Колосӧ 4 - Коми Библия 2023

¹ Ыджыдъяс, лоӧй веськыдӧсь кесйӧгныдкӧд, быдӧнӧс сибӧдӧй ӧтмоза. Тӧдӧй, енэжас тіян вылын тшӧтш эм Ыджыдыс.

Павеллӧн ышӧдӧм

² Садьмӧдчӧй, дугдывтӧг кевмысьӧй. Вӧчӧй тайӧс Енмӧс аттьӧалӧмӧн.

³ Кевмысьӧй тшӧтш миян вӧсна, Енмыс мед восьтас миянлы ӧдзӧсъяс висьтавны Кристос йылысь гусяторсӧ. Дзик та вӧсна ме и пукала дзескыдінын.

⁴ Кевмысьӧй, медым ме верми восьтны гусяторсӧ да колана ногӧн висьтавны сійӧс.

⁵ Лоӧй мывкыдаӧсь эскытӧмъяскӧд, энӧ коллялӧй каднытӧ весьшӧрӧ.

⁶ Сёрнитӧй бур сьӧлӧмӧн, сёрниныд мед век вӧлі солыштӧма, сэки быдӧнлы кужанныд вочавидзны колана ногӧн.

Чолӧмъяс

⁷ Ме йылысь ставсӧ тіянлы висьталас Тихик. Сійӧ – менам муса вок да уджъёрт, Господьлӧн эскана кесъялысь.

⁸ Ме мӧдӧда сійӧс тіян дінӧ, медым тӧдмавны тіян йылысь да ышӧдны тіянӧс.

⁹ Сыкӧд тшӧтш мӧдӧда миян муса да эскана Ӧнисим вокӧс, сійӧ ӧд тіянысь петіс. Найӧ висьталасны ставсӧ, мый миян вӧчсьӧ тані.

¹⁰ Чолӧм тіянлы Аристарксянь, сійӧ мекӧд ӧтлаын пукалӧ дзескыдінын. Чолӧм ыстӧ тшӧтш Варнавалӧн Марк нима воча вокыс. Тіянлы ме гижлі сы йылысь, мися, локтас кӧ, сибӧдӧй сійӧс.

¹¹ Чолӧм Исуссянь, кодӧс нимтӧны Юстӧн. Вундыштчӧмаяс пиысь сӧмын найӧ вӧчӧны мекӧд Ен Юралӧмлысь уджсӧ да вайӧны меным нимкодьлун.

¹² Чолӧм ыстӧ тіян Епафрасныд, Исус Кристослӧн кесйӧг. Кевмысигас сійӧ пыр тышын тіян вӧсна, мед эськӧ ті век сулалінныд зумыда да быдторйын тӧдінныд Енлысь кӧсйӧмсӧ.

¹³ Висьтала тіянлы, сійӧ ёна уджалӧ-шогсьӧ тіян вӧсна, тшӧтш лаодикияса да иерапольса эскысьяс вӧсна.

¹⁴ Чолӧм ыстӧны миян дона бурдӧдысь Лука да Димас.

¹⁵ Висьталӧй чолӧм лаодикияса вокъяслы, тшӧтш Нимфалы да сы ордын чукӧртчысь эскысьяслы.

¹⁶ Тайӧ гижӧдсӧ лыддьӧм бӧраныд тӧждысьӧй, медым Лаодикия вичкоын сійӧс тшӧтш лыддясны. А ті лыддьӧй Лаодикияӧ мӧдӧдӧм гижӧдсӧ.

¹⁷ Аркиплы висьталӧй, мед бура уджалас да помӧдз вайӧдас Господьсянь сетӧм уджсӧ.

¹⁸ Ме, Павел, аслам киӧн гижа тіянлы чолӧмӧс. Тӧд выланыд кутӧй менсьым дзескыдінын пукалӧмӧс. Енлӧн буралӧмыс ставныдкӧд тіянкӧд. Аминь.