Исай 56 - Коми Библия 2023

Господьлӧн крамыс – став войтыръяслӧн кевмысян керка

¹ Господь тадзи висьталӧ: – Мыждӧй веськыда, олӧй веськыда, ӧд регыд воас Месянь мездмӧмыс, регыд воссяс Менам веськыдлунӧй.

² Шуда сійӧ мортыс, коді олӧ веськыда, коді кутчысьӧ веськыдлунас, коді пыдди пуктӧ шойччан лун, оз пежав сійӧс, коді видзӧ ассьыс кисӧ лёк вӧчӧмысь.

³ Йӧз муысь локтысь, коді йитчис Господькӧд, мед оз шу: «Господь торйӧдас менӧ Аслас войтырысь». Евнук мед оз шу: «Ме косьмӧм пу».

⁴ Господь тадзи висьталӧ: – Евнукъяслы, кодъяс пыдди пуктӧны шойччан лун, вӧчӧны Меным шогманасӧ да кутчысьӧны Менам йитӧдӧ,

⁵ Ме сета Аслам керкаын да карын казьтыланпас да ним, и тайӧ лоӧ налы ныв-пи дорысь бурджык на. Ме сета налы бырлытӧм ним, кодӧс оз вунӧдны.

⁶ Йӧз муысь локтысьясӧс, кодъяс йитчисны Господькӧд, кодъяс кесъялӧны да радейтӧны Сійӧс, кодъяс лоӧны Господьлӧн кесйӧгъясӧн, ставнысӧ, кодъяс пыдди пуктӧны шойччан лун, оз пежавны сійӧс, а кутчысьӧны Менам йитӧдӧ,

⁷ Ме вайӧда Аслам вежа керӧс вылӧ, сета налы нимкодясьны Аслам кевмысян керкаын. Меным шогманаӧсь лоӧны налӧн сотан да мукӧд висьясыс, висьпуктанін вылӧ вайӧмторъясыс. Менам керкаӧй кутас шусьыны став войтыръяслӧн кевмысян керкаӧн.

⁸ На кындзи, кодъясӧс чукӧртӧма нин татчӧ, Ме нӧшта на чукӧрта мукӧдӧс, – висьталӧ Господь Ыджыдыс, разалӧм Израиль войтырӧс чукӧртысь.

⁹ Мувывса став зверыс, вӧрса став пемӧсыс, локтӧй, сёйӧй!

¹⁰ Израильӧс видзысьяс синтӧмӧсь, ставныс найӧ мывкыдтӧмӧсь – увтны вермытӧм понъяс, найӧ нюжӧдчӧмаӧсь да вугралӧны, радейтӧны узьны.

¹¹ Найӧ горш понъяс, некор оз пӧтлыны. Найӧ мывкыдтӧм ыж видзысьяс, быдӧн мунӧ аслас туйӧд, быдӧн корсьӧ мыйкӧ аслыс курыштны.

¹² Найӧ шуалӧны: «Локтӧй, ме перъя вина, коддзымӧн юам сур. Аскиа луныс лоӧ татшӧм жӧ, да нӧшта на бурджык!»