Исай 64 - Коми Библия 2023

¹ Господьӧй, косяв енэжсӧ да лэччы! Керӧсъяс мед дзӧрӧны-тіралӧны Тэ водзын

² биын сотчысь ув моз, би вылын пузьысь ва моз. Лэччы, Господьӧй, медым Тэнӧ мустӧмтысьяс тӧдісны Тэнсьыд нимтӧ! Тэ водзын мед дзӧрӧны-тіралӧны войтыръяс.

³ Тэ вӧчлін повзьӧдана уджъяс, та йылысь ми весиг мӧвпыштнысӧ эгӧ кужлӧй. Тэ лэччин, и керӧсъяс дзӧрисны-тіралісны Тэ водзын.

⁴ Му пуксьӧмсяньыс на некод эз тӧдлы, эз кывлы пель, эз аддзывлы син, мый Тэ кындзи эм кутшӧмкӧ мӧд ен, коді эськӧ та мында вӧчис сы вылӧ лача кутысьлы.

⁵ Тэ бур сьӧлӧмӧн воча петан сылы, коді нимкодьпырысь веськыда вӧчӧ, коді восьлалӧ Тэнад туйӧд да казьтывлӧ Тэ йылысь. Но Тэ скӧрмин миян вылӧ, ӧд ми важысянь нин мыжсӧ вӧчам. Сідзкӧ, мездмам-ӧ ми?

⁶ Ми ставным пежӧсь, миян веськыдлунным няйтчӧм паськӧм кодь, ми ставным косьмӧм коръяс кодьӧсь, миян мыжъясным тӧвныр моз нӧбӧдӧны миянӧс.

⁷ Некод оз шыась Тэнад нимӧ, некод оз кутчысь Тэ дінӧ. Та вӧсна Тэ бергӧдін миянысь Ассьыд чужӧмтӧ, эновтін миянӧс кувны асланым мыжъясын.

⁸ Но Тэ, Господьӧй, – миян Батьным, ми – сёйыс, а Тэ – миянӧс Вӧчысьыс. Ми ставным – Тэнад киӧн вӧчӧмторъяс.

⁹ Господьӧй, эн скӧрав миян вылӧ дугдывтӧг, эн век казьтыв миянлысь мыжъяснымӧс. Эн вунӧд, мый ми – Тэнад войтырыд!

¹⁰ Тэнад вежа каръясын некод оз ов, Сион лои овтӧминӧн, Ерусалим – кушинӧн.

¹¹ Ставнас сотісны миянлысь вежа да дзирдлуна крамнымӧс, кӧні миян батьясным ошкисны Тэнӧ. Ставнас пазӧдісны миянлысь мича оланіннымӧс.

¹² Господьӧй, Тэ ӧмӧй водзӧ на кутан видзӧдны та вылӧ? Кутан ӧмӧй чӧв овны да нем жалиттӧг миянӧс мыждыны?