Исай 49 - Коми Библия 2023

Израиль – Господьлӧн кесйӧг да войтыръяслы югыдыс

¹ Кывзӧй менӧ, саридз дорын олысьяс, сюся кывзӧй, ылысса войтыръяс! Господь чукӧстіс менӧ чужтӧдз на, мам кынӧмын на сетіс меным ним.

² Сійӧ вӧчис менсьым кывйӧс ёсь шыпуртӧн, вевттис менӧ Аслас ки вуджӧрӧн, вӧчис менӧ ёсь ньӧвйӧн, Аслас ньӧвпуртӧсын видзис менӧ.

³ Сійӧ шуис меным: «Израиль, тэ – Менам кесйӧг, тэ пыр Ме петкӧдла Ассьым дзирдлунӧс».

⁴ А ме чайті, мый весьшӧрӧ ме мырси-уджалі, весьшӧрӧ да ковтӧг ассьым вынӧс вошті. Но Господьсянь лоӧ меным веськыда мыждӧмыс, менам Енсянь лоӧ меным тырдоныс.

⁵ Господь вӧчис менӧ Аслас кесъялысьӧн мам кынӧмын на, медым ме Сылань бергӧді Яковӧс, медым Израиль чукӧртчис Сы дінӧ. Господь нимӧдӧ менӧ Аслас син водзын, менам Енмӧй – менам выныс. Ӧні Господь тадзи висьталӧ:

⁶ – Тэ – Менам кесйӧг, тэ выльысь сувтӧдан Яковлысь чужанкотыръяссӧ, бергӧдан Израильлысь коляс войтырсӧ, но тайӧ этша на. Ме вӧча тэнӧ войтыръяслы югыдӧн, медым Меӧн мӧдӧдӧм мездмӧмыс воис му помӧдзыс.

⁷ Господь, Израильӧс Мездысь, сылӧн вежа Ен, тадзи висьталӧ ыджыдалысьяслӧн кесйӧглы, кодӧс ставныс увтыртӧны, кодӧс лёкӧдӧны войтыръяс: – Тэнӧ аддзигӧн ӧксыяс сувтасны, юралысьяс копыртчасны муӧдзыс, ӧд Господь эскана, ӧд Израильлӧн вежа Ен бӧрйис тэнӧ.

Господь бӧр вайӧдӧ Ассьыс войтырсӧ

⁸ Господь тадзи висьталӧ: – Ме кылі тэнӧ бур кадӧ, отсалі тэныд мездман лунӧ. Ме видзи тэнӧ, пукті тэнӧ тайӧ войтырыслы йитӧд пыдди, медым тэ выльысь сӧвмӧдін тайӧ мусӧ, медым тэ юклін кушмӧм муяссӧ,

⁹ медым тэ шуин дзескыдінӧ йӧршитӧмаяслы: «Петӧй!», пемыдінын пукалысьяслы: «Петкӧдчӧй!» Туй бокысь найӧ аддзасны сёян, куш мылькъяс лоӧны налы йирсянінӧн.

¹⁰ Найӧ оз кутны тшыгъявны, налӧн оз кут косьмыны горшныс, найӧс оз пӧж шондіыс, ӧд найӧс пондас нуӧдны Сійӧ, коді бур сьӧлӧма на дінӧ, Сійӧ вайӧдас найӧс ва петанінъяс дорӧ.

¹¹ Став Ассьым керӧсъясӧс Ме вӧча туйясӧн, Менам туйясӧй пондасны мунны выліинті.

¹² Со, Менам войтырӧй локтас ылісянь: ӧтияс – войвывсянь, мӧдъяс – рытыввывсянь, мукӧдыс – Синим муысь.

¹³ Нимкодясь, енэжыс, гажӧдчы, муыс, гораа нимкодясьӧй, керӧсъяс! Ӧд Господь бурӧдіс Ассьыс войтырсӧ, Сійӧ бурсьӧлӧмтчӧ Аслас коньӧръяс дінӧ.

¹⁴ Сион шуліс: «Господь эновтіс менӧ, менам Ыджыдӧй вунӧдіс менӧ!»

¹⁵ Ань ӧмӧй вунӧдас ассьыс пузчужӧм кагасӧ, сійӧ ӧмӧй оз кут жалитны ассьыс чужтӧм кагасӧ? Но весиг мам кӧ вунӧдас ассьыс кагасӧ, Ме тэнӧ ог вунӧд!

¹⁶ Ме серпасалі тэнӧ Аслам ки пыдӧсӧ, тэнад стенъясыд – век Менам син водзын.

¹⁷ Тэнад пияныд тэрмасьӧны локны тэ дінӧ, а тэнӧ пазӧдысьяс-куштысьяс пышйӧны.

¹⁸ Лэпты синтӧ да гӧгӧр видзӧдлы: тэнад пияныд ставныс чукӧртчӧны, локтӧны тэ дінӧ. Ме кыв сетӧмӧн кӧсйыся Аслам олӧмӧн, – висьталӧ Господь, – кыдзи гӧтырпулӧн мичмӧдчанторйыс зарни-эзысь, тадзи пияныд лоӧны тэнад мичмӧдчанторйӧн.

¹⁹ Тэнсьыд муястӧ куштӧма, сэні эз коль олысьыс, тэнсьыд мутӧ дзикӧдз пазӧдӧма. Но тэныд дзескыд лоӧ уна лыда олысьяс вӧсна, тэнӧ куштысьяс дзикӧдз ылыстчасны тэ дінысь.

²⁰ Тэ воштін челядьтӧ, но тэнад нӧшта на лоӧны челядь. Найӧ шуасны тэныд: «Миянлы дзескыд тані, сет миянлы оланін».

²¹ Тэ чуйман: «Коді меным чужтіс найӧс? Менам эз вӧвны челядьӧй, ме вӧлі нӧбасьны вермытӧмӧн, ме вӧлі пленын, чужан муысь ылын. Коді нӧ быдтіс найӧс? Ме вӧлі ӧтка – кытысь нӧ лоины найӧ?»

²² Господь Ыджыдыс тадзи висьталӧ: – Ме нюжӧда киӧс войтыръяслань, лэпта Ассьым дӧрапасӧс чужанкотыръяслы, и найӧ ваясны тэнсьыд пиянтӧ ки выланыс, тэнсьыд нывъястӧ – пельпом выланыс.

²³ Ӧксыяс пондасны тӧждысьны тэнад челядь вӧсна, ӧксыяслӧн гӧтыръясныс пондасны вердны тэнсьыд ныв-питӧ. Найӧ пондасны муӧдз копрасьны тэныд, тэнад кокысь буссӧ нювны. Сэки тэ тӧдмалан, мый Ме – Господь, и Ме вылӧ лача кутысь оз янав.

²⁴ Вына тышкамортлысь ӧмӧй позьӧ босьтны тышын мырддьӧмасӧ? Вермысьлысь ӧмӧй позьӧ мырддьыны пленӧ босьтӧмаясӧс?

²⁵ Но Господь тадзи висьталӧ: – Ӧні вына тышкамортлысь лоӧ мырддьӧма пленӧ босьтӧмаясӧс, дзескӧдысьлысь лоӧ босьтӧма мырддьӧмасӧ. Ме Ачым кута вермасьны тэныд паныд сувтысьяскӧд, Ме мезда тэнсьыд челядьтӧ.

²⁶ Тэнӧ нартитысьясӧс Ме пӧткӧда налӧн жӧ вир-яйнас, найӧ пондасны юны ассьыныс вирсӧ да коддзасны, кыдзи коддзӧны выль винаысь. Сэки ставныс тӧдмаласны, мый Ме – Господь, тэнӧ Мездысь, Яковлӧн вына Ен.