вежасьыс-вежатор, Господьлы ваян висьясысь налы пыр кежлӧ сетӧм пай».

Енмӧс омӧльтысьӧс мыждӧм

^10-11 Израиль войтыр пӧвстын вӧлі морт, кодлӧн мамыс вӧлі израильса, Дан чужанкотырысь Диврилӧн Шеломит нылыс, а батьыс – египетса. Чомъяс дорын сійӧ тышкасис ӧти израильсакӧд, омӧльтіс-лёкӧдіс Господьлысь нимсӧ, и сійӧс вайӧдісны Мӧисей дінӧ.

¹² Сійӧс йӧршитісны да видзисны дзескыдінын, кытчӧдз Господь эз шу, мый сыкӧд вӧчны.

¹³ Господь шуис Мӧисейлы:

¹⁴ «Петкӧд тайӧ омӧльтысьсӧ чомъяс сайӧ. Найӧ, кодъяс кывлісны сылысь омӧльтӧмсӧ, мед пуктыласны кинысӧ сылы юр вылас. Сэсся став войтырыс мед изъялас сійӧс.

¹⁵ Израиль пиянлы висьтав, мый ассьыс Енсӧ омӧльтысь лоӧ мыжа.

¹⁶ Господьлысь нимсӧ омӧльтысьӧс колӧ вины. Став войтырыс мед изъялас сійӧс. Вужвойтырысь либӧ йӧз муысь локтысьяс пӧвстысь коді кутас омӧльтны Господьлысь нимсӧ, сійӧс мед виасны.

¹⁷ Коді мортӧс виас, сійӧс асьсӧ мед виасны.

¹⁸ А ыж-мӧс виӧмысь мед вештысяс татшӧм жӧ пемӧсӧн.

¹⁹ Коді дойдас мӧд мортӧс, сылы аслыс мед вӧчасны сійӧ жӧ:

²⁰ чегӧмысь чегӧм, синмысь син, пиньысь пинь. Кыдзи сійӧ дойдаліс мӧдсӧ, сылы сідзи жӧ мед вӧчасны.

²¹ Коді пемӧсӧс виас, мед вештысяс сыысь, а коді мортӧс виас, сійӧс асьсӧ мед виасны.

²² Ӧткодя мыждӧй мортӧс, вужвойтырысь-ӧ сійӧ либӧ йӧз муысь локтысь. Ме – Господь, тіян Енныд».

²³ Мӧисей висьталіс тайӧс Израиль пиянлы. Омӧльтысьӧс петкӧдісны чомъяс сайӧ да изъялісны. Израиль пиян вӧчисны сідзи, кыдзи Господь тшӧктіс Мӧисейлы.