Левит 23 - Коми Библия 2023

Шойччан лун

¹ Господь шуис Мӧисейлы:

² «Висьтав Израиль пиянлы, кутшӧм лунъяс налы колӧ торйӧдны Господьлы. Менам вежа гажӧдчан лунъясӧ налӧн мед лоӧ вежа чукӧртчӧм.

³ Квайт лун уджалӧй, а сизимӧд луныс мед лоӧ шойччан лун. Сэки тіян мед лоас вежа чукӧртчӧм, некутшӧм удж энӧ вӧчӧй. Тайӧ луныс мед лоӧ Господьлы сиӧм шойччан лун быдлаын, кӧні кутанныд овны».

Ыджыд лун да шомтӧм нянь сёян лунъяс

⁴ «Господьлы сиӧм гажӧдчан лунъясӧ тіян мед лоӧ вежа чукӧртчӧм.

⁵ Медводдза тӧлысьлӧн дас нёльӧд лун рытсянь мӧд рытӧдз Господьлы сиӧм Ыджыд лун,

⁶ а дас витӧд лунсянь Шомтӧм нянь сёян лунъяс – Господьлы сиӧм гаж. Сэки сизим лун чӧж сёйӧй шомтӧм нянь.

⁷ Медводдза гажӧдчан лунӧ тіян мед лоӧ вежа чукӧртчӧм. Некутшӧм удж сэки энӧ вӧчӧй.

⁸ Сизим лун чӧж вайӧй Господьлы висьяс, и сизимӧд луннас тіян мед лоӧ вежа чукӧртчӧм. Некутшӧм удж сэки энӧ вӧчӧй».

Медводдза кольта гаж

⁹ Господь тшӧктіс Мӧисейлы

¹⁰ висьтавны Израиль пиянлы: «Кор ті овмӧдчанныд сійӧ муас, мый Ме сета тіянлы, да вунданныд сэні нянь, вайӧй медводдза кольтанытӧ поплы.

¹¹ Сизимлунся вежа гажлӧн мӧд луннас поп мед ваяс медводдза кольтасӧ Господь водзын пыркӧдан вись пыдди, медым ті вӧлінныд шогманаӧсь Господьлы.

¹² Кольта ваян лунӧ вайӧй Господьлы сотан вись пыдди дзоньвидза арӧса баляӧс.

¹³ Сыкӧд тшӧтш нянь вись пыдди вайӧй олив выйӧн гудралӧм шобді пызь – ефа мында пызьсӧ юкӧй дас пельӧ и сэтысь вайӧй кыксӧ. Тайӧ лоӧ Господьлы чӧскыда ӧвтан вись. Кисьтан вись пыдди вайӧй вина – гинлысь нёльӧд пайсӧ.

¹⁴ Асланыд Енлы висьнытӧ ваян лунӧдз энӧ сёйӧй выль пызьысь пӧжалӧм нянь, пражитӧм ни уль тусь. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз быдлаын, кӧні ті кутанныд овны».

Ветымынӧд лунся гаж

¹⁵ «Вежа гажӧдчан лунсянь, кор пыркӧдан вись пыдди ваянныд медводдза кольта, лыддьӧй сизим вежон.

¹⁶ Сизимӧд шойччан лун бӧрын, ветымынӧд лунӧ, вайӧй нянь вись пыдди Господьлы медводдза вундӧм няньнытӧ.

¹⁷ Быдласянь, кӧні ті оланныд, пыркӧдан вись пыдди вайӧй кык нянь. Няньсӧ кӧтӧй шобді пызьысь – ефа мында пызьсӧ юкӧй дас пельӧ и сэтысь босьтӧй кыксӧ. Шоммӧдӧм бӧрын пӧжалӧй няньсӧ. Тайӧ тіян медводдза быдтасысь Господьлы козин.

¹⁸ Няньыскӧд тшӧтш вайӧй Господьлы сотан вись пыдди арӧса сизим дзоньвидза баляӧс, ӧшкӧс да [дзоньвидза] кык межӧс, нӧшта вайӧй нянь вись да вина вись, мый колӧ вайны сотан виськӧд. Ставыс тайӧ лоӧ Господьлы чӧскыда ӧвтан вись.

¹⁹ [Медводдза вундӧм нянькӧд] тшӧтш вайӧй мыжысь вись пыдди ай кӧзаӧс да бурасян вись пыдди арӧса кык баляӧс.

²⁰ Поп мед ваяс кык балясӧ медводдза вундӧм нянькӧд Господь водзын пыркӧдан вись пыдди. Тайӧ Господьлы сиӧм вежатор, мый вичмӧ поплы [коді кесъялӧ вись вайигӧн].

²¹ Сійӧ лунӧ тіян мед лоӧ вежа чукӧртчӧм. Некутшӧм удж сэки энӧ вӧчӧй. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз быдлаын, кӧні ті кутанныд овны.

²² Няньнытӧ вундігӧн му бокъяссӧ кольӧй вундытӧг. Вундӧм дырйи усьласьӧм шепсӧ энӧ чукӧртӧй. Гӧльяслы да йӧз муысь локтысьяслы чукӧртны кольӧй. Ме – Господь, тіян Енныд».

Буксан гаж

²³ Господь шуис Мӧисейлы:

²⁴ «Висьтав Израиль пиянлы: сизимӧд тӧлысьлӧн медводдза луныс лоӧ тіянлы шойччан лун. Сэки буксӧй буксанӧн, медым юӧртны, мый тіян лоас вежа чукӧртчӧм.

²⁵ Господьлы вись вайӧмысь ӧтдор некутшӧм удж энӧ вӧчӧй».

Мыж вештан лун

²⁶ Господь шуис Мӧисейлы:

²⁷ «Сизимӧд тӧлысьлӧн дасӧд луныс – Мыж вештан лун. Сэки тіян мед лоас вежа чукӧртчӧм. Раммӧдчӧй-видзалӧй да вись вайӧй Господьлы.

²⁸ Некутшӧм удж энӧ вӧчӧй, ӧд тайӧ луныс – Мыж вештан лун, кор мыжнытӧ вештасны Господь Енныд водзын.

²⁹ Коді оз раммӧдчы-видзав тайӧ лунӧ, сійӧс лоӧ бырӧдӧма аслас войтыр пӧвстысь.

³⁰ Коді кутас уджавны тайӧ лунӧ, сійӧс Ме бырӧда войтыр пӧвстысь.

³¹ Энӧ вӧчӧй сэки некутшӧм удж. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз быдлаын, кӧні ті кутанныд овны.

³² Тайӧ мед лоӧ тіянлы шойччан лун. Тайӧ лунӧ тіянлы колӧ раммӧдчыны-видзавны. Тӧлысьлӧн ӧкмысӧд лун рытсяньыс дасӧд лун рытӧдзыс тіян мед лоӧ шойччӧг».

Чом вӧчан лунъяс

³³ Господь шуис Мӧисейлы:

³⁴ «Висьтав Израиль пиянлы: сизимӧд тӧлысьлӧн дас витӧд лунсянь тіян лоӧны Чом вӧчан лунъяс – Господьлы сиӧм сизим лун.

³⁵ Гажлӧн медводдза луннас тіян мед лоӧ вежа чукӧртчӧм. Некутшӧм удж сэки энӧ вӧчӧй.

³⁶ Сизим лун чӧж вайӧй Господьлы вись, а кӧкъямысӧд луннас тіян мед лоӧ вежа чукӧртчӧм, сэки тшӧтш вайӧй Господьлы вись. Некутшӧм удж энӧ вӧчӧй.

³⁷ Лыддьӧдлӧм лунъясыс – Господьлы сиӧм гажӧдчан лунъяс. Сэки тіян мед лоас вежа чукӧртчӧм, медым вайны Господьлы висьяс: сотан вись, нянь вись, начкан вись да вина вись. Быд вись колӧ вайны индӧм лунӧ.

³⁸ Таысь ӧтдор тіянлы колӧ чукӧртчыны Господьлы сиӧм шойччан лунъясӧ да вайны Господьлы козинъяс, кыв сетан висьяс да ас кӧсйӧм серти ваян висьяс.

³⁹ Сизимӧд тӧлысьлӧн дас витӧд лунсянь, быдтаснытӧ чукӧртӧм бӧрын, тіян мед лоӧ Господьлы сиӧм гаж. Гажӧдчӧй сизим лун чӧж. Гажлӧн медводдза да кӧкъямысӧд лунъясӧ тіян мед лоӧ шойччӧг.

⁴⁰ Гажлӧн медводдза луннас босьтӧй мича пу вожъяс, пальма вожъяс да паськыд коръя пу вожъяс, юдорса бадьяс да гажӧдчӧй Господь Енныд водзын сизим лун чӧж.

⁴¹ Господьлы сиӧм тайӧ гажсӧ пасйӧй воысь-во сизим лун чӧж. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз. Гажӧдчӧй сизимӧд тӧлысьнас.

⁴² Олӧй сизим лун чӧж чомъясын. Израиль муын олысь став вужвойтырыс тайӧ лунъясӧ мед оласны чомъясын.

⁴³ Тіянсянь чужысьяс та пыр мед тӧдмаласны, мый Ме овмӧді Израиль пиянӧс чомъясӧ, кор петкӧді найӧс Египет муысь. Ме – Господь, тіян Енныд».

⁴⁴ Тадзи Мӧисей висьталіс Израиль пиянлы Господьлы сиӧм гажӧдчан лунъяс йылысь.