Левит 1 - Коми Библия 2023

Сотан вись

¹ Господь шыасис Мӧисей дінӧ вежа чомсянь да тшӧктіс

² висьтавны Израиль пиянлы: «Коді кутас вайны Господьлы вись, мед ваяс ӧшкӧс, ыжӧс либӧ кӧзаӧс.

³ Сотан висьнас кӧ лоӧ гырысь пемӧс, вись вайысь мед вайӧдас дзоньвидза ӧшкӧс вежа чом пыранін дорӧ. Тадзи вись вайысь лоӧ шогмана Господьлы.

⁴ Вись вайысь мед пуктылас кисӧ ӧшлы юр вылас, сэки Господь сибӧдас сылысь висьсӧ, и сылысь мыжсӧ лоӧ вештӧма.

⁵ Сійӧ мед начкас ӧшсӧ Господь водзын. А попъяс, Ааронсянь чужысьяс, мед ваясны ӧшлысь вирсӧ да резасны вежа чом пыранін дорысь висьпуктанінсӧ быд боксянь.

⁶ Вись вайысь мед куляс ӧшлысь кучиксӧ да кералас-юклас тушасӧ.

⁷ Попъяс, Ааронсянь чужысьяс, мед пестасны висьпуктанін вылӧ би да пукталасны сэтчӧ пес,

⁸ сэсся сотчысь пес вылас мед пукталасны ӧшлысь яйсӧ, юрсӧ да госсӧ.

⁹ Ӧшлысь ты-муссӧ да кокъяссӧ колӧ мыськавны ваӧн, а сэсся поп мед сотас ставсӧ висьпуктанін вылын. Тайӧ лоӧ сотан вись, Господьлы чӧскыд ӧвтантор.

¹⁰ Сотан висьнас кӧ лоӧ ыж либӧ кӧза, вись вайысь мед ваяс дзоньвидза ай пемӧсӧс да [сылы юр вылас кисӧ пуктылӧм бӧрын]

¹¹ мед начкас сійӧс Господь водзын висьпуктанін войвывладорын. Попъяс, Ааронсянь чужысьяс, мед вирнас резасны висьпуктанінсӧ быд боксянь.

¹² Тушасӧ колӧ керавны-юклыны, юрсӧ да госсӧ торйӧдны, сэсся поп мед пуктас ставсӧ висьпуктанінӧ сотчысь пес вылӧ.

¹³ Ты-муссӧ да кокъяссӧ колӧ мыськавны ваӧн, а сэсся поп мед сотас ставсӧ висьпуктанін вылын. Тайӧ лоӧ сотан вись, Господьлы чӧскыд ӧвтантор.

¹⁴ Господьлы сотан висьнас кӧ лоӧ лэбач, вись вайысь мед ваяс гулюӧс либӧ гулюпиӧс.

¹⁵ Поп мед ваяс гулюӧс висьпуктанін дорӧ да песовтас сылысь юрсӧ, а вирсӧ мед пычкас висьпуктанін бердӧ. Сэсся гулюсӧ сотас висьпуктанін вылын.

¹⁶ Гулюлысь перйӧм чульсӧ да куштӧм гӧнсӧ мед шыбитас висьпуктанін асывладорӧ, кытчӧ чукӧртӧны пӧим.

¹⁷ Гулюӧс бордъясӧдыс кутӧмӧн мед вожӧдас, но оз торйӧд кык пельӧ, сэсся мед пуктас сійӧс висьпуктанінӧ сотчысь пес вылӧ. Тайӧ лоӧ сотан вись, Господьлы чӧскыд ӧвтантор».