Левит 12 - Коми Библия 2023

Кага чужтӧм бӧрын сӧстӧммӧдчан лунъяс

¹ Господь тшӧктіс Мӧисейлы

² висьтавны Израиль пиянлы: «Ань кӧ кынӧмасяс да чужтас пи кагаӧс, сизим лун чӧж аньыс лоӧ пеж, кыдзи и тӧлысся мунігӧн.

³ Кӧкъямысӧд луннас кагасӧ колӧ вундыштны.

⁴ Вир мунӧмысь ань мед сӧстӧммӧдчас комын куим лун чӧж. Сылы оз позь инмӧдчыны вежаторйӧ, оз позь локны вежаинӧ, кытчӧдз оз помасьны сӧстӧммӧдчан лунъясыс.

⁵ Ань кӧ чужтас ныв кагаӧс, кык вежон чӧж аньыс лоӧ пеж, кыдзи и тӧлысся мунігӧн. Та бӧрын квайтымын квайт лун чӧж лоӧ сылӧн вир мунӧмысь сӧстӧммӧдчан лунъяс.

⁶ Писӧ либӧ нывсӧ чужтӧм бӧрын да сӧстӧммӧдчан лунъясыс помасьӧм бӧрын ань мед ваяс поплы вежа чом пыранін дорӧ сотан вись пыдди арӧса баляӧс да мыжысь вись пыдди гулюпиӧс либӧ гулюӧс.

⁷ Поп ваяс Господь водзӧ тайӧ висьяссӧ, медым вештыны аньлысь мыжсӧ. Та бӧрын ань лоӧ сӧстӧм вир мунӧмсьыс. Тайӧ индӧдыс ань йылысь, коді чужтӧ пиӧс либӧ нылӧс.

⁸ Аньыс кӧ гӧльлун вӧснаыс оз вермы вайны баляӧс, мед ваяс кык гулюӧс либӧ кык гулюпиӧс, ӧтисӧ сотан вись пыдди, мӧдсӧ мыжысь вись пыдди. Поп мед вештас аньлысь мыжсӧ, и ань лоӧ сӧстӧм».