Левит 13 - Коми Библия 2023

Проказа йылысь индӧд

¹ Господь шуис Мӧисейлы да Ааронлы:

² «Кодлӧн кучик вылас лоӧ пыкӧс, карс либӧ чут, мый серти позьӧ чайтны, мый мортыслӧн проказа, сійӧс колӧ вайӧдны Аарон поп дінӧ либӧ Аарон рӧдысь мукӧд поп дінӧ.

³ Поп мед видзӧдлас кучиксӧ, кӧні эм пыкӧс, карс либӧ чут. Ловгӧныс кӧ едждӧма, и дойыс яйӧдзыс пырӧма, тайӧ проказа. Поп мед шуас висьысьӧс пежӧн.

⁴ Кучик вылас кӧ эм еджыд чут, но сійӧ абу яйӧдзыс пырӧма, и ловгӧныс абу едждӧма, поп мед йӧршитлас висьысьӧс сизим лун кежлӧ.

⁵ Сизимӧд луннас поп мед бара видзӧдлас висьысьӧс. Чутыс кӧ абу вежсьӧма да абу паськалӧма, поп мед йӧршитлас висьысьӧс нӧшта сизим лун кежлӧ.

⁶ Сизимӧд луннас поп мед бара видзӧдлас висьысьӧс. Чутыс кӧ оз тӧдчы да абу паськалӧма, поп мед шуас висьысьӧс сӧстӧмӧн. Тайӧ абу пеж висьӧм. Висьысь мед мыськалас паськӧмсӧ, и сэсся лоӧ сӧстӧм.

⁷ Висьысьлӧн поплы петкӧдчылӧм бӧрын да поплӧн сійӧс сӧстӧмӧн шуӧм бӧрын чутыс кӧ кутас паськавны, висьысь мед выльысь петкӧдчылас поплы.

⁸ Поп кӧ аддзас, мый чутыс паськалӧма, мед шуас висьысьӧс пежӧн. Тайӧ проказа.

⁹ Мортӧс, коді висьмӧ проказаӧн, колӧ нуӧдны поп дінӧ.

¹⁰ Видзӧдлӧм бӧрас кӧ поп аддзас, мый кучик вылас еджыд пыкӧс, кӧні тыдовтчӧ вируля яй, и ловгӧныс едждӧма,

¹¹ сідзкӧ, висьысьлӧн кучик вылас важся проказа. Поп мед шуас сійӧс пежӧн да йӧршитас, ӧд сійӧ пеж.

¹² Аддзас кӧ поп, мый проказаыс вевттьӧма висьысьӧс юр вывсяньыс кок улӧдзыс

¹³ да паськалӧма став вир-яй пасьталаыс, сэки тайӧ мортсӧ мед шуас сӧстӧмӧн. Ӧд коді ставнас едждӧма, сійӧ сӧстӧм.

¹⁴ Но сійӧ лунсяньыс, кор мортыслӧн кучик вылас воссьӧ вируля яйыс, сійӧ лоӧ пеж.

¹⁵ Кор поп аддзас вируля яйсӧ, мед шуас висьысьӧс пежӧн, ӧд вируля яйыс пеж. Тайӧ проказа.

¹⁶ Но вируля яйыс кӧ бара едждас, висьысь мед выльысь локтас поп дінӧ.

¹⁷ Видзӧдлӧм бӧрас кӧ поп аддзас, мый дойыс едждӧма, мед шуас мортӧс сӧстӧмӧн. Сійӧ сӧстӧм.

¹⁸ Мортлӧн кучик вылас кӧ лоӧ орзьӧм мыль, и мылльыс письтас-бурдас,

¹⁹ но сы местаӧ лоӧ еджыд пыкӧс либӧ гӧрдов-еджгов чут, висьысь мед петкӧдчас поплы.

²⁰ Видзӧдлӧм бӧрас кӧ поп аддзас, мый дойыс яйӧдзыс пырӧма, и ловгӧныс едждӧма, мед шуас висьысьӧс пежӧн. Тайӧ проказа. Сійӧ петӧма мыль местаӧ.

²¹ Поп кӧ аддзас, мый ловгӧныс сэні абу едждӧма, и дойыс абу яйӧдзыс пырӧма, а муртса тӧдчӧ, мед йӧршитлас висьысьӧс сизим лун кежлӧ.

²² Чутыс кӧ кутас паськавны, поп мед шуас висьысьӧс пежӧн. Тайӧ проказа.

²³ Чутыс кӧ абу вежсьӧма да абу паськалӧма, тайӧ орзьылӧм мыльлӧн дой. Поп мед шуас мортӧс сӧстӧмӧн.

²⁴ Сотчас кӧ кодлӧнкӧ кучикыс, и бурдӧминас лоӧ гӧрдов-еджгов чут либӧ еджыд чут,

²⁵ поп мед видзӧдлас сійӧс. Чутвывса ловгӧныс кӧ едждӧма, и чутыс яйӧдзыс пырӧма, сідзкӧ, сотчӧминас паськалӧма проказа. Поп мед шуас висьысьӧс пежӧн. Тайӧ проказа.

²⁶ Поп кӧ аддзас, мый чутвывса ловгӧныс абу едждӧма, и чутыс абу яйӧдзыс пырӧма, а муртса тӧдчӧ, мед йӧршитлас висьысьӧс сизим лун кежлӧ.

²⁷ Сизимӧд луннас поп мед бара видзӧдлас сійӧс. Чутыс кӧ паськалӧма, поп мед шуас висьысьӧс пежӧн. Тайӧ проказа.

²⁸ Чутыс кӧ абу вежсьӧма да абу паськалӧма, а муртса тӧдчӧ, пыкӧсыс лоӧма сотчӧмсянь. Поп мед шуас висьысьӧс сӧстӧмӧн, ӧд сылӧн сотчӧмбӧрса дой.

²⁹ Айловлӧн либӧ аньлӧн юр кучикас либӧ тшӧкаас кӧ мыччысяс карс,

³⁰ поп мед видзӧдлас карссӧ. Карсыс кӧ яйӧдзыс пырӧма, и юрсиыс либӧ тошгӧныс сэні вижов да вӧсни, поп мед шуас висьысьӧс пежӧн, ӧд сылӧн юр кучикас либӧ тшӧкаас проказа.

³¹ Поп кӧ аддзас, мый карсыс абу яйӧдзыс пырӧма, но сьӧд юрсиыс сэні абу, мед йӧршитлас висьысьӧс сизим лун кежлӧ.

³² Сизимӧд луннас поп мед бара видзӧдлас висьысьӧс. Карсыс кӧ абу паськалӧма, вижов юрсиыс кӧ сэні абу, и карсыс кӧ абу яйӧдзыс пырӧма,

³³ висьысь мед кушӧдз шырас юрсисӧ да бритас тошсӧ лӧмӧссьӧминсӧ вӧрӧдтӧг. Поп мед йӧршитлас висьысьӧс нӧшта сизим лун кежлӧ.

³⁴ Сизимӧд луннас поп мед бара видзӧдлас висьысьӧс. Карсыс кӧ абу паськалӧма да абу яйӧдзыс пырӧма, поп мед шуас висьысьӧс сӧстӧмӧн. Мортыс мед мыськалас паськӧмсӧ, и сэсся лоӧ сӧстӧм.

³⁵ Висьысьӧс сӧстӧмӧн шуӧм бӧрын кӧ карсыс кутас паськавны кучик вылас,

³⁶ поп мед выльысь видзӧдлас сійӧс. Карсыс кӧ паськалӧма, поплы оз нин ков корсьны вижов юрси, ӧд висьысьыс пеж.

³⁷ Но карсыс кӧ абу вежсьӧма, и сэні быдмӧ сьӧд юрси, сідзкӧ, висьысьыс бурдіс, сійӧ сӧстӧм. Поп мед шуас сійӧс сӧстӧмӧн.

³⁸ Айловлӧн либӧ аньлӧн кучик вылас кӧ тыдовтчасны еджыд чутъяс,

³⁹ поп мед видзӧдлас сійӧс. Чутъясыс кӧ еджгов-кельыдӧсь, сідзкӧ, тайӧ абу пеж висьӧм, висьысьыс сӧстӧм.

⁴⁰ Кушмӧм юр пыдӧса морт сӧстӧм.

⁴¹ Кодлӧн юрыс плешсяньыс кушмӧма, сійӧ тшӧтш сӧстӧм.

⁴² Но кушмӧм юр пыдӧсас либӧ плешкас кӧ мыччысьӧма еджыд либӧ гӧрдов чут, вермас лоны, мый тайӧ проказа.

⁴³ Поп мед видзӧдлас сійӧс. Кушмӧм юрас либӧ плешкас кӧ лоӧма еджыд либӧ гӧрдов пыкӧс, мый вир-яйвывса проказа кодь,

⁴⁴ сідзкӧ, мортыслӧн проказа, сійӧ пеж. Поп мед шуас сійӧс пежӧн, ӧд юр вылас сылӧн проказа.

⁴⁵ Проказаӧн висьысьлы колӧ новлыны косялӧм паськӧм да вевттьыны ныр-вомсӧ, а юрсӧ оз ков вевттьыны. Сійӧ мед горзӧ: ”Пеж, пеж!”

⁴⁶ Кытчӧдз мортыс висьӧ проказаӧн, сійӧ пеж. Сылы колӧ овны торйӧн, чомъяс сайын.

⁴⁷ Проказа вермас лоны вурун либӧ шабді паськӧм вылын,

⁴⁸ шабді либӧ вурун шӧрт вылын либӧ наысь кыӧм дӧра вылын, кучик вылын либӧ кучикысь вӧчӧмтор вылын.

⁴⁹ Турунвиж либӧ гӧрдов чутыс кӧ лоӧ паськӧм вылын, шӧрт-дӧра вылын, кучик вылын либӧ кучикысь вӧчӧмтор вылын, сійӧс колӧ петкӧдлыны поплы, ӧд вермас лоны, мый тайӧ проказа.

⁵⁰ Поп мед видзӧдлас чутсӧ да сизим лун кежлӧ торйӧдас пежасьӧм кӧлуйсӧ.

⁵¹ Сизимӧд луннас поп мед бара видзӧдлас кӧлуйсӧ. Паськӧм вылас, шӧрт-дӧра вылас, кучик вылас либӧ кучикысь вӧчӧмтор вылас кӧ чутыс паськалӧма, сідзкӧ, кӧлуйыс пеж, тайӧ – проказа.

⁵² Поп мед сотас лёк проказаӧн пежасьӧм кӧлуйсӧ: паськӧмсӧ, вурун либӧ шабді шӧрт-дӧрасӧ да кучикысь вӧчӧмторсӧ.

⁵³ Поп кӧ аддзас, мый чутыс абу паськалӧма паськӧм вылас, шӧрт-дӧра вылас либӧ кучикысь вӧчӧмтор вылас,

⁵⁴ мед тшӧктас мыськавны пежасьӧм кӧлуйсӧ да мӧд сизим лун кежлӧ мед торйӧдас сійӧс.

⁵⁵ Мыськӧм бӧрти кӧ поп аддзас, мый чутыс абу вежсьӧма и абу паськалӧма, сідзкӧ, тайӧ кӧлуйыс пеж. Сійӧс колӧ сотны, гугас кӧть банас мыччысьӧма чутыс.

⁵⁶ Кӧлуйсӧ мыськалӧм бӧрти кӧ поп аддзас, мый чутыс бырыштӧма, мед орӧдас-косялыштас пежасьӧм паськӧмысь, кучикысь либӧ шӧрт-дӧраысь чут мыччысянінсӧ.

⁵⁷ Паськӧм вылын, шӧрт-дӧра вылын либӧ кучикысь вӧчӧмтор вылын кӧ бара лоӧ проказа, сійӧс колӧ сотны.

⁵⁸ Паськӧм, шӧрт-дӧра либӧ кучикысь вӧчӧмтор мыськалӧм бӧрын кӧ чутыс бырас, мед нӧшта ӧтчыдысь мыськасны кӧлуйсӧ, и сійӧ лоӧ сӧстӧм».

⁵⁹ Тайӧ индӧдыс проказа йылысь, мый мыччысьӧ вурун либӧ шабді паськӧм вылын, шӧрт-дӧра вылын либӧ кучикысь вӧчӧмтор вылын. Тайӧ индӧдыс серти кӧлуйсӧ колӧ шуны сӧстӧмӧн либӧ пежӧн.