Левит 14 - Коми Библия 2023

Проказаысь бурдӧм мортӧс сӧстӧммӧдӧм

¹ Господь шуис Мӧисейлы:

² «Тайӧ индӧдыс проказаысь бурдӧм морт йылысь да сылӧн сӧстӧммӧдчан лун йылысь. Мортсӧ колӧ вайӧдны поп дінӧ.

³ Поп мед петас чомъяс сайӧ, медым видзӧдлыны мортӧс. Мортыс кӧ бурдӧма проказаысь,

⁴ сійӧс сӧстӧммӧдӧм могысь мед тшӧктас вайны кык ловъя сӧстӧм лэбачӧс, сус путор, югыдгӧрд шӧрт да иссоп турун.

⁵ Ӧти лэбачсӧ поп мед тшӧктас начкыны гырнич доз весьтын, кытчӧ гумовтӧма визувтанінысь ва.

⁶ Ловъя лэбачсӧ, сус путорсӧ, югыдгӧрд шӧртсӧ да иссоп турунсӧ поп мед сюйлас начкӧм лэбачлӧн вирӧ.

⁷ Сэсся проказаысь сӧстӧммӧдчысь мортӧс поп мед сизимысь резас вирӧсь ванас да шуас сӧстӧмӧн, а ловъя лэбачсӧ лэдзас лэбавны.

⁸ Сӧстӧммӧдчысь мед мыськалас паськӧмсӧ, шырсяс-бритчас да мыссяс. Та бӧрти сійӧ лоӧ сӧстӧм и вермас бӧр локны войтыр пӧвстӧ. Но аслас чомйӧ сизим лун чӧж мед оз на пыр.

⁹ Сизимӧд луннас мед бара кушӧдз шырас юрсӧ, тошсӧ да синкымсӧ, тшӧтш став ловгӧнсӧ. Мед мыськалас паськӧмсӧ да ачыс тшӧтш мыссяс. Та бӧрын сійӧ лоӧ сӧстӧм.

¹⁰ Кӧкъямысӧд луннас проказаысь бурдӧм морт мед босьтас дзоньвидза [арӧса] кык межӧс да дзоньвидза арӧса ыжӧс. Нянь вись пыдди мед босьтас выйӧн гудралӧм шобді пызь да олив вый. Ефа мында пызьсӧ мед юкас дас пельӧ и сэтысь мед босьтас куимсӧ. А выйсӧ мед босьтас ӧти лог мында.

¹¹ Поп мед сувтӧдас сӧстӧммӧдчыны локтӧм мортӧс вайӧмторнас Господь водзӧ вежа чом пыранін дорӧ.

¹² Поп мед босьтас ӧти межсӧ да ваяс сійӧс мыж вештан вись пыдди. Нӧшта мед босьтас олив выйсӧ да ваяс мыж вештан виськӧд Господь водзын пыркӧдан вись пыдди.

¹³ Поп мед начкас межсӧ сэні, кӧні начкӧны мыжысь вись да сотан вись. Мыж вештан висьыс лоӧ поплы, кыдзи и мыжысь вись. Тайӧ – вежасьыс-вежатор.

¹⁴ Поп мед босьтас мыж вештан висьлысь вирсӧ да мавтыштас сӧстӧммӧдчысь мортлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ.

¹⁵ Аслас шуйга ки пыдӧсас поп мед кисьтас вайӧм олив вый,

¹⁶ а веськыд кисьыс чуньсӧ выйнас кӧтӧдлӧмӧн сизимысь мед резас Господь водзын.

¹⁷ Ки пыдӧсас кольӧм выйнас поп мед мавтыштас сӧстӧммӧдчысь мортлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ – ставсӧ, мый вӧлі мавтыштӧма мыж вештан вись вирӧн.

¹⁸ Коляс выйсӧ ки пыдӧссьыс мед кисьтас сӧстӧммӧдчысьлы юр вылас. Тадзи поп вештас сылысь мыжсӧ Господь водзын.

¹⁹ Сэсся поп мед ваяс мыжысь вись, медым пежсьыс сӧстӧммӧдчысь мортлысь вештыны мыжсӧ. Та бӧрын поп мед начкас сотан висьӧс

²⁰ да сотас сійӧс нянь виськӧд висьпуктанін вылын. Тадзи поп вештас мортлысь мыжсӧ, и сійӧ лоӧ сӧстӧм.

²¹ Сӧстӧммӧдчысь кӧ гӧльлун вӧснаыс оз вермы вайны та мында вайӧмторсӧ, сійӧ мед ваяс мыж вештӧм могысь ӧти межӧс, кодӧс пыркӧдӧмӧн вайӧны мыж вештан вись пыдди. Нянь вись пыдди мед ваяс выйӧн гудралӧм шобді пызь – ефалысь дасӧд юкӧнсӧ. Нӧшта мед ваяс ӧти лог мында олив вый,

²² кык гулюӧс либӧ кык гулюпиӧс, кутшӧмӧс вермас вайны. Ӧтиыс мед лоӧ мыжысь вись, а мӧдыс – сотан вись.

²³ Кӧкъямысӧд луннас тайӧ висьяснас сійӧ мед локтас поп дінӧ вежа чом пыранін дорӧ, медым сӧстӧммӧдчыны Господь водзын.

²⁴ Поп мед босьтас мыж вештан вись пыдди вайӧм межӧс, олив выйсӧ да ваяс найӧс Господь водзын пыркӧдан вись пыдди.

²⁵ Поп мед начкас мыж вештан вись пыдди вайӧм межӧс, босьтас сылысь вирсӧ да мавтыштас сӧстӧммӧдчысь мортлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ.

²⁶ Аслас шуйга ки пыдӧсас поп мед кисьтас олив вый

²⁷ а веськыд кисьыс чуньсӧ выйнас кӧтӧдлӧмӧн сизимысь мед резас Господь водзын.

²⁸ Ки пыдӧсас кольӧм выйнас поп мед мавтыштас сӧстӧммӧдчысь мортлысь веськыд пельтугсӧ, веськыд кисьыс певсӧ да веськыд коксьыс ыджыд чуньсӧ – ставсӧ, мый вӧлі мавтыштӧма мыж вештан вись вирӧн.

²⁹ Коляс выйсӧ ки пыдӧссьыс мед кисьтас сӧстӧммӧдчысьлы юр вылас, медым вештыны сылысь мыжсӧ Господь водзын.

³⁰ Сэсся поп мед ваяс вись пыдди гулюясӧс либӧ гулюпиянӧс, мый сӧстӧммӧдчысь вермас вайны.

³¹ Ӧтисӧ поп мед ваяс мыжысь вись пыдди, а мӧдсӧ – сотан вись пыдди нянь виськӧд. Тадзи поп вештас сӧстӧммӧдчысь мортлысь мыжсӧ Господь водзын».

³² Тайӧ индӧдыс проказаысь бурдӧм гӧль мортӧс сӧстӧммӧдӧм йылысь.

Керкапытшса проказа йылысь

³³ Господь шуис Мӧисейлы да Ааронлы:

³⁴ «Кор овмӧдчанныд Ханаан муӧ, мый Ме сета тіянлы, и Ме ыста кутшӧмкӧ керка вылӧ проказа,

³⁵ сэки сійӧ, кодлӧн тайӧ керкаыс, мед мунас поп дінӧ да шуас: ”Менам керкаын мыйкӧ проказа кодь мыччысьӧма”.

³⁶ Поп мед тшӧктас петкӧдны керкаысь став кӧлуйсӧ. Оз кӧ петкӧдны, керкаын ставыс вермас лоны пеж. Сэсся поп мед локтас видзӧдлыны керкасӧ.

³⁷ Сійӧ кӧ аддзас керка стенмысь турунвиж либӧ гӧрдов чутъяс, и найӧ кӧ пыдӧдз пырӧмаӧсь,

³⁸ мед петас керкасьыс да тупкас керкасӧ сизим лун кежлӧ.

³⁹ Сизимӧд луннас поп мед бара локтас видзӧдлыны. Чутъясыс кӧ паськалӧмаӧсь стенмас,

⁴⁰ мед тшӧктас перъявны пежасьӧм изъяссӧ да шыбитны кар сайӧ пежинӧ.

⁴¹ Керкапытшса стенсӧ мед гирскасны да став гирскӧмасӧ мед шыбитасны кар сайӧ пежинӧ.

⁴² Мед пуктасны выль изъяс сэтчӧ, кытысь перйисны пежасьӧм изъяссӧ, а стенсӧ мед мавтасны выль гудрасӧн.

⁴³ Изъяссӧ перъялӧм, стенсӧ гирскӧм да мавтӧм бӧрын кӧ чутъясыс выльысь мыччысясны,

⁴⁴ поп мед бара локтас да видзӧдлас керкасӧ. Чутъясыс кӧ паськалӧмаӧсь, сідзкӧ, тайӧ лёк проказа, и керкаыс пеж.

⁴⁵ Керкасӧ колӧ жугӧдны, а изъяссӧ, путоръяссӧ да стен гудрассӧ колӧ шыбитны кар сайӧ пежинӧ.

⁴⁶ Керка тупкылӧм бӧрас кӧ кодкӧ сэтчӧ пыралас, сійӧ рытӧдзыс лоӧ пеж.

⁴⁷ Коді узяс либӧ сёяс тайӧ керкаас, сійӧ мед мыськалас паськӧмсӧ [и сійӧ рытӧдзыс лоӧ пеж].

⁴⁸ Кор поп локтас видзӧдлыны керкасӧ да аддзас кӧ, мый стенсӧ выльысь мавтӧм бӧрын чутъясыс абу паськалӧмаӧсь, сійӧ мед шуас керкасӧ сӧстӧмӧн, ӧд керкаын проказаыс абу.

⁴⁹ Керкасӧ сӧстӧммӧдӧм могысь поп мед босьтас кык лэбачӧс, сус путор, югыдгӧрд шӧрт да иссоп турун.

⁵⁰ Ӧти лэбачсӧ мед начкас гырнич доз весьтын, кытчӧ гумовтӧма визувтанінысь ва.

⁵¹ Сус путорсӧ, иссоп турунсӧ, югыдгӧрд шӧртсӧ да ловъя лэбачсӧ поп мед сюйлас ваӧ, кытчӧ войталіс начкӧм лэбачлӧн вирыс. Вирӧсь ванас поп мед сизимысь резас керкасӧ.

⁵² Лэбач вирӧсь ваӧн, ловъя лэбачӧн, сус путорйӧн, иссоп турунӧн да югыдгӧрд шӧртӧн керкасӧ сӧстӧммӧдӧм бӧрын

⁵³ поп мед лэдзас ловъя лэбачсӧ кар сайӧ видз вылӧ. Тадзи поп сӧстӧммӧдас керкасӧ, и керкаыс лоӧ сӧстӧм».

⁵⁴ Тайӧ индӧдыс проказа да карс йылысь,

⁵⁵ паськӧм вылын да керка пытшкын проказа йылысь, пыкӧс, лӧмӧссьӧмин да чутъяс йылысь,

⁵⁶ медым тӧдны, мый пеж, а мый сӧстӧм. Татшӧм индӧд проказа йылысь.