Исай 60 - Коми Библия 2023

Ерусалимлӧн локтан кадыс шуда

¹ Чеччы, югъяв, Ерусалим, ӧд тэнад югыдыд ӧзйис, тэ весьтын Господьлӧн дзирдлуныс тыдовтчис.

² Мусӧ вевттяс пемыдыс, сап пемыдыс вевттяс войтыръясӧс, но тэ весьтын петкӧдчас Господь, тэ весьтын тыдовтчас Сылӧн дзирдлуныс.

³ Войтыръяс локтасны тэнад югыдыд дінӧ, ӧксыяс чукӧртчасны тэнад яръюгыд кыа дінӧ.

⁴ Лэпты синтӧ да видзӧдлы гӧгӧр: найӧ ставныс чукӧртчӧмаӧсь, локтӧны тэ дінӧ. Тэнад пияныд ылісянь локтасны, тэнсьыд нывъястӧ ки вылын ваясны.

⁵ Тэ аддзан тайӧс да пондан нимкодясьны, тэнад сьӧлӧмыд пондас чеччыны нимкодьысла, ӧд саридзса озырлун ваясны тэныд, войтыръяслысь озырлунсӧ козьналасны тэныд.

⁶ Тэ дінӧ локтас уна верблюд, Мадианысь да Эфаысь локтасны том верблюдъяс. Саваын олысьяс локтасны тэ дінӧ, ваясны чӧскыд ӧвтанторъяс да зарни, кыпӧдасны Господьлы ошкӧм.

⁷ Кедарысь став ыжсӧ вайӧдасны тэ дінӧ, Невайотысь межъяс лоӧны тэнад киынӧсь. Менам висьпуктанін вылын найӧс ваясны вись пыдди, найӧ лоӧны Меным шогмана висьӧн, и Ме нимӧда Ассьым дзирдлуна крамӧс.

⁸ Кодъяс тайӧ лэбысьясыс? Найӧ лэбӧны кымӧръяс моз, лэбӧны гулюяс моз асланыс позйӧ.

⁹ Саридз дорын олысьяс лача кутӧны Ме вылӧ, фарсисса корабльяс медводзын кывтӧны, ылі муясысь найӧ вайӧны тэнсьыд пиянтӧ да налысь зарни-эзысьсӧ Господьлӧн, тэнад Енлӧн, нимыс вӧсна, Израильлӧн вежа Ен вӧсна, ӧд Сійӧ нимӧдіс тэнӧ.

¹⁰ Йӧз муысь локтысьяс пондасны кыпӧдны тэнсьыд стенъястӧ, налӧн ӧксыясыс пондасны кесъявны тэныд. Аслам скӧралігӧн Ме нӧйті тэнӧ, но Аслам муслун кузя Ме лоа бур сьӧлӧма тэ дінӧ.

¹¹ Тэнад дзиръяясыд пыр лоӧны восьсаӧсь, лун и вой найӧс оз кутны пӧдлавны, тэныд пондасны вайны войтыръяслысь озырлунсӧ, тэ дінӧ вайӧдасны налысь ӧксыяссӧ.

¹² Но войтыръясӧс, кодъяс оз кутны кесъявны тэныд, дзикӧдз лоӧ бырӧдӧма.

¹³ Кипарис, платан да пожӧм ваясны тэныд, ливанса озырлунӧн мичмӧдасны Менсьым вежаинӧс, Менсьым кок улӧс, мый Ме нимӧда.

¹⁴ Тэнӧ нартитысьяслӧн пияныс локтасны тэ дінӧ да улӧдз копыртчасны тэныд. Тэнӧ мустӧмтысьяс уськӧдчасны тэнад кок улӧ да шуасны тэнӧ Господьлӧн карӧн, шуасны Сионӧн – Израильлӧн вежа Енлӧн оланінӧн.

¹⁵ Тэнӧ вӧлі эновтӧма, тэнӧ ёна мустӧмтісны, некод эз волы тэ дінӧ. Но Ме нимӧда тэнӧ нэмъяс чӧж, вӧча тэнӧ нимкодьлунӧн водзӧ чужысьяслы.

¹⁶ Мукӧд войтыръяс кутасны йӧлӧн пӧткӧдны тэнӧ, налӧн ӧксыясыс – вердны тэнӧ. Сэки тэ тӧдмалан, мый Ме, Господь, – тэнӧ Мездысьыс, Яковлӧн вына Енмыс – тэнӧ Видзысьыс.

¹⁷ Ыргӧн пыдди Ме вая тэныд зарни, кӧрт пыдди – эзысь, пу пыдди – ыргӧн, из пыдди – кӧрт. Тэнад юралысьӧн Ме инда лӧньлун, тэнад ыджыдалысьӧн – веськыдлун.

¹⁸ Тэнад муын водзӧ оз ло виалӧм-дзескӧдӧм, оз ло мырддялӧм да бырӧдӧм тэнад муын. Аслад стенъяслы тэ сетан ”Мездӧм” ним, аслад дзиръяяслы – ”Ошкӧм” ним.

¹⁹ Луннас шондіыс оз нин понды тэныд югдӧдны, тӧлысьыс оз понды дзирдавны, но Ачыс Господь лоӧ тэныд бырлытӧм югыдӧн, тэнад Енмыд лоӧ тэнад дзирдлунӧн.

²⁰ Тэнад шондіыд оз нин пуксьы, тэнад тӧлысьыд оз нин дзебсьы, ӧд Господь лоӧ тэнад бырлытӧм югыдӧн, и тэнад бӧрдан лунъясыд помасясны.

²¹ Тэнад войтырысь ставныс лоӧны веськыда олысьясӧн, налы пыр кежлӧ вичмас тайӧ муыс. Найӧ – Меӧн пуктӧм быдмӧгъяс, Ме вӧчи найӧс Аслам киӧн, медым найӧ ошкисны Менӧ.

²² На пӧвстысь медічӧтсяньыс чужас сюрс олысь, медся жебсяньыс чужас вына войтыр. Ме, Господь, тэрмася вӧчны тайӧс ас кадӧ.