Левит 22 - Коми Библия 2023

Висьяс да вайӧмторъяс

¹ Господь шуис Мӧисейлы:

² «Висьтав Ааронлы да сылӧн пияныслы, медым бура тӧждысясны вежа вайӧмторъяс вӧсна, мый Израиль пиян торйӧдӧны Меным. Менсьым вежа нимӧс мед оз янӧдны. Ме – Господь.

³ Висьтав налы, мый быдӧнӧс, коді насянь чужысьяс пӧвстысь пежӧн матыстчас Израиль пиянлӧн вежа вайӧмторъяс дінӧ, лоӧ ӧтдортӧма Ме дінысь. Ме – Господь [тіян Енныд].

⁴ Ааронсянь чужысьясысь кӧ кодкӧ висьӧ проказаӧн либӧ лёквиялӧмӧн, сылы оз позь сёйны вежа вайӧмторъяс, кытчӧдз оз ло сӧстӧм. Айлов, кодлӧн кӧйдысыс петас либӧ коді инмӧдчылас шойсянь пежасьӧмтор дінӧ,

⁵ пеж котралысь-веглясьысь дінӧ либӧ морт дінӧ, кодсянь пеж лоӧ, кӧть кутшӧм пежтор тайӧ эз вӧв,

⁶ рытӧдзыс лоӧ пеж. Вежа вайӧмтор сійӧ мед оз сёй, кытчӧдз ставнас оз мыссьы.

⁷ Шонді лэччӧм бӧрын да сӧстӧммӧдчӧм бӧрын сійӧ вермас сёйны вежа вайӧмторсӧ, ӧд тайӧ сылӧн сёяныс.

⁸ Шой да косявлӧм пемӧсӧс сылы оз позь сёйны, медым насянь эз пежав асьсӧ. Ме – Господь.

⁹ Попъяс мед кутчысясны Менам тшӧктӧмъясӧ. А оз кӧ, найӧ лоӧны мыжаӧсь да куласны. Ме – Господь [Ен], найӧс Вежӧдысь.

¹⁰ Бокыса мортлы вежа вайӧмторъяс сёйны оз позь. Поп ордӧ овмӧдчӧм либӧ медалӧм морт мед оз сёйны вежа вайӧмторъяс.

¹¹ Но поп кӧ ньӧбас аслыс кесйӧгӧс, сійӧ вермас сёйны вежа вайӧмторъяс. Поп ордын чужысь тшӧтш вермас сёйны сійӧ жӧ, мый сёйӧ поп.

¹² Поплӧн нылыс кӧ петас верӧс сайӧ, но оз поп сайӧ, нывлы оз нин позь сёйны вежа вайӧмторъяс.

¹³ Сійӧ кӧ коляс дӧваӧн либӧ верӧсыс эновтас сійӧс, и ныв-пиыс сылӧн абу, и сійӧ кӧ бӧр овмӧдчас чужан керкаас, сэки мед сёяс сійӧ жӧ, мый сёйӧ батьыс. Но бокыса морт мед оз сёй вежа вайӧмторъяс.

¹⁴ Коді тӧдлытӧг сёяс вежа вайӧмторсӧ, сійӧ мед мынтас поплы вайӧмторлысь донсӧ сы дінӧ витӧд пай содтӧмӧн.

¹⁵ Попъяс асьныс мед оз пежавны вежа вайӧмторъяссӧ, мый сиӧны Господьлы Израиль пиян.

¹⁶ Попъяс мед оз торкны вежа вайӧмторъяс сёйӧм йылысь тшӧктӧмсӧ, медым Израиль войтыр эз мыжмы, ӧд Ме – Господь, вайӧмторъяссӧ Вежӧдысь».

¹⁷ Господь шуис Мӧисейлы:

¹⁸ «Висьтав Ааронлы, сылӧн пияныслы да став Израиль пиянлы тайӧ тшӧктӧмсӧ. Коді Израиль войтыр пӧвстысь либӧ йӧз муысь локтысьяс пӧвстысь кӧсъяс вайны Господьлы кыв сетан вись либӧ ас кӧсйӧм серти ваян вись, медым сотны сійӧс,

¹⁹ мед ваяс дзоньвидза ӧшкӧс, межӧс либӧ ай кӧзаӧс. Сэки лоанныд Господьлы шогманаӧсь.

²⁰ Энӧ вайӧй Господьлы вись пыдди пемӧсӧс, кодлӧн эм кутшӧмкӧ тырмытӧмтор. А ваянныд кӧ, ті онӧ лоӧй шогманаӧсь Господьлы.

²¹ Коді кутас вайны Господьлы бурасян вись ӧш-мӧс либӧ ыж-кӧза пӧвстысь, лоӧ-ӧ тайӧ висьыс кыв сетан вись либӧ ас кӧсйӧм серти ваян вись [либӧ гаждырся вись], сійӧ мед ваяс дзоньвидза пемӧсӧс, кодлӧн абу некутшӧм тырмытӧмтор. Татшӧм висьыс лоӧ шогмана Господьлы.

²² Энӧ вайӧй Господьлы вись пыдди синтӧм, чегӧм кока, доймӧм, висьлӧс, йӧгӧсь либӧ лӧмӧсь пемӧсӧс. Татшӧмӧс висьпуктанін вылын Господьлы энӧ сотӧй.

²³ Пемӧсӧс, кодлӧн кокъясыс туша сертиыс вывті кузьӧсь либӧ дженьыдӧсь, ас кӧсйӧм серти ваян вись пыдди позьӧ вайны, а кыв сетан вись пыдди кӧ татшӧмсӧ ваянныд, висьныд оз ло шогмана Господьлы.

²⁴ Пемӧсӧс, кодлӧн тобоньыс доймӧма, лямалӧма, орӧма либӧ вундӧма, Господьлы вись пыдди энӧ вайӧй. Асланыд муын татшӧмторсӧ энӧ вӧчӧй.

²⁵ Доймӧм пемӧсӧс либӧ пемӧсӧс, кодлӧн эм тырмытӧмтор, мукӧд войтырлысь энӧ ньӧбӧй, медым вись пыдди вайны асланыд Енлы. А ваянныд кӧ, ті онӧ лоӧй шогманаӧсь Господьлы».

²⁶ Господь шуис Мӧисейлы:

²⁷ «Куканьӧс, баляпиӧс да кӧзапиӧс чужӧм бӧрас видзӧй мам дорас сизим лун, а кӧкъямысӧд лунсяньыс найӧс позьӧ вайны Господьлы вись пыдди.

²⁸ Мӧскӧс, ыжӧс либӧ кӧзаӧс ӧти лунӧ пияныскӧд энӧ начкӧй.

²⁹ Кор ваянныд Господьлы аттьӧалана вись, вайӧй сійӧс сідзи, медым ті вӧлінныд шогманаӧсь Господьлы.

³⁰ Вись пыдди вайӧм пемӧслысь яйсӧ сійӧ жӧ лунӧ сёйӧй, асылӧдзыс энӧ кольӧй. Ме – Господь.

³¹ Кутчысьӧй Менам тшӧктӧмъясӧ да олӧй на серти. Ме – Господь.

³² Энӧ янӧдӧй Менсьым вежа нимӧс, медым Израиль пиян пӧвстын Ме вӧлі вежавидзана. Ме – Господь, тіянӧс Вежӧдысь.

³³ Ме петкӧді тіянӧс Египетысь, медым лоны тіян Енмӧн. Ме – Господь».