Исай 7 - Коми Библия 2023

Исай висьталӧ Ахазлы ышӧдан кывъяс

¹ Ахаз, иудаса ӧксы, вӧлі Озей Иотамлӧн пи. Сылӧн веськӧдлан кадӧ арамейяслӧн Рецин ӧксы да израильса Пеках ӧксы, Ремальлӧн пиыс, петісны тышӧ Ерусалимлы паныд, но эз вермыны сійӧс.

² Кор ӧксы керкаын кылісны, мый арамейяс локтӧмаӧсь нин Ефрем муӧ, сэки Ахазлӧн да став войтырыслӧн сьӧлӧмныс вӧрзис, кыдзи вӧрын тӧвнырысь вӧрӧны пуяс.

³ Сэки Господь шуис Исайлы: «Мун Шеар-Ясув пиыдкӧд да воча пет Ахазлы. Мунӧй вылыс вайӧртӧдсянь визувтысь ва дорӧ, пожъясянінӧ нуӧдан туй вылӧ.

⁴ Висьтав Ахазлы, мед лӧняс да оз майшась. Сылӧн лолыс мед оз нюкыртчы тайӧ тшыналысь кык сэрапомлӧн скӧралӧмысь. Мед оз пов Рецинысь да арамейясысь, мед оз пов Ремальлӧн пиысь.

⁵ Арамейяс ефремсаяскӧд да Ремальлӧн пикӧд ӧтвыв сёрнитчисны вӧчны сылы лёксӧ. Найӧ шуалӧны:

⁶ ”Ми уськӧдчам Иуда войтыр вылӧ, повзьӧдам найӧс, и найӧ лоӧны миян кипод улынӧсь. А ӧксыӧ налы ми пуктам Тавеллысь писӧ”.

⁷ Но Господь Ыджыдыс висьталӧ: – Оз ло тадзи, оз ло на ног!

⁸ Дамаскыс ӧд сӧмын Арамлӧн юркар, и Рециныс ӧд сӧмын Дамаскын юралӧ. Коляс квайтымын вит во, и Ефрем войтыр оз ло войтырӧн.

⁹ Самарияыс сӧмын Ефремлӧн юркар, и Ремальлӧн пиыс сӧмын Самарияын юралӧ. Онӧ кӧ зумыда эскӧй, онӧ вермӧй зумыда сулавны».

Эммануил йылысь водзвыв висьталӧм

¹⁰ Сэсся Господь водзӧ висьталіс Ахазлы:

¹¹ «Господьлысь, аслад Енлысь, кор петкӧдлыны индысьпас му пыдӧссянь либӧ вылі енэжсянь».

¹² Но Ахаз вочавидзис: «Ме ог кут корны, ог кут дӧзмӧдны Господьӧс».

¹³ Сэки Исай шуис: «Кывзӧй, Давидлӧн рӧдыс! Тіянлы ӧмӧй этша на, мый ті йӧзсӧ сьӧктӧданныд? Ті кӧсъянныд тшӧтш менсьым Енмӧс сьӧктӧдны?

¹⁴ Но Господь Ачыс петкӧдлас тіянлы пас: со, ныв сьӧктас, сэсся пи чужтас, Эммануил ним Сылы пуктас.

¹⁵ Сійӧ кутас пӧткӧдчыны йӧлӧн да маӧн сійӧ кадӧдзыс, кор велалас ӧтдортны лёксӧ да бӧрйыны бурсӧ.

¹⁶ Но тайӧ кадӧдзыс на, кор Сійӧ велалас ӧтдортны лёксӧ да бӧрйыны бурсӧ, кушмасны муясыс тайӧ кык ӧксыыслӧн, кодъясысь тэ ёна полан.

¹⁷ Тэныд, тэнад войтырлы да тэнад рӧдлы Господь мӧдӧдас сэтшӧм лунъяс, кутшӧмӧсь эз на вӧвны сійӧ кадсяньыс, кор Ефрем торйӧдчис Иудаысь. Тіянлы паныд Господь мӧдӧдас ассурса ӧксыӧс.

¹⁸ Сійӧ лунӧ Господь чукӧстас Нил ю дорысь гутъясӧс, Ассур муысь мазіясӧс.

¹⁹ Найӧ лэбзясны да пуксясны ю ковтысъясӧ да кырта потасъясӧ, найӧ вевттясны став йӧнсӧ да пуяссӧ.

²⁰ Сійӧ лунӧ Господь кушӧдз шырас юрсинытӧ, тошнытӧ да яндзим гӧннытӧ ю мӧдлапӧлысь медалӧм ассурса ӧксылӧн шыранӧн.

²¹ Сійӧ лунӧ ӧти мӧскӧс да кык кӧзаӧс видзысь

²² уна йӧлыс вӧсна пондас пӧткӧдчыны выйӧн. Тайӧ муас кольысьяс пондасны пӧткӧдчыны выйӧн да маӧн.

²³ Сійӧ лунӧ виноград йӧръясын, кӧні сюрсъясӧн быдмисны виноград пуяс, донасьыс-дона пуяс, кутас быдмыны йӧн да ёг турун.

²⁴ Сэтчӧ кутасны ветлыны ньӧввужйӧн да ньӧвъясӧн, ӧд муыс ставнас тырас йӧнмӧн да ёг турунӧн.

²⁵ Йӧн да ёг турун понда тэ он нин пет сійӧ видз-муыс вылӧ, кодӧс гӧрлісны-кӧдзлісны. Сэні пондасны йирсьыны ӧшъяс, сійӧс пондасны талявны ыжъяс».