Левит 21 - Коми Библия 2023

Поп мед оз пежав асьсӧ

¹ Господь шуис Мӧисейлы: «Висьтав попъяслы, Аарон пиянлы, медым аслас рӧдвужысь кулӧм морт дінӧ инмӧдчӧмӧн эз пежавны асьнысӧ.

² Поплы асьсӧ пежавны позьӧ сӧмын бать-мамыс вӧсна, ныв-пиыс вӧсна, вокыс вӧсна

³ да чойыс вӧсна, коді оліс сыкӧд и эз вӧв верӧс сайын. Сӧмын на вӧсна вермас асьсӧ пежавны.

⁴ Но мукӧд рӧдвуж вӧсна асьсӧ мед оз пежав.

⁵ Поп мед юрсисӧ оз шыр, тошсӧ оз тшӧтшӧд, вир-яйсӧ оз вундав.

⁶ Аслас Ен водзын поп мед лоас вежа. Мед оз янӧд аслас Енлысь нимсӧ, ӧд сійӧ вись вайӧ Господьлы, нянь – аслас Енлы. Та вӧсна сылы колӧ лоны вежаӧн.

⁷ Поп мед оз босьт гӧтырӧ кырсалысь аньӧс, айловкӧд узьлӧм либӧ верӧсӧн эновтӧм аньӧс, ӧд сылы колӧ лоны аслас [Господь] Ен водзын вежаӧн.

⁸ Вежавидзӧмӧн пыдди пуктӧй попӧс, ӧд сійӧ вись вайӧ [Господьлы] тіян Енлы. Поп мед лоас тіянлы вежа, ӧд Ме вежа. Ме – Господь, тіянӧс Вежӧдысь.

⁹ Поплӧн нылыс кӧ пежалас асьсӧ кырсалӧмӧн, сійӧ янӧдас батьсӧ. Нывсӧ колӧ сотны.

¹⁰ Вокъясыс пӧвстысь медыджыд попӧ пуктӧм морт, кодлы юр вылас кисьтӧма мавтыштан вый да коді новлӧ вежа паськӧм, мед оз ветлӧдлы юрсӧ тупкытӧг да ас вывсьыс паськӧмсӧ мед оз косяв.

¹¹ Сылы оз позь матыстчыны кулӧм морт дінӧ, весиг кӧ тайӧ сылӧн батьыс либӧ мамыс – асьсӧ сылы пежавны оз позь.

¹² Кулӧм морт вӧсна мед оз пет вежаинысь, медым эз пежав аслас Енлысь вежаинсӧ, ӧд сійӧс вежӧдӧма Енлӧн мавтыштан выйӧн. Ме – Господь.

¹³ Сійӧ мед гӧтрасьӧ [ас войтырысь] ныв вылӧ.

¹⁴ Дӧваӧс либӧ верӧсӧн эновтӧм аньӧс, айловкӧд узьлӧм либӧ кырсалысь аньӧс сылы оз позь босьтны гӧтырӧ. Сылы колӧ босьтны ас войтырсьыс нылӧс,

¹⁵ медым эз пежав ассьыс водзӧ чужысьяссӧ. Ме – Господь [Ен], сійӧс Вежӧдысь».

¹⁶ Господь шуис Мӧисейлы:

¹⁷ «Висьтав Ааронлы, мый сысянь чужысьяс пӧвстысь морт, кодлӧн вир-яяс эм тырмытӧмтор, мед оз матыстчы вись вайны аслас Енлы.

¹⁸ Оз вермы вись вайны морт, кодлӧн вир-яяс эм тырмытӧмтор, сійӧ кӧ синтӧм, чотысь, урӧс чужӧмбана,

¹⁹ чегӧм ки-кока,

²⁰ гӧрба, висьлӧс, чусмӧм синма, лӧмӧсь, карсӧсь либӧ тобоньыс кӧ сылӧн доймӧма.

²¹ Аарон попсянь чужысь, кодлӧн вир-яяс эм тырмытӧмтор, мед оз матыстчы вись вайны Господьлы. Вир-яйын тырмытӧмтор вӧсна сылы оз позь матыстчыны, медым вись вайны аслас Енлы.

²² Но сылы позьӧ сёйны Енлы вись пыдди вайӧм вежатор да вежасьыс-вежатор.

²³ Но аслас тырмытӧмтор вӧсна сылы оз позь пырны Вежаинӧ либӧ матыстчыны висьпуктанін дорӧ, медым эз пежав Менсьым вежаинӧс. Ме – Господь, попъясӧс Вежӧдысь».

²⁴ Мӧисей висьталіс тайӧс Ааронлы, сылӧн пияныслы да став Израиль пиянлы.