Левит 16 - Коми Библия 2023

Мыж вештан лун

¹ Ааронлӧн кыкнан пиыс кулӧм бӧрын Господь сёрнитіс Мӧисейкӧд. Найӧ кулісны сы понда, мый локтісны Господь водзӧ [мӧд биӧн].

² Господь шуис Мӧисейлы: «Висьтав Аарон вокыдлы, мый сылы оз позь быд кадӧ пырны Вежаинын ӧшалысь дӧра сайӧ, Йитӧд куд водзӧ [мыж лэдзанін водзӧ], медым сійӧ эз кув. Ӧд Йитӧд куд вевт весьтас Ме кута петкӧдчыны кымӧр пытшкын.

³ Вежаинӧ пыригӧн Аарон мед вайӧдас мыжысь вись пыдди ӧшкӧс да сотан вись пыдди межӧс.

⁴ Сійӧ мед пасьталас вежа шабді дӧрӧм да улыс шабді гач, кӧрталас коскас шабді вӧнь да вевттяс юрсӧ шабді юркӧртӧднас. Тайӧ вежа паськӧмсӧ мед пасьталас мыссьӧм бӧрас.

⁵ Израиль войтыр мед ваяс сылы кык ай кӧзаӧс мыжысь вись пыдди да ӧти межӧс сотан вись пыдди.

⁶ Сэсся Аарон ас вӧснаыс мед ваяс мыжысь вись пыдди ӧшкӧс, тадзи вештас ассьыс да гортсаясыслысь мыжсӧ.

⁷ Кык ай кӧзасӧ мед босьтас да сувтӧдас Господь водзӧ, вежа чом пыранін дорӧ.

⁸ Ай кӧзаяссӧ сійӧ мед торйӧдас пудъясьӧмӧн: ӧтисӧ мед ваясны Господьлы вись пыдди, мӧдсӧ мед нуӧдасны овтӧминӧ.

⁹ Господьлы веськалӧм ай кӧзасӧ Аарон мед ваяс мыжысь вись пыдди,

¹⁰ а мӧдсӧ мед сувтӧдас ловйӧн Господь водзӧ. Мыж вештӧм могысь мед пуктасны мыжъяссӧ кӧза вылас да вӧтласны овтӧминӧ. [Тайӧ кӧзаыс ас вылас нуас Израиль пиянлысь мыжъяссӧ овтӧминӧ.]

¹¹ Аарон мед начкас ӧшкӧс да ваяс сійӧс мыжысь вись пыдди ас вӧснаыс, медым вештыны ассьыс да гортсаясыслысь мыжсӧ.

¹² Господь водзысь висьпуктанінысь мед босьтас тшынӧдчан доз тыр ӧгыр да кык китыр ниртӧм чӧскыд дука тшынӧдчантор. Мед пыртас найӧс Вежаинын ӧшалысь дӧра сайӧ.

¹³ Тшынӧдчанторсӧ Аарон мед пуктас Господь водзӧ би вылӧ. Сэки тшыныс вевттяс Йитӧд кудлысь вевтсӧ, и Аарон оз кув.

¹⁴ Сэсся мед босьтас ӧш вир да чуньсӧ кӧтӧдлӧмӧн резас вевт вывсӧ, а вевт водзсӧ мед резас сизимысь.

¹⁵ Войтырлӧн мыжысь вись пыдди Аарон мед начкас ай кӧзаӧс. Вирсӧ мед пыртас Вежаинын ӧшалысь дӧра сайӧ да ӧш вирӧн моз мед резас Йитӧд кудлысь вевт вывсӧ да вевт водзсӧ.

¹⁶ Татшӧм ногӧн сійӧ сӧстӧммӧдас Вежасьыс-вежаинсӧ Израиль пиянлӧн пежсьыс да мыжсьыс. Израиль пиян пӧвстын сулалысь вежа чомсӧ мед ставнас сӧстӧммӧдас налӧн пежсьыс.

¹⁷ Мед некод оз ло вежа чомйын, кор Аарон пырас сэтчӧ, медым вештыны ассьыс, гортсаясыслысь да Израиль войтырлысь мыжсӧ. Кытчӧдз сійӧ оз пет вежа чомйысь, сэтчӧ мед некод оз пыр.

¹⁸ Вежа чомйысь петӧм бӧрын Аарон мед сувтас Господь водзын сулалысь висьпуктанін дорӧ да сӧстӧммӧдас сійӧс. Ӧш вирӧн да кӧза вирӧн мед мавтас висьпуктанінлысь сюръяссӧ быд боксянь.

¹⁹ Вирнас мед кӧтӧдас чуньсӧ да сизимысь резас висьпуктанінсӧ. Тадзи сӧстӧммӧдас сійӧс Израиль пиянлӧн пежсьыс да вежӧдас сійӧс.

²⁰ Вежасьыс-вежаинсӧ да ставнас вежа чомсӧ, висьпуктанінсӧ [да попъясӧс] сӧстӧммӧдӧм бӧрын Аарон мед вайӧдас ловъя ай кӧзаӧс,

²¹ пуктылас кыкнан кисӧ сылы юр вылас да висьтасяс Израиль пиянлӧн став мыжсьыс да лёк вӧчӧмсьыс. Тадзи Аарон пуктас налысь мыжъяссӧ кӧзалы юр вылас. Сэсся мед тшӧктас торъя мортлы нуӧдны кӧзасӧ овтӧминӧ.

²² Израиль войтырлысь став мыжсӧ тайӧ кӧзаыс нуас ас вылас овтӧминӧ. Кӧзасӧ вӧтлӧм бӧрын

²³ Аарон мед пырас вежа чомйӧ, пӧрччас шабді паськӧмсӧ, мый пасьтавліс вежаинӧ пырӧм водзвылын, да коляс сэтчӧ.

²⁴ Вежаинас мед мыссяс ваӧн да бӧр пасьталас ассьыс паськӧмсӧ. Вежа чомйысь петӧм бӧрын ас вӧснаыс да войтырыс вӧсна мед ваяс сотан вись. Тадзи вештас ассьыс да войтырлысь мыжсӧ [тшӧтш гортсаясыслысь да попъяслысь мыжсӧ].

²⁵ Мыжысь висьлысь госсӧ мед сотас висьпуктанін вылын.

²⁶ Овтӧминӧ кӧзаӧс нуӧдысьыс мед мыськалас паськӧмсӧ да ачыс тшӧтш мыссяс, сӧмын та бӧрын вермас локны йӧз дінӧ чомъясӧ.

²⁷ Мыжысь вись пыдди вайӧм ӧшсӧ да ай кӧзасӧ, кодъяслысь вирсӧ вӧлі пыртӧма вежаинӧ сійӧс сӧстӧммӧдӧм могысь, мед нуасны чомъяс сайӧ. Кучикнас, яйнас да сювнас найӧс мед сотасны биын.

²⁸ Сотысьыс мед мыськалас паськӧмсӧ да ачыс тшӧтш мыссяс, сӧмын та бӧрын вермас локны йӧз дінӧ чомъясӧ.

²⁹ Сизимӧд тӧлысьлӧн дасӧд лунӧ раммӧдчӧй-видзалӧй, некутшӧм удж энӧ вӧчӧй, ни вужвойтыр, ни йӧз муысь локтысьяс. Олӧй тайӧ тшӧктӧмыс серти нэмъяс чӧж.

³⁰ Тайӧ лунӧ став мыжнытӧ лоӧ вештӧма, медым ті вӧлінныд Господь водзын сӧстӧмӧсь.

³¹ Сэки тіян шойччан лун, кор тіянлы колӧ раммӧдчыны-видзавны. Тайӧ тшӧктӧмсӧ сетӧма тіянлы нэмъяс кежлӧ.

³² Мыжнытӧ мед вештас поп, кодӧс мавтыштӧма да пуктӧма кесъявны аслас батьыс бӧрся. Сійӧ мед пасьталас вежа шабді паськӧмсӧ,

³³ сэсся мед сӧстӧммӧдас Вежасьыс-вежаинсӧ, ставнас вежа чомсӧ да висьпуктанінсӧ, вештас попъяслысь да став войтырыслысь мыжсӧ.

³⁴ Олӧй тайӧ тшӧктӧмыс серти нэмъяс чӧж. Ӧтчыдысь вонас поп мед вештас Израиль войтырлысь став мыжсӧ». Аарон вӧчис сідзи, кыдзи Господь тшӧктіс Мӧисейлы.