Левит 11 - Коми Библия 2023

Сӧстӧм да пеж пемӧсъяс

¹ Господь шуис Мӧисейлы да Ааронлы:

² «Висьталӧй Израиль пиянлы, кутшӧм пемӧсъяс налы позьӧ сёйнысӧ. Му вылын олысь пемӧсӧс,

³ кодлӧн гыжйыс вожа да коді рӧмидзтӧ, позьӧ сёйны.

⁴ Но оз позь сёйны рӧмидзтысь пемӧсӧс, кодлӧн гыжйыс абу вожа. Оз позь сёйны вожа гыжъя пемӧсӧс, коді оз рӧмидзты. Энӧ сёйӧй верблюдӧс. Сійӧ рӧмидзтӧ, но сылӧн гыжйыс абу вожа. Сійӧ тіянлы пеж.

⁵ Энӧ сёйӧй даманӧс. Сійӧ рӧмидзтӧ, но сійӧ абу вожа гыжъя. Сійӧ тіянлы пеж.

⁶ Энӧ сёйӧй кӧчӧс. Сійӧ рӧмидзтӧ, но сійӧ абу вожа гыжъя. Сійӧ тіянлы пеж.

⁷ Энӧ сёйӧй порсьӧс. Сылӧн гыжйыс вожа, но сійӧ оз рӧмидзты. Сійӧ тіянлы пеж.

⁸ Тайӧ пемӧсъяслысь яйсӧ энӧ сёйӧй да налӧн шой дінӧ энӧ инмӧдчӧй, ӧд найӧ тіянлы пежӧсь.

⁹ Ты-юын да саридзын олысь-уялысьяс пиысь сёйӧй сэтшӧмӧс, кодлӧн эм борд да сьӧм.

¹⁰ Но кодлӧн абу бордйыс да сьӧмыс, сійӧ тіянлы зывӧк.

¹¹ Сылысь яйсӧ энӧ сёйӧй, сылӧн шойыс мед лоӧ тіянлы зывӧк.

¹² Ваын олысь, кодлӧн абу бордйыс да сьӧмыс, тіянлы зывӧк.

¹³ Зывӧктӧй да энӧ сёйӧй татшӧм лэбачьясӧс: кутшӧс, грифӧс да саридзкутшӧс,

¹⁴ сӧкӧл-варышӧс,

¹⁵ кырныш-ракаӧс,

¹⁶ страусӧс, сюзьӧс да каляӧс,

¹⁷ бугуйӧс, бакланӧс да ибисӧс,

¹⁸ ва курӧгӧс, пеликанӧс да чери варышӧс,

¹⁹ аистӧс, быдсикас цапляӧс, крукыль ныра сизьӧс да нярбордъя шырӧс.

²⁰ Бордъя да нёль кока посни лэбалысьяс тіянлы зывӧкӧсь.

²¹ Нёль кока бордъяяс пӧвстысь сёйӧй сӧмын найӧс, кодъяс кузь кокчӧраӧсь да вермӧны чеччавны му вывтіыс.

²² Сідзкӧ, быдсикас саранчаӧс, тирганӧс да чиркӧс верманныд сёйны.

²³ А мукӧд бордъя да нёль кока посни лэбалысьыс тіянлы зывӧкӧсь.

²⁴ Ті лоанныд пежӧсь, инмӧдчанныд кӧ пеж пемӧслӧн шойӧ. Инмӧдчысь рытӧдзыс лоӧ пеж.

²⁵ Пеж пемӧслысь шойсӧ нуысь-петкӧдысь мед мыськалас паськӧмсӧ, сійӧ рытӧдзыс лоӧ пеж.

²⁶ Пемӧсъяс, кодъяслӧн гыжйыс абу вожа да кодъяс оз рӧмидзтыны, тіянлы пежӧсь. Коді инмӧдчас на дінӧ, сійӧ [рытӧдзыс] лоӧ пеж.

²⁷ Нёль кока пемӧсъяс пӧвстысь лапаяс вылын ветлӧдлысьяс тіянлы пежӧсь. Коді инмӧдчас налӧн шойӧ, сійӧ рытӧдзыс лоӧ пеж.

²⁸ Налысь шойсӧ нуысь-петкӧдысь мед мыськалас паськӧмсӧ, сійӧ рытӧдзыс лоӧ пеж. Татшӧм пемӧсъясыс тіянлы пежӧсь.

²⁹ Му вывті котралысь-веглясьысьяс пӧвстысь тіянлы лоӧны пежӧсь: тулан, шыр, быдсикас лёкгагйыс,

³⁰ геккон, варан, сцинк да хамелеон.

³¹ Найӧ тіянлы пежӧсь. Коді инмӧдчас налӧн шойӧ, сійӧ рытӧдзыс лоӧ пеж.

³² Татшӧм котралысь-веглясьысьлӧн шойыс кӧ усяс пуысь вӧчӧм дозмук-кӧлуй вылӧ, паськӧм вылӧ, кучик вылӧ либӧ чорыд дӧра вылӧ, сэки татшӧм кӧлуйыс лоӧ пеж. Сійӧс колӧ видзыштны ваын. Рытӧдзыс сійӧ лоӧ пеж, а сэсся лоӧ сӧстӧм.

³³ Татшӧм котралысь-веглясьысь кӧ усяс гырнич дозйӧ, сэки доз пытшкас мый вӧлі, лоӧ пеж. Тайӧ дозмуксӧ колӧ жугӧдны.

³⁴ Татшӧм дозмукысь кӧ ваыс инмас сёянӧ, сёяныс лоӧ [тіянлы] пеж. Сідзжӧ юанторйыс татшӧм дозмукас лоӧ пеж.

³⁵ Ставыс, мый вылӧ усьӧ татшӧм шойыс, лоӧ пеж. Пачсӧ да горсӧ, мый вылӧ усьӧ татшӧм шойыс, колӧ жугӧдны, ӧд найӧ тіянлы пежӧсь.

³⁶ Ва петанінын либӧ юкмӧсын ваыс кольӧ сӧстӧм, но коді инмӧдчас ваын куйлысь шой дінӧ, лоӧ пеж.

³⁷ Шойыс кӧ усяс кӧдзан кӧйдыс вылӧ, кӧйдысыс кольӧ сӧстӧм.

³⁸ Но усяс кӧ ваӧн кӧтӧдӧм кӧйдыс вылӧ, сійӧ лоӧ тіянлы пеж.

³⁹ Кулас кӧ пемӧс, кодӧс тіянлы позьӧ сёйны, и сылӧн шой дінӧ кодкӧ кӧ инмӧдчас, сійӧ рытӧдзыс лоӧ пеж.

⁴⁰ Коді сёяс татшӧм яйсӧ либӧ нуас-петкӧдас шойсӧ, сылы колӧ мыськавны паськӧмсӧ, сійӧ рытӧдзыс лоӧ пеж.

⁴¹ Му вывті котралысь-веглясьысьяс тіянлы зывӧкӧсь, найӧс тіянлы сёйнысӧ оз позь.

⁴² Кынӧм вылас кыскасьысьясӧс, нёль кока да уна кока котралысьясӧс энӧ сёйӧй, ӧд найӧ зывӧкӧсь.

⁴³ Энӧ пежалӧй асьнытӧ на вӧсна, энӧ лоӧй пежӧсь на пыр.

⁴⁴ Ме – Господь, тіян Енныд. Вежӧдӧй-сӧстӧммӧдӧй асьнытӧ, лоӧй вежаӧсь, ӧд Ме [Господь, тіян Енныд] – вежа. Энӧ пежалӧй асьнытӧ му вывті котралысь-веглясьысьяс вӧсна.

⁴⁵ Ӧд Ме – Господь. Ме петкӧді тіянӧс Египет муысь, медым лоны тіян Енмӧн. Сідзкӧ, лоӧй вежаӧсь, ӧд Ме – вежа».

⁴⁶ Тайӧ индӧдыс пемӧсъяс, лэбачьяс, ваын олысь-уялысьяс да му вывті котралысь-веглясьысьяс йылысь,

⁴⁷ медым торйӧдны сӧстӧмсӧ пежсьыс да торйӧдны, кутшӧм пемӧсӧс позьӧ сёйны, а кутшӧмӧс оз.