Левит 2 - Коми Библия 2023

Нянь вись

¹ «Коді кутас вайны Господьлы нянь вись, мед ваяс шобді пызь. Пызяс мед кисьтас олив вый да пызь вылас пуктас ладан.

² Сэсся пызьсӧ мед ваяс попъяслы, Ааронсянь чужысьяслы. Олив выйӧн гудралӧм пызьсьыс поп мед босьтас китыр пызь став ладаннас да сотас сійӧс висьпуктанін вылын. Тайӧ лоӧ казьтылан вись, Господьлы чӧскыд ӧвтантор.

³ А нянь висьлӧн колясыс мед лоӧ Ааронлы да сысянь чужысьяслы. Господьлы вайӧм висьлӧн тайӧ юкӧныс – вежасьыс-вежатор.

⁴ Нянь вись пыдди кӧ ваянныд пачын пӧжалӧм нянь, вайӧй шобді пызьысь выйӧн гудралӧм шомтӧм нянь либӧ выйӧн мавтӧм шомтӧм сӧчӧн.

⁵ Кӧрт лист вылын пӧжалан нянь висьсӧ дасьтӧй выйӧн гудралӧм шобді пызьысь шоммӧдтӧг.

⁶ Няньсӧ чегъялӧй торпыригӧдз да киськалӧй олив выйӧн. Тайӧ лоӧ [Господьлы] нянь вись.

⁷ Нянь вись пыдди кӧ ваянныд рачын пӧжалӧм нянь, дасьтӧй сійӧс шобді пызьысь олив вый сорӧн.

⁸ Тадзи дасьтӧм нянь висьнытӧ вайӧй Господьлы. Сетӧй сійӧс поплы, а поп мед ваяс висьпуктанін дорӧ.

⁹ Сэсся поп мед босьтас тайӧ нянь висьсьыс юкӧн да сотас сійӧс висьпуктанін вылын. Тайӧ лоӧ казьтылан вись, Господьлы чӧскыд ӧвтантор.

¹⁰ А нянь висьлӧн колясыс мед лоӧ Ааронлы да сысянь чужысьяслы. Господьлы вайӧм висьлӧн тайӧ юкӧныс – вежасьыс-вежатор.

¹¹ Господьлы ваян нянь висьнытӧ пӧжалӧй шоммӧдтӧг. Господьлы вись пыдди оз позь сотны няньшом да ма.

¹² Господьлы найӧс верманныд вайны медводдза быдтаснытӧ моз, но висьпуктанін вылын чӧскыда ӧвтан вись пыдди сотнысӧ оз позь.

¹³ Став нянь висьнытӧ солалӧй, солавтӧм вись энӧ вайӧй, ӧд солыс петкӧдлӧ тіян Енлысь йитӧдсӧ, мый сійӧ кӧрталіс тіянкӧд. Та вӧсна [Господьлы, асланыд Енлы] став вайӧмторнытӧ солалӧй.

¹⁴ Кӧсъян кӧ аслад медводдза идралӧм няньысь вайны Господьлы нянь висьтӧ, вай би вылын косьтӧм бӧрын нырӧм тусь.

¹⁵ Тусь вылас кисьт олив вый да пуктав сы вылӧ ладан. Тайӧ лоӧ нянь вись.

¹⁶ Поп мед босьтас мыйтакӧ нырӧм тусь да олив вый, тшӧтш став ладансӧ, да сотас казьтылан вись пыдди Господьлы».