Исай 50 - Коми Библия 2023

Енлы кесъялысь сьӧкыдалӧ

¹ Господь тадзи висьталӧ: – Кӧні тіян мамныдлӧн торйӧдчан гижӧдыс, Ме кӧ эновті сійӧс? Меным водзӧсӧн сетысьяс пӧвстысь кодлы Ме вузалі тіянӧс? Тіянӧс вузалӧма асланыд мыжъясныд вӧсна, лёк вӧчӧмныд вӧсна вӧтлӧма тіянлысь мамнытӧ.

² Мыйла некод эз вӧв, кор Ме волі тіян дінӧ? Мыйла некод эз вочавидз, кор Ме чуксалі тіянӧс? Менам киӧй ӧмӧй дженьдаммис, Ме ӧмӧй вынтӧмми, медым мездыны тіянӧс? Менам ӧлӧдӧмысь саридз косьмӧ, юяс лоӧны косінӧн, сэні ватӧмысла чериыс сісьмӧ, горш косьмӧмысла кулӧ.

³ Енэжсӧ Ме вевття сап пемыдӧн, сылы вевттьӧднас лоӧ шогалан паськӧм.

⁴ Господь Ыджыдыс сетіс меным мывкыд сёрни, медым аслам кывйӧн ме верми ёнмӧдны жебмӧмаясӧс. Быд асыв Сійӧ садьмӧдӧ, садьмӧдӧ менсьым пельӧс, медым бур велӧдчысь моз ме кывзі Сійӧс.

⁵ Господь Ыджыдыс восьтіс менсьым пельӧс, и ме эг пыксьы, эг бӧрыньтчы.

⁶ Ме сеті кучкавны ассьым мышкӧс, лэдзи нетшкыны тошкӧс. Ассьым чужӧмӧс эг тупкы менӧ лёкӧдысьясысь да ме вылӧ сьӧлалысьясысь.

⁷ Господь Ыджыдыс отсалӧ меным, та вӧсна ме ог яндысь, менам чужӧмӧй из кодь. Ме тӧда, меным оз ло яндзим,

⁸ ӧд матын Сійӧ, коді петкӧдлӧ, мый ме мыжтӧм. Коді кӧсйӧ менӧ мыжавны? Сувтам ёрд водзӧ! Коді кӧсйӧ меным паныд сувтны? Мед матыстчас!

⁹ Господь Ыджыдыс отсалӧ меным. Коді мыждас менӧ? Найӧ ставныс паськӧм моз важмасны, найӧс воз сёяс.

¹⁰ Коді тіян пӧвстысь полӧ Господьысь, кывзысьӧ Сылӧн кесйӧглысь? Коді ветлӧ пемыдас, кӧні абу югыдыс, сійӧ мед лача кутӧ Господьлӧн нимыс вылӧ, мед мыджсьӧ аслас Ен вылӧ.

¹¹ Ыпъялан биас асьныд мунӧй, донӧдӧм ньӧвъяс улас асьныд пырӧй, ті, кодъяс пестанныд би да лыйланныд биа ньӧвъяс. Со мый вӧчас тіянкӧд Менам киӧй – ті сьӧкыда куланныд.