Левит 10 - Коми Библия 2023

Надавлӧн да Авиудлӧн мыж

¹ Ааронлӧн Надав да Авиуд пияныс босьтісны ассьыныс ӧгыр дознысӧ да пуктісны сэтчӧ ӧгыр, а ӧгыр вылас – чӧскыд ӧвтанторъяс. Тадзи найӧ вайисны Господь водзӧ мӧд би, мый Господь эз тшӧкты вайнысӧ.

² Сэки петіс Господьсянь би да сотіс найӧс, и найӧ кулісны Господь чужӧмбан водзын.

³ Мӧисей шуис Ааронлы: «Господь ӧд та йылысь висьталіс, кор шуис: ”Ассьым вежалунӧс Ме петкӧдла Ас бердын кесъялысьяс пыр, Ассьым дзирдлунӧс петкӧдла войтырлы”». Аарон чӧв оліс.

⁴ Мӧисей корис Мисаэлӧс да Элцафанӧс, Ааронлӧн Узиэл дядьыслысь пиянсӧ, да шуис налы: «Локтӧй да петкӧдӧй вокъясныдлысь шойяссӧ вежаин ортсыӧ, чомъяс сайӧ».

⁵ Найӧ локтісны да шойяссӧ паськӧмӧдыс босьтӧмӧн петкӧдісны чомъяс сайӧ, кыдзи тшӧктіс Мӧисей.

⁶ Ааронлы, сылӧн Элазар да Итамар пиянлы Мӧисей шуис: «Паськӧмнытӧ энӧ косялӧй, юрнытӧ вевттьӧй, медым ті энӧ кулӧй, и став войтырыс мед эз веськав Енлӧн скӧрлун улӧ. Но тіян вокъясныд, став Израиль войтыр, мед бӧрдасны на вӧсна, кодъясӧс Господь сотіс.

⁷ Энӧ вешйӧй вежа чом пыранін дорысь, медым энӧ кулӧй, ӧд тіянӧс мавтыштӧма Господьлӧн вежа выйӧн». Найӧ кывзысисны Мӧисейлысь.

Попъяслы тшӧктӧмъяс

⁸ Господь шуис Ааронлы:

⁹ «Вина-сур юӧм бӧрын энӧ пырӧй вежа чомйӧ [да энӧ матыстчӧй висьпуктанін дорӧ], медым энӧ кулӧй. Тайӧ тшӧктӧмыс тіянлы нэмъяс кежлӧ чужысьяссянь чужысьясӧдз.

¹⁰ Кужӧй торйӧдны, мый вежа, а мый абу вежа, мый пеж, а мый сӧстӧм.

¹¹ Велӧдӧй Израиль пиянӧс став тшӧктӧмас, мый Господь висьталіс налы Мӧисей пыр».

¹² Мӧисей висьталіс Ааронлы да сылӧн ловйӧн кольӧм Элазар да Итамар пияныслы: «Босьтӧй Господьлы вайӧм нянь висьлысь коляссӧ, пӧжалӧй сійӧс шоммӧдтӧг да сёйӧй висьпуктанін дорын, ӧд тайӧ – вежасьыс-вежатор.

¹³ Сёйӧй сійӧс вежаинын, ӧд тайӧ Господьлы вайӧм висьлӧн юкӧн, мый вичмӧ тэныд да тэсянь чужысьяслы. Тадзи тшӧктіс меным Господь.

¹⁴ Пыркӧдан вись пыдди вайӧм морӧсвыв яйсӧ да кыпӧдлан вись пыдди вайӧм задвыв яйсӧ сёйӧй ныв-пиныдкӧд сӧстӧминын, ӧд Израиль пиянлӧн бурасян висьлысь тайӧ юкӧнъяссӧ Господь индіс тэныд да тэсянь чужысьяслы.

¹⁵ Задвыв яйсӧ да морӧсвыв яйсӧ сотан госыскӧд вайӧй Господь водзын пыркӧдан вись пыдди. Тайӧ юкӧнъясыс вичмӧны тэныд да тэсянь чужысьяслы нэмъяс чӧж, кыдзи тшӧктіс Господь».

¹⁶ Мӧисей корсис мыжысь вись пыдди вайӧм ай кӧзасӧ. Но, вӧлӧмкӧ, сійӧс сотӧмаӧсь нин. Мӧисей скӧрмис Ааронлӧн ловйӧн кольӧм Элазар да Итамар пияныс вылӧ да шуис налы:

¹⁷ «Мыйла ті энӧ сёйӧй мыжысь висьсӧ? Сійӧс колӧ вӧлі сёйны вежаинын, ӧд сійӧ – вежасьыс-вежатор. Господь индӧма сійӧс тіянлы, медым босьтінныд-вештінныд войтырлысь мыжсӧ Господь водзын.

¹⁸ Тайӧ висьлысь вирсӧ абу вӧлі пыртӧма вежаинӧ. Тіянлы колӧ вӧлі сёйны сылысь яйсӧ вежаинын, кыдзи ме тшӧкті тіянлы».

¹⁹ Аарон шуис Мӧисейлы: «Талун найӧ вайисны Господь водзӧ мыжысь висьнысӧ да сотан висьнысӧ. Менӧ суис шог, и Господьлы ӧмӧй шогмана вӧлі, ме кӧ сёйи талун мыжысь висьсӧ?»

²⁰ Мӧисей кывзіс да сибӧдіс Ааронлысь кывъяссӧ.