Левит 17 - Коми Библия 2023

Вись начкӧм да вись вайӧм йылысь тшӧктӧм

¹ Господь шуис Мӧисейлы:

² «Висьтав Ааронлы, сылӧн пияныслы да Израиль войтырлы Господьлысь тшӧктӧмсӧ.

³ Израиль войтыр пӧвстысь [либӧ на ордӧ овмӧдчысьяс пӧвстысь] кӧ кодкӧ начкас ӧшкӧс, ыжӧс либӧ кӧзаӧс чомъяс дорын либӧ чомъяс сайын,

⁴ а оз вайӧд сійӧс вежа чом пыранін дорӧ, [медым вайны сотан вись либӧ бурасян вись пыдди, мый лоӧ Господьлы шогмана чӧскыд ӧвтантор,] медым Господьлӧн оланін водзын вайны сійӧс Господьлы вись пыдди, сэки тайӧ мортыс лоӧ мыжа вир кисьтӧмысь. Сійӧс лоӧ бырӧдӧма аслас войтыр пӧвстысь.

⁵ Тайӧс тшӧктӧма сы могысь, медым Израиль пиян эз нин начкыны пемӧсъяссӧ бокын, а вайӧдісны найӧс Господь водзӧ вежа чом пыранін дорӧ поплы, и сэні начкисны Господьлы бурасян вись пыдди.

⁶ Вежа чом пыранін дорысь Господьлысь висьпуктанінсӧ поп мед резас пемӧс вирӧн, а госсӧ мед сотас Господьлы чӧскыда ӧвтан вись пыдди.

⁷ Израильсаяс мед дугдасны вайны висьнысӧ овтӧминса мутияслы, кодъяслы сетчисны кырсалысь ань моз. Тайӧ тшӧктӧмыс лоӧ налы нэмъяс кежлӧ чужысьяссянь чужысьясӧдз.

⁸ Нӧшта висьтав, мый Израиль войтыр пӧвстысь либӧ йӧз муысь локтысьяс пӧвстысь кӧ кодкӧ ваяс сотан вись либӧ мукӧд вись,

⁹ но оз вайӧд пемӧссӧ вежа чом пыранін дорӧ, медым вайны Господьлы вись пыдди, сэки тайӧ мортсӧ лоӧ бырӧдӧма аслас войтыр пӧвстысь».

Вир сёйӧмысь ӧлӧдӧм

¹⁰ «Израиль войтыр пӧвстысь либӧ йӧз муысь локтысьяс пӧвстысь кӧ кодкӧ сёяс вир, Ме паныд сувта сылы да бырӧда сійӧс войтыр пӧвстысь,

¹¹ ӧд быд ловъя олысьлӧн олӧмыс сылӧн вирас. Мыжнытӧ вештӧм могысь Ме тшӧкті тіянлы вир вайны висьпуктанін вылӧ, ӧд вирын олӧм, и сійӧ вештӧ мыжнытӧ.

¹² Та вӧсна Ме ӧлӧді Израиль пиянӧс, медым на пӧвстысь либӧ йӧз муысь локтысьяс пӧвстысь некод эз сёй вир.

¹³ Израиль пиян пӧвстысь либӧ йӧз муысь локтысьяс пӧвстысь кӧ кодкӧ кыяс пемӧсӧс либӧ лэбачӧс, кутшӧмӧс позьӧ сёйны, кыйдӧсыслысь вирсӧ лэдзӧм бӧрын мед тыртас муӧн.

¹⁴ Быд ловъя олысьлӧн олӧмыс сылӧн вирас. Ме ӧлӧді Израиль пиянӧс, медым эз сёйны некутшӧм вир, ӧд быд ловъя олысьлӧн олӧмыс сылӧн вирас. Вир сёйысьӧс лоӧ бырӧдӧма.

¹⁵ Вужвойтыр пӧвстысь либӧ йӧз муысь локтысьяс пӧвстысь кӧ кодкӧ сёяс шой либӧ косявлӧм пемӧслысь яй, сійӧ мед мыськалас паськӧмсӧ да ачыс тшӧтш мыссяс. Рытӧдзыс сійӧ лоӧ пеж, а сэсся лоӧ сӧстӧм.

¹⁶ А оз кӧ мыськав ассьыс паськӧмсӧ да оз мыссьы, лоӧ мыжа».